Ինչպես և սպասվում էր. ընդդիմադիր կուսակցությունները չեն անցել Ադրբեջանի նոր խորհրդարան

Արմինֆո. Ադրբեջանի խորհրդարանական ընտրությունների քվեաթերթիկների 91 տոկոսի հաշվարկի արդյունքում նախագահ Իլհամ Ալիևի "Ենի Ազերբայջան" (Նոր Ադրբեջան) կուսակցությունը Միլլի մեջլիսի 125 տեղերից ստանում է 68-ը: Այդ մասին ճեպազրույցի ժամանակ հայտարարել է Ադրբեջանի կենտրոնական ընտրական հանձնաժողովի նախագահ Մազախիր Պանախովը։

Ըստ ԶԼՄ-ների՝ իշխանության դեմ հանդես եկող քաղաքական ուժերը երկրի նոր խորհրդարանում ներկայացված չեն լինի։ Մնացած մանդատները բաժին կհասնեն ձեւականորեն անկախ թեկնածուներին, որոնք իրականում աջակցում են կառավարությանը, ինչպես նաեւ՝ ոչ մեծ կառավարամետ կուսակցություններին:

ԿԸՀ տվյալներով՝ ընտրություններին մասնակցել է ընտրողների ընդամենը 37 տոկոսը կամ 2 միլիոն 196 հազար 711 ընտրող: Երկրի խոշորագույն ընդդիմադիր կուսակցությունը՝ "Ադրբեջանի Ժողովրդական ճակատը", բոյկոտել է քվեարկությունը: Մյուս ընդդիմադիր "Մուսավաթ" կուսակցությունը 15 տարվա մեջ առաջին անգամ մասնակցել է ընտրություններին, սակայն նոր խորհրդարանում ոչ մի տեղ չի ստանում ։ Նրա առաջնորդ Արիֆ Գաջիլին Reuters-ին ասել է, որ կուսակցությունը չի հավատում անցած ընտրությունների ազնվությանը, բայց մասնակցել է դրանց՝ "երկրում քաղաքական մթնոլորտն ակտիվացնելու համար":

Նշենք, որ ընտրություններն անցել են բազմաթիվ խախտումներով, ծեծկռտուքներով, սակայն, միջազգային դիտորդները, այդ թվում նաև ԵԱՀԿ/ԺՀՄԻԳ, դրանք անվանել են "թափանցիկ և ժողովրդավարական սկզբունքներին համահունչ":