Զախարովա. Հարավային Կովկասի ճակատագիրն ու ապագան պետք է որոշեն բացառապես տարածաշրջանի երկրներն ու հարևան գործընկեր պետությունները

Արմինֆո. Տարածաշրջանում կայուն և տևական խաղաղության հասնելու նպատակով Հայաստանի և Ադրբեջանի միջև խաղաղության պայմանագրի կնքման ակտիվ նախապատրաստման կարևորությունը հատուկ ընդգծվել է ՌԴ, ԱՀ և ՀՀ ղեկավարների 2022 թվականի հոկտեմբերի 31-ի հայտարարության մեջ։ Այդ մասին հուլիսի 24-ին ամենշաբաթյա ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ ի պատասխան Ադրբեջանի նախագահ Իլհամ Ալիեւի այն խոսքերը մեկնաբանելու խնդրանքին, թե՝ Երեւանի եւ Բաքվի միջեւ խաղաղության համաձայնագիրը համաձայնեցված է 80-90 տոկոսով։

Նրա խոսքով՝ երեք երկրների ղեկավարները նաեւ պայմանավորվել են շարունակել փոխընդունելի հանգուցալուծումների որոնումը՝ առկա մշակումների հիման վրա։ "Ռուսաստանի Դաշնությունը պարտավորվել է այսուհետեւ ևս ամեն կերպ աջակցել դրան", - մեջբերել է Զախարովան փաստաթուղթը:

Այդ առումով նա նշել է, որ Մոսկվայի մոտեցումը ոչ միայն կայուն է, այլեւ ամրագրված է այն փաստաթղթում, որի տակ դրված է Ռուսաստանի ստորագրությունը։

"Հասկանալի է, որ նման աջակցության ծավալներն ու ձևերը պետք է ընդունելի լինեն բանակցող կողմերից յուրաքանչյուրի համար։ Ձեռք բերված պայմանավորվածությունների հունով Մոսկվան բազմիցս ընդունել է խաղաղության պայմանագրի նախագծի շուրջ հայ-ադրբեջանական բանակցությունների փուլերը։ Պատրաստ ենք դա անել նաեւ առաջիկայում։ Երաշխավորում ենք առավել հարմարավետ պայմաններ երկու պատվիրակությունների աշխատանքի համար՝ իրենց համար նախընտրելի երկկողմ ձևաչափով", - ասել է նա։

Ընդ որում, ռուս դիվանագետը ողջունել է ղազախստանցի գործընկերների ջանքերն այդ ուղղությամբ ։ "Մենք նաև դիտարկում ենք մեր երկու դաշնակիցների միջև հավասարակշռված խաղաղության պայմանագրի կնքումը որպես անփոխարինելի նախապայման տարածաշրջանում անբաժանելի անվտանգության ճարտարապետության կառուցման, կայուն սոցիալ - տնտեսական զարգացման համար։ Մենք հուսով ենք, որ կողմերը շուտափույթ կհաղթահարեն մնացած տարաձայնությունները և հայ-ադրբեջանական հարաբերությունների կարգավորման այլ ուղղություններով հաջող առաջընթաց կարձանագրեն բարձր մակարդակի երկկողմ պայմանավորվածությունների հունով: Հարավային Կովկասի ճակատագիրն ու ապագան պետք է որոշեն բացառապես տարածաշրջանի երկրները և հարևան գործընկեր պետությունները ։ Եվ դրսից ոչ ոք մեր ընդհանուր տուն խաղաղությունի ու բարգավաճում, հաստատ, չի բերի: Դա արդեն ապացուցվել է դարերով", - ամփոփել է Զախարովան։

Անցած շաբաթվա վերջին Ադրբեջանի նախագահ Իլհամ Ալիևը, ելույթ ունենալով օկուպացված Շուշիում կայացած մեդիաֆորումում, հայտարարել էր, թե Երևանի և Բաքվի միջև խաղաղության համաձայնագիրը համաձայնեցված է 80-90 տոկոսով: Նա նաև հավելել էր, որ պայմանագրի կնքումն առանց Հայաստանի սահմանադրության փոփոխության անհնար է։