Ամերիկագետ. Բայդենի հեռանալուց հետո Թրամփը աշխարհի կեսի դեմ է կռիվ տալու

Արմինֆո. Հայ քաղաքագետ, ամերիկագետ Սուրեն Սարգսյանը վստահ է, որ ԱՄՆ գործող նախագահ Ջո Բայդենը շատ իմաստուն քայլ արեց՝ դուրս գալով նախագահական մրցապայքարից: Այդ մասին նա գրել է իր «Ֆեյսբուքի» իր էջում, արձագանքելով այն հաղորդագրություններին, որ Ջո Բայդենը հանել է իր թեկնածությունը նախագահական մրցապայքարից և պաշտպանել է Քամալա Հարիսի թեկնածությունը:

«Դա արդար էր սեփական կուսակցության և ամերիկացի ժողովրդի հանդեպ: Բայդենն իրականում ծանրակշիռ քաղաքական գործիչ է, ով լուրջ ճանապարհ ունի անցած: Եթե նա ավելի երիտասարդ տարիքում դառնար նախագահ, նա ԱՄՆ պատմություն լավագույն և ամենասիրված նախագահներից մեկը կարող էր լինել:

Անձամբ կարծում եմ, որ 2016-ին Հիլարի Քլինթոնի թեկնածությունը դեմոկրատների ամենից սխալ հաշվարկված քայլերից էր և, եթե առաջադրվեր նույն Բայդենը, նա Թրամփին հաղթելու ավելի մեծ շանսեր կունենար: Թրամփը չհաղթեց, Հիլարին պարտվեց: Այդ դեպքում Բայդենի թողած ժառանգությունն էապես այլ կլիներ, նրան այլկերպ կհիշեին: Ի դեպ Սենատոր եղած տարիներին նա Հայաստանի լավագույն բարեկամներից է եղել:

Ինչ վերաբերում է նոյեմբերին կայանալիք ընտրություններին, ապա պետք է նշեմ, որ Հարիսի թեկնածությունը նույնպես լուրջ գլխացավանք է Թրամփի համար: Նրա շուրջ համախմբվելու է ամբողջ լիբերալ թևը և դա բավականին ուժեղ ալիք է ստեղծելու: Նրան աջակցելու է ողջ ՆԱՏՕ-ն և ողջ ԵՄ-ն: Իրականում Թրամփը աշխարհի կեսի դեմ է կռիվ տալու:  Իսկ Քամալա Հարիսն իր 70-80 միլիոնանոց ձայները «քնած» ունի», - գրել է քաղաքագետը:

ԱՄՆ-ում նախագահական ընտրությունները տեղի կունենան նոյեմբերի 5-ին: Ենթադրվում էր, որ Դեմոկրատական կուսակցությունը կներկայացնի Բայդենը, բայց հունիսի 27-ին Հանրապետական Դոնալդ Թրամփի հետ նախընտրական հեռուստաբանավեճում Բայդենի ձախողված ելույթից հետո դեմոկրատները սկսեցին նրան կոչ անել հրաժարվել բարձրագույն պետական պաշտոնը պահպանելու հետագա փորձերից ։ Հուլիսի 21-ին Բայդենը հայտարարեց, որ դուրս է գալիս նախագահական մրցավազքից: Ընդ որում, նա իր աջակցությունն է հայտնել իր փոխնախագահ Քամալա Հարիսին ։