Արցախի Հանրապետության խորհրդարանի «մահվան» մասին լուրերը խիստ չափազանցված են. ԼՂ ԱԺ խոսնակի պաշտոնակատարը պատասխանել է Ալեն Սիմոնյանին

Արմինֆո.Արցախի Հանրապետության խորհրդարանի "մահվան" մասին լուրերը խիստ չափազանցված են, իսկ նրա պատգամավորները շարունակում են պատասխանատվություն կրել սեփական ժողովրդի հանդեպ: Այդ մասին սոցցանցում գրել է Լեռնային Ղարաբաղի խորհրդարանի խոսնակի պաշտոնակատար Գագիկ Բաղունցը ՝ մեկնաբանելով Հայաստանի խորհրդարանի ղեկավարի հայտարարությունը։

Նշենք, որ նախօրեին ՀՀ ԱԺ խոսնակ Ալեն Սիմոնյանը հայտարարել էր Հայաստան - Լեռնային Ղարաբաղ միջխորհրդարանական հանձնաժողովը լուծարելու անհրաժեշտության մասին, քանի որ "երկրորդ կողմն այլևս իրավասու չէ": "Այլեւս չկա այնպիսի հասկացություն, ինչպես Լեռնային Ղարաբաղի պաշտոնատար անձ։ Նման կարգավիճակ Հայաստանում այլևս ոչ ոք չունի, ես չգիտեմ, թե ում հետ պետք է քննարկեմ դա՝ հնարավոր նստաշրջանի դեպքում։ Որպես իրավաբան կարծում եմ, որ նշված ձևաչափն այլևս գոյություն չունի", - նշել էր ՀՀ ԱԺ խոսնակը։ "Լեռնային Ղարաբաղ" սահմանումն ինձ համար այլևս գոյություն չունի", - ամփոփել էր Սիմոնյանը:

Ինչպես նշել է Բաղունցը, 2023թ սեպտեմբերին տեղի ունեցած էթնիկ զտումից հետո ԱՀ ԱԺ պաշտոնյաները/ պատգամավորները/, ստանալով Արցախի ժողովրդի քվեն 5 տարի ժամկետով, շարունակում են ստեղծված իրավիճակում պատասխանատվություն կրել արցախահայության ճակատագրի վերաբերյալ և հնարավոր բոլոր ջանքերը գործադրել անվտանգության երաշխիքների ներքո ապահովելու նրանց հավաքական վերադարձը հայրենիք:

Ինչ վերաբերում է միջխորհրդարանական հանձնաժողովի ֆորմատը լուծարելուն, ապա դրա համար Գագիկ Բաղունցի ասելով, կան արձանագրված համապատասխան մեխանիզմներ: Նա հավելել է, որ ԱՀ ԱԺ միջխորհրդարանական ու բարեկամական խմբերի աշխատանքներն ու հարաբերությունները շարունակվում են  Ֆրանսիայի, Կիպրոսի, Հունաստանի, Բելգիայի և այլ երկրների խորհրդարանականների և խմբերի հետ։

Հիշեցնենք, որ հայերի ելքը Լեռնային Ղարաբաղից (Արցախի Հանրապետություն) սկսվել է 2023 թվականի սեպտեմբերի 24-ին։ Դրան նախորդել են Ադրբեջանի կողմից Արցախի ամիսներ տևած շրջափակումը (2022 թվականի դեկտեմբերի 12-ից), որը տարածաշրջանում առաջացրել էր հումանիտար սուր ճգնաժամ, և 2023 թվականի սեպտեմբերի 19-ին Ադրբեջանի կողմից սկսված ռազմական գործողությունները ։ Սեպտեմբերի 20-ին ԼՂՀ իշխանությունները համաձայնել են զինաթափել ԼՂՀ պաշտպանության բանակը և բանակցել: Սեպտեմբերի 28-ին ԼՂՀ նախագահ Սամվել Շահրամանյանը հրամանագիր է ստորագրել 2024 թվականի հունվարի 1-ից Լեռնային Ղարաբաղի Հանրապետության գոյությունը դադարեցնելու և բոլոր պետական հիմնարկները լուծարելու մասին: 2023 թվականի հոկտեմբերի 20-ին Երևանում Շահրամանյանը հայտարարել է, որ Արցախի Հանրապետությունը չի լուծարվել, և որ այդ փաստաթղթի շատ մանրամասներ կան, որոնք ինքը չի կարող հրապարակել։ «Որևէ փաստաթղթով հնարավոր չէ լուծարել ժողովրդի ստեղծած հանրապետությունը.Մենք պահպանել ենք մեր զինվորների, քաղաքացիական բնակչության կյանքը: Եթե մենք մեկ ժամ ուշ կանգնեցնեինք պատերազմը, ապա ադրբեջանցիները կմտնեին քաղաք և կմորթեին բոլոր կանանց և երեխաներին", - հայտարարել է Շահրամանյանը։