Թերթ. Արտոնյալ վարկի շրջանակում Ռուսաստանն «Իսկանդեր Մ» հրթիռային համալիրներ կմատակարարի Հայաստան

 Հայաստանին հատկացված  200 մլն դոլար արտոնյալ վարկի շրջանակում Ռուսաստանը Հայաստան կառաքի «Իսկանդեր Մ» օպերատիվ տակտիկական հրթիռային համալիրներ,  որոնք համարվում են ռուսական հրթիռաշինության լավագույն մշակումներից և ունեն բավականին բարձր տեխնիկական բնութագրեր, հաղորդում է  «Ժամանակ» թերթը` վկայակոչելով ՀՀԿ մոտ կանգնած աղբյուր:

Ավելի վաղ ԱրմԻնֆոն, վկայակոչելով «Թուրան» գործակալությունը, հաղորդել էր, որ արտոնյալ վարկի շրջանակում Հայաստան կառաքվեն սպառազինություններ, որոնք ի զորու են արդյունավետորեն լուծել ռազմավարական հարցեր. հակաօդային պաշտպանության ապահովում ռազմական գործողությունների գոտում, տարբեր մակարդակի մարտավարական հարվածային խմբավորումների համալրում, հատուկ շարժունակ ստորաբաժանումների ստեղծում: «Այդ տեխնիկական խնդիրների լուծման և ապահովման համար նախատեսվում է Հայաստան մատակարարել «Պանցիր-Էս» զենիթային հրթիռաթնդանոթային համալիր, «Տիգր», «ԲՏՌ-80» զրահամեքենաներ, կապի միջոցներ, հակատանկային հրթիռային համալիրներ, դյուրակիր զենիթահրթիռային համալիրներ և այլն», - հաղորդել են «Թուրանի» աղբյուրները: Եղած տեղեկությունների համաձայն, այդ սպառազինությունների մի մասն արդեն առաքվել է: Ի պատասխան ԱրմԻնֆո-ի խնդրանքին` ՀՀ պաշտպանության նախարարությունում ոչ հաստատել և ոչ էլ հերքել են այս և այլ ռուսական սպառազինությունների Հայաստան մատակարարման վերաբերյալ տեղեկատվությունը` հորդորելով սպասել գործընթացի սկսվելուն:

Մինչդեռ ՀՀԿ-ում ԱրմԻնֆո-ի բարձրաստիճան աղբյուրները հաղորդել են, թե Ռուսաստանի արտոնյալ վարկի մի մասը կուղղորդվի ոչ ըստ նշանակության, այսինքն` ոչ թե սպառազինության ձեռք բերմանը, այլ էներգրասակագների բարձրացման սուբսիդավորմանը:

Նշենք, որ հունիսի 26-ին հայտնի դարձավ, որ Ռուսաստանը Հայաստանին 200 մլն դոլարի արտոնյալ վարկ կտրամադի արդիական սպառազինություն ձեռք բերելու համար: Այդ մասին համաձայնություն էր ձեռք բերվել ՌԴ տրանսպորտի նախարար, հայ-ռուսական հանձնաժողովի համանախագահ Մաքսիմ Սոկոլովի գլխավորած պատվիրակության հետ ՀՀ նախագահ Սերժ Սարգսյանի հանդիպման ընթացքում:  «Համաձայնագիրը թույլ կտա զգալիորեն ընդլայնել Հայաստանի ԶՈՒ զինանոցի արդիական սպառազինությունների տեսականին», - ասվում էր ՀՀ նախագահի աշխատակազմի հաղորդագրությունում: Նախատեսվում է, որ Հայաստանի խորհրդարանը հունիսի 2-ին կվավերացնի այդ համաձայնագիրը: Հիշեցնենք, որ ավելի վաղ Հայաստանը բազմիցս մտահոգություն էր հայտնել Ադրբեջանին ռուսական սպառազինության  վաճառքի առնչությամբ: Մասնավորապես, նախագահ Սերժ Սարգսյանը հայտարարել էր, թե հարցը ոչ այնքան զենքի վաճառքն է, որքան այն հանգամանքը, որ սահմանին կանգնած հայ զինվորը գիտակցում է, որ իր ուղղությամբ կրակում են ռուսական զենքից: Ի պատասխան` ռուսական կողմը հայտարարել էր, թե զենքի վաճառքի հարցում Մոսկվան կպահպանի կողմերի միջև հավասարությունը: