Ուրբաթ, 9 Օգոստոսի 2024 20:15

Արմինֆո. "Իրազեկ և պաշտպանված սպառող" հասարակական կազմակերպության նախագահ Բաբկեն Պիպոյանը, անդրադառնալով այսօր ՊԵԿ - ի տարածած հաղորդագրությանն այն մասին, որ Հայաստանում ընկերությունը տոննաներով թաղված փտած միս է վերադարձրել պահեստ, հարց է տալիս թե որքան ապրանք է հայտնաբերվել պահեստում, և արդյոք կա խմբաքանակ, որը վաճառքի է հանվել:

Այսօր ավելի վաղ ՊԵԿ-ը հաղորդագրություն էր տարածել այն մասին, որ օրեր առաջ Սննդամթերքի անվտանգության տեսչական մարմնի եզրակացությամբ "Արմեն-Համիկ եղբայրներ" ընկերության պահեստ են ժամանել ՊԵԿ աշխատակիցները և ոչնչացրել 13,5 տոննա փտած հավ: Փչացած միսը թաղվել է Ակունք գյուղում։ Շուտով հայտնի է դարձել, որ գործարարները չեն համակերպվել տեսչության որոշման հետ. նրանք տոննաներով փտած հավը հանել են հողի տակից և վերադարձրել պահեստ: Ընկերության սառնարանների խուզարկությամբ հայտնաբերվել են փտած հավի մսի մնացորդներ ՝ փաթեթավորման վրա հողի մասնիկներով ։

«Իհարկե, լավ է, որ ՊԵԿ-ին հաջողվել է կանխել դեպքը, այդուհանդերձ, հաղորդագրության մեջ նշվում է, որ նույն օրն իրականացված դիտարկումների արդյունքում է հայտնաբերվել, որ հողի տակից հանվել են ապրանքները, իսկ հաղորդագրության մյուս մասում բացակայում է տեղեկությունը, թե երբ են հողի տակից հանված ապրանքները հայտնաբերվել արդեն պահեստներում։

 

Պարզաբանման կարիք ունեն նաև այն հարցերը, թե ո՞րքան ապրանք է հայտնաբերվել պահեստում, և արդյո՞ք, առկա է խմբաքանակ, որը շուկայահանվել է։

Հարկ է նաև նկատել, որ համաձայն ՀՀ կառավարության թիվ 1060 որոշմամբ սահմանված վտանգավոր սննդամթերքի և վտանգավոր կերի օգտահանման ու ոչնչացման կարգի 5-րդ և 6-րդ կետերի՝ փորձաքննության բացասական արդյունքների հիման վրա ՀՀ սննդամթերքի անվտանգության տեսչական մարմինն արտադրանքը վտանգավոր է ճանաչում և ընդունում համապատասխան որոշում, և որոշման մեջ նշվում են նաև վտանգավոր արտադրանքի վտանգի աղբյուրի վերացման կամ օգտահանման կամ ոչնչացման եղանակներն ու պայմանները: Նույն որոշմամբ սահմանվում է, որ, եթե վտանգավոր արտադրանքը աղտոտված է (կոնտամինացված է), պարունակում է հիվանդությունների տարածման կամ մարդկանց կամ կենդանիների թունավորման, կամ շրջակա միջավայրի աղտոտման վտանգ, ապա ոչնչացումից առաջ կամ ոչնչացման գործընթացում այն վարակազերծվում է:

Չնայած նրան, որ ՊԵԿ հաղորդագրության մեջ առկա չէ տեղեկություն ապրանքը մաքսային ընթացակարգով ոչնչացնելու վերաբերյալ, այդուհանդերձ, քանի որ բացառված չէ նաև այդ տարբերակը, հարկ է նկատել, որ համաձայն ՀՀ կառավարության թիվ 1681 որոշման՝ ոչնչացման եղանակը սահմանում է լիազոր մարմինը։

Միաժամանակ, պարզաբանման կարիք ունեն նաև այն հարցերը, թե ի՞նչ ընթացակարգով է ոչնչացվել ապրանքն ու ոչնչացման ի՞նչ եղանակ է սահմանվել և ինչու՞», - ամփոփել է է փորձագետը։