"Ուրբաթներ հանուն ապագայի". եվրոպացի քաղաքական գործիչներն Արցախում էթնիկ զտումների աղմուկի ներքո գազային նոր համաձայնագրեր են ստորագրել ադրբեջանցի բռնապետի հետ

Արմինֆո. "Ուրբաթներ հանուն ապագայի" (Fridays For Future) շարժումն արձագանքել է Ադրբեջանում ՄԱԿ-ի կլիմայական գագաթնաժողովի (COP29) անցկացմանը: Այսպես, 443 հազար հետևորդ ունեցող նախաձեռնությունն Instagram - ի իր էջում նշում է, որ Ադրբեջանն օգտագործել է բնապահպանական բողոքի ակցիաները որպես քողարկում Արցախի/Լեռնային Ղարաբաղի 9-ամսյա շրջափակումը սկսելու համար, որը հանգեցրել է բնիկ հայ բնակչության ամբողջական էթնիկ զտման և տարածաշրջանում հայկական մշակութային ժառանգության շարունակական ոչնչացման ու վերատիրացման:

"Մինչ այդ իրադարձությունները զարգանում էին միջազգային հանրության համար աննկատ, եվրոպացի քաղաքական գործիչները գազային նոր համաձայնագրեր էին ստորագրում ադրբեջանցի բռնապետի հետ, որի ընտանիքն իշխանության ղեկին է արդեն երեք տասնամյակ ։ Իր հոր իրավահաջորդը ՝ Իլհամ Ալիևը, ղեկավարում է երկիրը իր կնոջ հետ ՝ որպես փոխնախագահ։

Միջազգային նավթային ընկերությունները, ինչպիսիք են Total Energies - ը, Lukoil-ը և BP-ն, Ադրբեջանին տրամադրել են 35 միլիարդ դոլար՝ նավթի և գազի տեսքով, և նախատեսում են առաջիկա 10 տարիների ընթացքում ներդնել ևս 41 միլիարդ դոլար՝ գազի արդյունահանումը մեկ երրորդով ավելացնելու համար: Նավթային հիմնադրամներն աջակցում են Ալիևի ռեժիմի պատերազմական հանցագործություններին և Լոնդոնում իշխող ընտանիքի 700 միլիոնանոց սեփականությանը", - ասվում է նախաձեռնության հրապարակման մեջ։

Ընդ որում, ընդգծվում է, որ այդ քաղաքական գործիչներն ու ընկերությունները մեղսակից են ավտորիտար ռեժիմին, ցեղասպանության "կանաչ լվացմանը" ։ "Հանածո վառելիքը կազմում է Ադրբեջանի արտահանման ավելի քան 90 տոկոսը ։ Իսրայելական նավթի մոտ 40% - ը ներկրվում է Ադրբեջանից, ինչը սնուցում է պաղեստինցիների դեմ ռազմական մեքենան։ Փոխարենը՝ Ադրբեջանը Իսրայելից ստանում է իր զենքի 70 տոկոսը ՝ հայերի դեմ օգտագործելու համար", - այնուհետ նշում է "Ուրբաթները հանուն ապագայի" -ն։

Այս համատեքստում ավելացվում է, որ քաղաքացիական հասարակությունն Ադրբեջանում ենթարկվում է հսկայական ճնշումների, և, ազատության ինդեքսի համաձայն, Ադրբեջանը մշտապես դասվում է աշխարհի ամենաճնշող երկրների շարքին ։ "Այժմ Ադրբեջանը սպառնում է նոր պատերազմ սկսել Հայաստանի դեմ ՝ Հայաստանի մայրաքաղաքն անվանելով "Արևմտյան Ադրբեջան"", - ասվում է հայտարարության մեջ:

Ընդ որում, նախաձեռնությունը մատնանշում է Հայաստանի քաղաքացիական հասարակության առանցքային պահանջները ՄԱԿ-ի Կլիմայի գագաթնաժողովին: Մասնավորապես, բոլոր քաղբանտարկյալների (ինչպես ադրբեջանցի, այնպես էլ հայ) և ռազմագերիների ազատ արձակում, բնիկ հայ ժողովրդին Արցախ վերադարձի և անվտանգության իրավունքի երաշխավորումը միջազգային խաղաղապահների տեղակայման միջոցով, բուն Հայաստանի անվտանգության և խաղաղության համաձայնագրի երաշխավորումը, 2020 թվականի պատերազմի ընթացքում և դրանից հետո գրավված հողերի վերադարձ Հայաստանի Հանրապետությանը։

Fridays for Future-ը երիտասարդների կողմից կազմակերպված և ղեկավարվող շարժում է, որը սկսվել է 2018թ. օգոստոսին՝ այն բանից հետո, երբ 15-ամյա Գրետա Թունբերգը և այլ երիտասարդ ակտիվիստներ երեք շաբաթվա ընթացքում ամեն ուսումնական օր նստում էին Շվեդիայի խորհրդարանի առջև ՝ բողոքելով կլիմայի ճգնաժամի դեմ պայքարի գործողությունների բացակայության դեմ: Նա իր գործողությունները տեղադրեց Instagram-ում և Twitter-ում, և շուտով այն վարակիչ դարձավ:

Հաջորդ տարի "դպրոցական գործադուլը կլիմայի համար" դարձավ համաշխարհային շարժում, որին միացան շուրջ 4 միլիոն աշակերտներ 150 երկրներում: 2019 թվականի հունիսին Գրետան ավարտեց դպրոցը՝ նշանավորելով իր դպրոցական բողոքի ավարտը։ Բայց երիտասարդ ակտիվիստի ժառանգությունը շարունակում է ապրել. ամեն ուրբաթ ողջ աշխարհում հարյուրավոր ցույցեր են անցկացվում։ Դա դպրոցականների և ուսանողների միջազգային հասարակական շարժում է, որի մասնակիցները քաղաքական գործիչներից պահանջում են "արագ և վճռական գործողություններ" գլոբալ տաքացման դեմ պայքարում: