Նովոսիբիրսկում մեկնարկել է ՀԱՊԿ ԱԱՀՈՒ "Կոբալտ-2024" զորավարժությունը․Հայաստանը չի մասնակցում

Արմինֆո. Նովոսիբիրսկում տեղի է ունեցել ՀԱՊԿ արագ արձագանքման հավաքական ուժերի (ԱԱՀՈՒ) հատուկ նշանակության ուժերի կազմավորումների կազմում ընդգրկված հատուկ նշանակության ստորաբաժանումների մասնակցությամբ  "Կոբալտ-2024" պայմանական անվանումով հատուկ զորավարժության բացման արարողությունը: Հայաստանը զորավարժությանը չի մասնակցում։

ՀԱՊԿ մամուլի ծառայության համաձայն, եռօրյա զորավարժությանը մասնակցում են ներքին գործերի, ազգային անվտանգության մարմինների, ներքին զորքերի, հատուկ և հակաթմրամիջոցային ծառայությունների հատուկ ստորաբաժանումներ, ինչպես նաև վթարափրկարարական և հակահրդեհային կառույցներ Ռուսաստանից, Բելառուսից, Ղազախստանից, Տաջիկստանից և Ղրղզստանից: ՀԱՊԿ զորավարժության բացման հանդիսավոր արարողության պատվավոր հյուրերն էին մասնակից պետությունների, միջազգային կազմակերպությունների, Ռոսգվարդիայի ղեկավարության և Ռուսաստանի Դաշնության պետական իշխանության մարմինների ներկայացուցիչները:

Ողջունելով բացման մասնակիցներին և պատվավոր հյուրերին՝ ՀԱՊԿ գլխավոր քարտուղարի տեղակալ Վալերի Սեմերիկովը վստահություն է հայտնել, որ "Կոբալտ-2024" զորավարժությունը կանցկացվի բարձր մակարդակով և լուրջ ներդրում կունենա հավաքական անվտանգության ամրապնդման գործում:

"Այսօր ռազմաքաղաքական իրադրությունը, որը ձևավորվում է աշխարհում և մեր կազմակերպության պատասխանատվության գոտում, կարելի է բնութագրել, գորխնականում, երկու բառով՝ լարված և բարդ։ Ուստի, մենք ցանկացած պահի պատրաստ ենք հանդես գալ և մասնակցել ցանկացած տարածաշրջանում անվտանգության ապահովմանը", - նշել է Սեմերիկովը:

Բացելով զորավարժությունը՝ Ռուսաստանի Դաշնության ազգային գվարդիայի զորքերի դաշնային ծառայության Սիբիրի շրջանի հրամանատար, գեներալ-գնդապետ Նիկոլայ Մարկովն ընդգծել է, որ ՀԱՊԿ երկրները միավորված են իրենց պետությունների անվտանգության և ինքնիշխանության ապահովման նպատակով, ունեն ընդհանուր պատմություն, հանդիսանում են բարեկամության և համախմբման օրինակ: "Զորավարժության անցկացման ընթացքում միջգերատեսչական խմբավորումների կողմից կմշակվեն ուժերի և միջոցների կիրառման նոր ձևեր և եղանակներ, կփորձարկվեն սպառազինության, մարտական տեխնիկայի նոր նմուշներ, ինչպես նաև անօդաչու թռչող սարքերի, հետախուզության, ինժեներական ապահովման և ռոբոտատեխնիկայի միջոցների կիրառման մարտավարական հնարքները", - հավելել է Մարկովը:

"Կոբալտ-2024" զորավարժության ընթացքում տեղի կունենա լավագույն փորձի փոխանակում և հատուկ նշանակության ուժերի ստորաբաժանումների միջև փոխգործակցության հմտությունների կատարելագործում: Զորավարժության առաջին փուլում կանցկացվի հատուկ գործողության պլանավորման և անցկացման հրամանատարաշտաբային վարժանք, ինչպես նաև հատուկ ստորաբաժանումները կմշակեն ուսումնավարժական և կիրառական օպերատիվ - մարտական խնդիրներ: Երկրորդ փուլի շրջանակներում խաղարկվելու են հատուկ նշանակության ուժերի համախմբված օպերատիվ-մարտական խմբերի գործնական գործողությունները ՝ ըստ նշանակության խնդիրների լուծման: Ավիացիա եւ անօդաչու թռչող սարքեր կիրառելով ՝ հատուկջոկատայինները կմշակեն շենքի եւ տրանսպորտային միջոցի գրոհը, պատանդների ազատ արձակումը եւ զինյալների չեզոքացումը ՝ հաշվի առնելով ձեռք բերված մարտական փորձը: "Կոբալտ-2024"-ը կավարտվի օգոստոսի 16-ին ՝ արդյունքների ամփոփմամբ։