Ալիևը Պուտինի հետ զրույցում ոչ մի անգամ չի հիշատակել Հայաստանը

Արմինֆո. Ադրբեջանի նախագահ Իլհամ Ալիևը Ռուսաստանի նախագահ Վլադիմիր Պուտինի հետ բանակցությունների հրապարակային հատվածում ոչ մի անգամ չի հիշատակել Հայաստանը:

Բանակցությունների սկզբում նեղ կազմով, ապա ընդլայնված կազմով արված հայտարարությունների և ԶԼՄ-ների համար արված հայտարարության ընթացքում Ալիևը միայն մեկ անգամ է անդրադարձել Հարավային Կովկասում տիրող իրավիճակին, այն էլ ՝ միայն հպանցիկ:

"Նեղ ձևաչափով հանդիպմանը մենք նաև մանրամասն քննարկեցինք տարածաշրջանային անվտանգության հետ կապված հարցեր։ Անցած տարվա սեպտեմբերից հետո տարածաշրջանում ստեղծվել է բոլորովին նոր իրավիճակ ՝ Ադրբեջանը լիովին վերականգնել է իր ինքնիշխանությունն ու տարածքային ամբողջականությունը։ Բնականաբար, նոր իրավիճակը նոր հնարավորություններ է բացում Հարավային Կովկասում հսատատուն և տևական խաղաղության հաստատման համար: Ռուսաստանի և Ադրբեջանի միջև սերտ փոխգործակցությունից մեծապես կախված է ողջ հարավկովկասյան տարածաշրջանի կայունությունն ու անվտանգությունը", - հայտարարել է Ալիևը, որը նախկին ժամանակներում ավելի մեծ պերճախոսություն էր դրսևորում և, որպես կանոն, բաժիններով պահանջներ էր հնչեցնում Հայաստանի նկատմամբ:

Այնուհետև Ալիևն անցել է "Հյուսիս-Հարավ" նախագծին, նշելով, որ այն բացառիկ կարևոր նշանակություն ունի ինչպես ադրբեջանառուսական միջպետական հարաբերությունների, այնպես էլ տարածաշրջանային տրանսպորտային միջանցքների, տրանսպորտային ուղիների հետ կապված հարցերի համար: "Պետք է ասեմ, որ Ադրբեջանի տարածքում "Հյուսիս-Հարավ" միջանցքի և երկաթուղային, և ավտոմոբիլային հատվածները լիովին իրագործված են և հաջողությամբ գործում են ։ Այս պահին մենք ակտիվորեն զբաղվում ենք այդ միջանցքի երկաթուղային հատվածի արդիականացմամբ, որպեսզի բարձրացնենք դրա թողունակությունը։ Մենք խոսում ենք տարեկան 15 միլիոն և ավելի մինչև 30 [միլիոն] տոննա բեռների փոխադրման հնարավորության մասին, և դա միանգամայն իրատեսական է։ Այս դեպքում և Ռուսաստանը, և Ադրբեջանը, ես հույս ունեմ, նաև այդ միջանցքի մյուս մասնակիցները համատեղ ջանքերով կշարունակեն իրենց գործունեությունը", - ասել է Ալիևը , ընդգծելով, որ երկիրը մտադիր է արդեն այս տարի մոտ 120 մլն դոլար հատկացնել այդ 0երկաթուղային հատվածի արդիականացման համար ՝ պահանջվող թողունակության հասնելու նպատակով։

Նրա խոսքով, հանդիպմանը մանրամասն քննարկվել են էներգետիկայի ոլորտին վերաբերող հարցեր, և մանրամասն վերլուծվել է իրավիճակը ինչպես նավթագազային, այնպես էլ էլեկտրաէներգիայի ոլորտում, կարծիքներ են փոխանակվել Կասպից ծովի էկոլոգիական իրավիճակի, դրա աղետալի վիճակի վերաբերյալ: "Ես շնորհակալություն հայտնեցի Վլադիմիր Վլադիմիրովիչին և, ընդհանրապես, ռուսական կողմին՝ որպես կլիմայի փոփոխության  ՄԱԿ-ի շրջանակային կոնվենցիայի կողմերի COP-29 կլիմայական համաժողովի անցկացման վայր Ադրբեջանի թեկնածությանը սատարելու համար։ Ռուսաստանի աջակցությունը չափազանց կարևոր էր, և մենք այժմ աշխատում ենք նաև երկկողմ ձևաչափով, կլիմայական այս համաժողովի նախապատրաստման հետ կապված հարցերի շուրջ", - այնուհետև նշել է Ալիևը:

Միաժամանակ , նա հավաստիացրել է, որ այսօր Բաքվում ընդունված փաստաթղթերը, ներառյալ, առաջին հերթին, նախագահների համատեղ հռչակագիրը, ևս մեկ անգամ հաստատում են ադրբեջանառուսական հարաբերությունների բարեկամական և դաշնակցային բնույթը: "Դաշնակցային փոխգործակցության մասին հռչակագրի դրույթը, որը ստորագրվել է 2022 թվականի փետրվարին, հաջողությամբ իրականացվում է ։ Մեր երկրները գործում են որպես դաշնակիցներ, որպես բարեկամներ, որպես  մերձավոր գործընկերներ և հարևաններ։

Մենք այսօր մանրամասն քննարկեցինք միջպետական հարաբերությունների լայն շրջանակ։ Նույնիսկ, բավական է նայել պատվիրակությունների կազմին՝ տեսնելու համար, որ միջպետական կառույցների գործունեության ոլորտն իրականում բավականին ընդարձակ է ։ Մենք մանրամասն վերլուծեցինք առևտրատնտեսական հարաբերությունների հետ կապված հարցերը։ Ապրանքաշրջանառության աճը և անցյալ տարի, և այս տարվա վեց ամիսներին խոսում է համագործակցության մեծ ներուժի մասին ։ Անցյալ տարի մենք հատեցինք 4 միլիարդ դոլարի սահմանը և կարծիքներ փոխանակեցինք այն մասին, որ, բնականաբար, դա սահմանը չէ ։ Անկասկած, այս այցը կրում է պատմական բնույթ և իր կարևոր ներդրումը կունենա մեր երկրների միջև բարեկամական և դաշնակցային հարաբերությունների ամրապնդման գործում", - ամփոփել է Ալիևը: