Աղասանդյան. ՀԱՊԿ-ի և Ռուսաստանի նկատմամբ այլընտրանք գոյություն չունի՝ որպես Հայաստանի կայունության երաշխավորներ

Արմինֆո. ՀԱՊԿ-ին և Ռուսաստանին այլընտրանք գոյություն չունի՝ որպես Հայաստանի կայունության երաշխավորներ: Նման համոզմունք է հայտնել Ռուսաստանի ԱԳՆ ԱՊՀ երկրների առաջին դեպարտամենտի տնօրեն Միքայել Աղասանդյանը:

Խոսելով ՀԱՊԿ ընդհանուր աշխատանքներին Հայաստանի մասնակցության մասին՝ ռուսաստանցի դիվանագետը փաստել է, որ այժմ Երեւանում գերակշռում է նման փոխգործակցությունից հեռանալու գիծը: "Այդ դիրքորոշումը, ինչպես տեսնում ենք, հակասում է Հայաստանի ժողովրդի շահերին, էապես թուլացնում է ազգային անվտանգությունը։ Ի վերջո, ՀԱՊԿ-ին և Ռուսաստանին՝ որպես հանրապետության կայունության երաշխավորներ, այլընտրանք գոյություն չունի։ Այս փուլում ՀԱՊԿ-ում Հայաստանի լիարժեք համագործակցությանը վերադառնալու դռները բաց են, իսկ կազմակերպության շրջանակներում փոխադարձ պարտավորությունները մնում են անփոփոխ: Ակնկալում ենք, որ հայ գործընկերները, հաղթահարելով կասկածները, կրկին կցուցաբերեն շահագրգիռ համատեղ աշխատանքի հանձնառություն՝ ի շահ բարեկամ հայ ժողովրդի ռազմավարական շահերի", - ասել է Աղասանդյանը՝ «ՌԻԱ Նովոստի»-ի հետ հարցազրույցում։

Ընդ որում, պատասխանելով ճշգրտող հարցին,  թե Հայաստանի ներկայիս իշխանությունների՝ Եվրամիության եւ ՆԱՏՕ-ի հետ ավել0ի սերտ համագործակցության ձգտումը ինչպես կարող է ազդել Երեւանի եւ ԵԱՏՄ-ի փոխհարաբերությունների վրա, ռուսաստանցի դիվանագետը համոզմունք է հայտնել, որ Մոսկվայի եւ Երեւանի հարաբերությունները Եվրասիական տնտեսական միության շրջանակներում հիմնված են փոխշահավետ համագործակցության վրա: "Պետք չէ փորձագետ լինել տնտեսության կամ քաղաքականության ոլորտում, որպեսզի դիտարկենք ակնհայտը. միությունը ձեռնտու է Երեւանին, շատ առումներով հենց նրա շնորհիվ է, որ Հայաստանում տնտեսական աճի տեմպերը տպավորիչ դրական դինամիկա են ցույց տալիս, որով քչերը կարող են պարծենալ։

Այսպես, 2024 թվականի առաջին երեք ամիսներին երկրի ՀՆԱ-ն աճել է ավելի քան 9 տոկոսով, ինչը ԵԱՏՄ անդամ պետությունների շրջանում առավելագույն ցուցանիշն է։ 2015-2023 թվականներին Հայաստանը միության շուկա արտահանումն ավելացրել է 14 անգամ ՝ 0,25 - ից հասնելով 3,6 միլիարդ ԱՄՆ դոլարի։ ԵԱՏՄ անդամ այլ պետություններից դեպի Հայաստան անդրսահմանային դրամական փոխանցումների ծավալը 2015-2023 թվականներին աճել է 3,8 անգամ (1,05 – ից մինչեւ  4,0 մլրդ ԱՄՆ դոլար): Բնականաբար, այս ամենը թույլ է տալիս ավելի շատ հարկեր հավաքել, աշխատատեղեր ստեղծել, բարելավել բնակչության կյանքի որակը ։ Միավորման շրջանակներում ստեղծված են բոլոր պայմանները աշխատանքային գործունեություն իրականացնելու համար", - հավելել է նա ։

"Ինչ վերաբերում Է Եվրամիության և ՆԱՏՕ-ի հետ ավելի սերտ փոխգործակցության Երևանի որդեգրած գծին, ապա այստեղ մեր գործընկերներն ակնհայտորեն ընկել են նրանց ներդրումներ, տեխնոլոգիաներ և պայծառ ապագա խոստացող արևմտամետների կարթի վրա ։ Նման մոտեցումն արդեն բազմիցս կիրառվել է նրանց կողմից հետխորհրդային տարածքում ։ Իսկ թե ինչ դուրս եկավ դրանից, մենք ամեն ինչ շատ լավ գիտենք և տեսնում ենք", - շարունակել է ռուսաստանցի դիվանագետը։

Աղասանդյանը վստահություն է հայտնել, որ արտատարածաշրջանային ուժերն ի վիճակի չեն օբյեկտիվորեն լուծել այն տարածաշրջանների հարցերը, որոնց սահմաններում իրենք անմիջականորեն գոյություն չունեն, և նրանց գլխավոր նպատակն է սեպ խրել Ռուսաստանի հետ համագործակցության մեջ: "Եվրասիական տնտեսական միությունը փաստերն են, իրականություն, գործող առավելություններ ու ձեռքբերումներ։ Ակնկալում ենք, որ պրագմատիզմը և ողջախոհությունը թույլ չեն տա հրաժարվել դրանից ՝ ի շահ երկարաժամկետ հեռանկարում անորոշության։ Ի վերջո, համեմատեք Հայաստանի առևտրաշրջանառության օբյեկտիվ ցուցանիշները ԵԱՏՄ երկրների և արտատարածաշրջանային խաղացողների հետ, և ինչպես ցանկացած անաչառ դիտորդի, ձեզ ամեն ինչ պետք է պարզ դառնա", - ամփոփել է ռուսաստանցի պաշտոնյան ։