Երկուշաբթի, 5 Օգոստոսի 2024 10:46

Արմինֆո. Բարձրագույն դատական խորհուրդը (ԲԴԽ) մերժել է պաշտպանության նախկին նախարար Դավիթ Տոնոյանի գործը քննող հակակոռուպցիոն դատարանի դատավոր Վահե Դոլմազյանին կարգապահական պատասխանատվության ենթարկելու միջնորդությունը:

Հիշեցնենք, որ կարգապահական վարույթի նախաձեռնողն արդարադատության նախարար Գրիգոր Մինասյանն էր: 2023 թվականի օգոստոսին ՀՀ պաշտպանության նախկին նախարար Դավիթ Տոնոյանը պետք է ներկայանար Հայաստանի խորհրդարան՝ ցուցմունք տալու Լեռնային Ղարաբաղում 44-օրյա պատերազմի հանգամանքները քննող հանձնաժողովի լսումների շրջանակում։ Դատավոր Դոլմազյանը նրան թույլ էր տվել երկու ժամով հեռանալ մեկուսարանից։ ԱԺ գնալու ճանապարհին Տոնոյանը ուղեկցողներին խնդրել է թույլ տալ տեսակցել մորը ։ ՔԿՀ աշխատակիցները կապ էին հաստատել ղեկավարության հետ, որը Տոնոյանին թույլ էր տվել այցելել մորը։ Բացի այդ, Դոլմազյանը որոշում էր կայացրել, որ Տոնոյանը ճանապարհին ձեռնաշղթաներով չի լինելու։ Վերոնշյալ փաստերի լույսի ներքո Դոլմազյանի որոշումը դիտարկվել է որպես պաշտոնեական լիազորությունների չարաշահում. գերազանցվել է ուղևորության համար թույլատրելի ժամանակը, ինչպես նաև խախտվել են ուղեկցման կանոնները: Դավիթ Տոնոյանն անցնում է ռազմամթերքի, այդ թվում՝ հրթիռների մատակարարման գործընթացում չարաշահումների հետ կապված քրեական գործով։ Այս գործով մեղադրվում են նաև Հայաստանին սպառազինություն մատակարարող ընկերության ղեկավար Դավիթ Գալստյանը և զինված ուժերի գլխավոր շտաբի պետի նախկին տեղակալ Ստեփան Գալստյանը: Նախկին նախարարը կալանքի տակ է 2021 թվականի սեպտեմբերից։