Ուրբաթ, 6 Սեպտեմբերի 2024 12:43

Արմինֆո. Բուլղարիայի նախագահ Ռումեն Ռադևը Բուլղարիայում Հայաստանի Հանրապետության դեսպան Արմեն Եդիգարյանին նախագահականի Զինանշանի սրահում տեղի ունեցած հանդիսավոր արարողության ժամանակ պարգևատրել է «Մադարյան ձիավոր» առաջին աստիճանի շքանշանով։

 

Բուլղարիայում Հայաստանի դեսպանության հաղորդագրության համաձայն, պետական մրցանակը շնորհվում է դիվանագետին՝ երկկողմ հարաբերությունների ամրապնդման և զարգացման գործում ունեցած մեծ վաստակի համար։

 

Նախագահ Ռադևն իր անձնական գոհունակությունն է հայտնել Հայաստանի և Բուլղարիայի միջև անկեղծ բարեկամության և արդյունավետ համագործակցության գերազանց հարաբերությունների կապակցությամբ․ <<Իր պաշտոնավարման ընթացքում դեսպան Եդիգարյանը հետևողական ջանքեր է գործադրել այդ հարաբերությունները զարգացնելու ուղղությամբ՝ չնայած COVID-19 համաճարակի և տարածաշրջանային և գլոբալ բնույթի ճգնաժամերի կողմից պարտադրված մի շարք օբյեկտիվ դժվարությունների։ Բայց կարևորն այն է, որ երկխոսությունը, հարաբերությունները, շփումները քաղաքական ամենաբարձր մակարդակով պահպանվեցին, և 2022 թ․ մենք նշեցինք մեր երկու երկրների միջև դիվանագիտական հարաբերությունների հաստատման 30-ամյակ>>, - ասել է պետության ղեկավարը։

 

Ռադևը նշել է, որ 2022 թ. աշնանը պետական այցով Բուլղարիայում է եղել Հայաստանի նախագահ Վահագան Խաչատուրյանը, իսկ այս տարի՝ Հայաստանի Ազգային ժողովի նախագահ Ալեն Սիմոնյանը։

 

Նախագահը նշել է, որ դեսպան Եդիգարյանի օրոք երկու երկրների միջև առկա է եղել առևտրատնտեսական հարաբերությունների լուրջ զարգացում, հատկապես 2022 թ․-ից հետո, երբ դրանք աճել են ավելի քան 50%-ով, և այդ միտումը պահպանվում է ժամանակի ընթացքում։ Նա մեկնաբանեց, որ Երևանի և Սոֆիայի միջև շաբաթական երկու անգամ մշտական ավիաընկերության բացումը չափազանց կարևոր քայլ է այս ուղղությամբ, ինչպես նաև Հայաստանի և Բուլղարիայի միջև Առևտրի պալատի ստեղծման արձանագրությունը։ Նրա խոսքով, ներուժը հսկայական է, և դա Եվրոպայի և Ասիայի միջև տրանսպորտային, էներգետիկ և թվային կապերի ընդլայնման համատեքստում է։

 

Դեսպան Եդիգարյանը նման բարձր պարգևատրման կամակցությամբ իր շնորհակալությունն հայտնեց բուլղարերեն լեզվով։

 

<<Գրեթե չորս տարի առաջ այս շենքում ես հաճույք ունեցա ներկայացնելու իմ հավատարմագրերը, երբ այս ընթացքում մեր տարածաշրջանը ողբերգական պատերազմի մեջ ընկավ Լեռնային Ղարաբաղում աղետալի հետևանքներով, և չմոռանանք նաև COVID-19-ի հետ կապված խնդիրները, նաև այն, որ 2021թ․ապրիլից մի քանի ընտրություններ են եղել, որոնք անորոշություն են ստեղծել օտարերկրյա գործընկերների հետ գործնական համագործակցության հարցում>>,-մասնավորապես ասաց ՀՀ դեսպանը, հավելելով, որ <<այս ֆոնի վրա մենք հաջողություն ենք քաղել մեր բարձր դիվանագիտական երկխոսության մեջ, քանի որ այն շարունակվում է ընթանալ անխոչընդոտ>>։