Փաշինյանը պատասխանել է Բաքվի մեղադրանքներին. Ինչու՞ Ադրբեջանը կարող է զենք գնել Իտալիայից, իսկ Հայաստանը չի կարող այն գնել Ֆրանսիայից

Արմինֆո.Յուրաքանչյուր պետություն ունի հզոր և մարտունակ բանակ ունենալու իրավունք, ինչը հիմնավորվում է ՄԱԿ կանոնադրության ինքնապաշտպանության իրավունքի մասին 51-րդ հոդվածով: Այդ մասին օգոստոսի 31-ին մամուլի ասուլիսում հայտարարել է Հայաստանի վարչապետ Նիկրո Փաշինյանը ՝ անդրադառնալով Ադրբեջանի կողմից ՀՀ իշխանությունների հասցեին հնչող մշտական մեղադրանքներին, թե, իբր, անթույլատրելի են սպառազինության գնումները:

Հայաստանի վարչապետն ընդգծել է, որ ցանկացած պետություն ունի իրեն պաշտպանելու իրավունք, դա անօտարելի իրավունք է, որը ենթակա չէ վիճարկման: "Հայաստանի զինված ուժերում իրականացվող բարեփոխումները բացառապես այդ նպատակն են հետապնդում", - պարզաբանել է Փաշինյանը:

Միաժամանակ, նա նշել է, որ ընդդիմությունը Հայաստանի իշխանություններին քննադատում է այն բանի համար, որ ՀՀ ինքնիշխան տարածքները օկուպացված են, և Հայաստանի կառավարությունը միջոցներ չի ձեռնարկում դրանք վերադարձնելու համար: Ընդ որում, նա հավաստիացրել է, որ Հայաստանի ինքնիշխան տարածքները չեն կարող սակարկության առարկա լինել Հայաստանի իշխանությունների համար։

"Բայց, մյուս կողմից, ոչ այսօր, ոչ վաղը, ոչ էլ վաղվանից հետո մենք, ընդհանրապես, այդ հողերը ռազմական եղանակներով վերադարձնելու հարց չենք դնում, քանի որ մեր բանակցությունների տրամաբանությունը մեզ թույլ է տալիս աշխատել դրանք դիվանագիտական, բանակցային ճանապարհով վերադարձնելու ուղղությամբ", - հավաստիացրել է ՀՀ վարչապետը, հավելելով, որ Հայաստանն ընդհանրապես ագրեսիվ օրակարգ չունի։

Այնուհետև նա ուշադրություն է հրավիրել այն հանգամանքի վրա, որ Հայաստանի իշխանություններին շատ են մեղադրում այն բանի համար, որ Ֆրանսիան զինում է Հայաստանին, կամ՝ Հնդկաստանը: "Բայց մենք բոլորս շատ լավ գիտենք, որ Ադրբեջանը զենք է գնում Իտալիայից։ Ինչու՞ Ադրբեջանը կարող է զենք գնել Իտալիայից,  իսկ Հայաստանը չի կարող այն գնել Ֆրանսիայից: Ադրբեջանը զենք է գնում Պակիստանից. այդ դեպքում ինչու՞ Հայաստանը չի կարող զենք ձեռք բերել Հնդկաստանից", - հարցրել է Փաշինյանը, նշելով, որ Ադրբեջանը սպառազինություն է գնում Բուլղարիայից, Սերբիայից և Սլովակիայից ։ Նա հավելել է, որ հայկական կողմին հայտնի է Ադրբեջանի կողմից ԵՄ առնվազն երեք երկրներից սպառազինություն գնելու մասին: "Ադրբեջանը սպառազինություն է գնում նաև Իսրայելից։ Հսկայական քանակությամբ զենք, բայց մենք ամեն օր չենք շեփորում դրա մասին: Մենք ունենք այդ տեղեկատվությունը: Որոշ փորձագետներ իրավիճակն այնպես են ներկայացնում, որ Ադրբեջանը Հայաստանին մեղադրում է սպառազինություն գնելու մեջ ՝ սեփական գնումները թաքցնելու համար: Նույնը վերաբերում է սահմանադրությանը։ Ադրբեջանը ՀՆԱ-ի 14-15 տոկոսը ծախսում է ռազմական կարիքների համար, մինչդեռ, Հայաստանում այդ թիվը կազմում է 4-5 տոկոս։ Մենք չենք գնում առճակատման ճանապարհով, եթե կան մտահոգություններ, եկեք ստեղծենք սպառազինությունների վերահսկման հանձնաժողովներ", - առաջարկել է Փաշինյանը։

Ընդ որում, նա կարծում է, որ հաճախ բանակցությունները փակուղի են մտնում, քանի որ իրավիճակի ամբողջական պատկեր չկա, եւ դրանից ելնելով Հայաստանի իշխանությունները մշտապես նոր առաջարկներ են առաջ մղում ։ Սակայն, ըստ նրա, Հայաստանը էսկալացիայի կողմնակից   եւ նախաձեռնող չէ ։ Փաշինյանը նաև հիշեցրել է, որ Հայաստանի իշխանությունները բավարար ապացույցներ ունեն 2020 թվականի աշնան 44-օրյա պատերազմին նույն Թուրքիայի մասնակցության վերաբերյալ: "Բայց մենք այդ հարցը չենք բարձրացնում, հատկապես ներկա պայմաններում, երբ հայ-թուրքական հարաբերություններում դանդաղ, բայց դրական դինամիկա է զգացվում", - ասել է նա:

Փաշինյանն անդրադարձել է նաև Ադրբեջանի մեղադրանքներին, իբր, "Հայկական ԽՍՀ-ից հազարավոր ադրբեջանցիների բռնի տեղահանման" մասին: Այդ համատեքստում նա ընդգծել է, որ Հայաստանի տարածքում նման գործողություններ չեն եղել, և կան բազմաթիվ արխիվային տվյալներ այն մասին, թե ինչպես են ադրբեջանցիները վաճառել կամ փոխանակել իրենց ունեցվածքը Հայկական ԽՍՀ տարածքում՝ մեկնելիս, կամ էլ պետությունից փոխհատուցում են ստացել։ Փաշինյանի խոսքով ՝ Բաքվի մեղադրանքներն ու պնդումներն այս հարցում լուրջ գնահատական և ստուգում են պահանջում: Եզրափակելով խոսքը՝ նա ևս մեկ անգամ ընդգծել է Հայաստանի հանձնառությունը խաղաղության օրակարգին: