Անտոն Դոլին. Այսօր Ռուսաստանում նկարիչները բողոքի իրական հնարավորություն չունեն

Արմինֆո.Ռուսաստանում նկարիչներն այսօր բողոքի իրական հնարավորություն չունեն ։ Այդ մասին հայտարարել է ռուս հայտնի կինոքննադատ, լրագրող, և գրող Անտոն Դոլինը՝ Երևանում "Ոսկե ծիրան" կինոփառատոնի շրջանակում իրանցի ռեժիսոր Ջաֆար Փանահիի հետ հանդիպման ժամանակ։

Այդ առնչությամբ նա պատմել է, որ օրեր առաջ Ռուսաստանում երկու երիտասարդ կանայք՝ ռեժիսոր Ժենյա Բերկովիչը և դրամատուրգ ու սցենարիստ Սվետա Պետրիչուկը դատապարտվել են 6 տարվա ազատազրկման՝ "ահաբեկչությունն արդարացնելու" համար: Պատճառը աղջիկների բեմադրած "Ֆինիստ պարզ բազե" պիեսն էր։ Կինոքննադատի խոսքով ՝ դա բացարձակ անհեթեթություն է: "Որովհետև այդ ներկայացումը, որը նման դատավճռի պատճառ է դարձել, իրականում, ահաբեկչության դեմ է", - վստահեցրել է նա: Բերկովիչի և Պետրիչուկի այս աշխատանքը, ինչպես նշել է Դոլինը, պատճառաբանություն է այն մասին, թե ինչու են պիեսի հերոսուհիները ցանկանում ամուսնանալ արմատական իսլամիստների հետ ։ "Մենք պետք է այդ հարցը բարձրացնենք Ռուսաստանի սահմաններից դուրս", - եզրափակել է կինոքննադատը:

Հիշեցնենք, որ հուլիսի 9-ին Մոսկվայի դատարանը Ժենյա Բերկովիչին և Սվետլանա Պետրիչուկին դատապարտել էր 6 տարվա ազատազրկման "Ֆինիստ յասնի սոկոլ" ներկայացման համար, որը պատմում է ռուս կանանց մասին, ովքեր փախչում են Սիրիա ՝ ահաբեկիչների հետ ամուսնանալու համար։ Բեմադրությունը հիմնված է Սիրիա մեկնող կանանց նկատմամբ քրեական գործերի նյութերի վրա, որոնց հետո դատում էին "ահաբեկչությանն օժանդակելու"համար ։ Պիեսի հիմքում ընկած էին հարցաքննությունների և դատավճիռների իրական նյութերը։ 2023 թվականի մայիսին այդ ներկայացման պատճառով քրեական գործ է հարուցվել, որում ասվում է, որ պիեսը պարունակում է "իսլամիզմի և ջիհադիզմի" գաղափարախոսության նշաններ, ինչպես նաև՝ "արմատական ֆեմինիզմ և պայքար Ռուսաստանի անդրոկենտրոն հասարակական կառուցվածքի դեմ"։