ՀՀ ԱԺ պատգամավոր. Հայաստանը հետևողականորեն խորացնում է հարաբերությունները Եվրոպական միության անդամ երկրների հետ

Արմինֆո. Հատկապես վերջին ժամանակաշրջանում մենք հետեւողականորեն խորացնում ենք հարաբերությունները Եվրամիության անդամ երկրների հետ: Այդ մասին հայտարարե է ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահի տեղակալ Ռուստամ Բաքոյանը՝ ողջունելով Նաումբուրգի քաղաքապետ Արմին Մյուլլերի գլխավորած պատվիրակությանը խորհրդարանում: Բաքոյանը նա ընդգծել է, որ Հայաստանի համար առանցքային էր ՀՀ-ԵՄ վիզաների ազատականացման շուրջ երկխոսության մեկնարկը, ինչը, վստահաբար, նոր թափ կհաղորդի ԵՄ անդամ երկրների հետ Հայաստանի կայուն փոխգործակցությանը:

ԱԺ հաղորդագրության համաձայն, հանդիպումը տեղի է ունեցել օգոստոսի 6-ին, որին մասնակցել է նաեւ ՀՀ ԱԺ Հայաստան-Գերմանիա բարեկամական խմբի անդամ, «Հայաստան» խմբակցության պատգամավոր Լիլիթ Գալստյանը:

Ռուստամ Բաքոյանն անդրադարձել է Ադրբեջանի կողմից իրականացված էթնիկ զտումների հետեւանքով Լեռնային Ղարաբաղի հարյուր հազարից ավելի հայերի խախտված իրավունքներին ու դրանց պաշտպանությանը: Ներկայացնելով Լեռնային Ղարաբաղից բռնի տեղահանված մեր հայրենակիցների համար Կառավարության կողմից իրականացվող աջակցության ծրագրերը՝ հանձնաժողովի նախագահի տեղակալն ընդգծել է, որ երկարաժամկետ ծրագրերի իրականացման հարցում Հայաստանն ակնկալում է միջազգային գործընկերների աջակցությունը:

Լիլիթ Գալստյանը նշել է, որ 2020 թվականից Հայաստանի համար դժվարին ժամանակներ են, եւ նման ներկայացուցչական կազմով այցը Հայաստան վկայում է, որ հայերը միայնակ չեն: Նա բարձր է գնահատել Նաումբուրգի համագործակցությունն Արմավիր մարզի հետ: Խոսելով տարածաշրջանի անվտանգության, Հայաստանի առջեւ ծառացած մարտահրավերների մասին՝ պատգամավորը բարձրացրել է միջազգային գործընկերների աջակցության՝ Լեռնային Ղարաբաղից տեղահանված ժողովրդին հայրենի տուն վերադառնալու հարցը:

«Հայաստանը եւ Գերմանիան ունեն երկարամյա բարեկամական հարաբերություններ: Չափազանց կարեւորում եմ հայ-գերմանական հարաբերությունների դինամիկ զարգացումը եւ համագործակցությունը բոլոր ոլորտներում»,- ընդգծել է Ռուստամ Բաքոյանը:

Հանձնաժողովի նախագահի տեղակալը տեղեկացրել է, որ տարածաշրջանում երկարատեւ խաղաղության եւ կայունության հաստատման նպատակով Հայաստանի  կառավարությունը ներկայացրել է «Խաղաղության խաչմերուկ» նախագիծը: Նա արժեւորել է Հայաստան-Ադրբեջան հարաբերությունների կարգավորման, ինչպես նաեւ տարածաշրջանում խաղաղության ամրապնդման գործում Գերմանիայի դերակատարությունը:

Որպես ազգային փոքրամասնության ներկայացուցիչ՝ Ռուստամ Բաքոյանը նշել է, որ անցյալ տարվա հունվարին Գերմանիայի Բունդեսթագն ընդունել է 2014 թվականին Սինջարում տեղի ունեցած ցեղասպանությունը դատապարտող բանաձեւը՝ ընդգծելով, որ այն պատմական նշանակություն ունի եզդի ժողովրդի համար:

Նաումբուրգի քաղաքապետ Արմին Մյուլլերը, շնորհակալություն հայտնելով ջերմ ընդունելության համար, նշել է, որ երկու երկրների միջեւ փոխհամագործակցությունն առանցքային նշանակություն ունի: Նրա ներկայացմամբ Նաումբուրգն ակտիվ համագործակցում է Արմավիր քաղաքի հետ, փորձում են իրականացնել փորձի փոխանակման ծրագրեր մի շարք ոլորտներում:

Սաքսոնիա-Անհալթ երկրամասում ՀՀ պատվավոր հյուպատոս Միքայել Շմիդտը, տեղեկացնելով, որ Հայաստանում ունեցել են մի շարք հանդիպումներ, ընդգծել է, որ Սաքսոնիա-Անհալթ երկրամասը հայ ժողովրդի կողքին է: Նա կարեւորել է խաղաղության հաստատումն ու ամրապնդումը: