Քևին Սփեյսին՝ Երևանում երկրպագուների հետ հանդիպմանը. Սա շատ հուզիչ է և մեծ նշանակություն ունի ինձ համար

Արմինֆո.Աշխարհահռչակ և կինոյի ու թատրոնի ամերիկացի անվանի դերասան Քևին Սփեյսին այս օրերին Հայաստանում է՝ որպես "Ոսկե ծիրան" 21-րդ միջազգային կինոփառատոնի պատվավոր հյուր:

Կինոփառատոնի բացման օրը "Ոսկե ծիրան"-ի տնօրեն և գեղարվեստական ղեկավար Կարեն Ավետիսյանը Սփեյսիին հանձնել է "Փարաջանովի թալեր" մրցանակը, որն ամեն տարի շնորհվում է կինոյի գործիչներին ՝ համաշխարհային կինոյում ունեցած նշանակալի ավանդի համար: Երեկ դերասանը վարպետության դաս է անցկացրել հայ ուսանողների հետ, իսկ այսօր Կինոյի տան մեծ դահլիճում տեղի է ունեցել հանդիպում նրա արվեստի երկրպագուների հետ: Դահլիճը լեփ-լեցուն էր, նրանք, ովքեր  տեղ չունեին, տեղավորվել էին միջանցքներում, աստիճաններին և բեմի մոտ, իսկ ոմանք, նույնիսկ, երկուսով մեկ աթոռին էին տեղավորվել՝ տեսնելու և լսելու կենդանի լեգենդին:

Հանդիպումն անցել է բավականին ջերմ մթնոլորտում: Դերասանին դիմավորել են երկար ծափահարություններով։ Սփեյսին անկաշկանդ շփվել է երևանյան հանդիսատեսի հետ, շատ է կատակել և պատասխանել է հետաքրքրող հարցերին: Բեմ դուրս գալով ՝ նա նշել է, որ իր համար անչափ հաճելի է նման մեծաթիվ լսարան տեսնելը ։ "Դա հուզիչ է և ինձ համար մեծ նշանակություն ունի", - անմիջապես ասել է դերասանը: Հանդիպման ընթացքում Սփեյսին կիսվել է լավ լուրով, որ հնարավոր է, շուտով կյանքի կոչվեն որոշ կինոմրցանակներ: Դերասանը որևէ մանրամասներ չի հայտնել, սակայն նշել է, որ վերջին 4-5 տարիների ընթացքում շփվել է հրաշալի կինոգործիչների հետ, որոնք առաջարկել են իրեն միասին աշխատել: "Ես ոգևորված եմ նախագծերով, որոնք կարող են կյանքի կոչվել, և, իհարկե, ես դա շատ եմ գնահատում, դա հպարտության առիթ է", - ասել է նա:

Այն հարցին, թե ինչն է կարևոր դերասանական մասնագիտության համար, Սփեյսին հետևյալ կերպ է պատասխանել. "Դերասանը պետք է ձայն ունենա, որպեսզի այն լսելիս դահլիճում բոլորը հետ նայեն և հարցնեն ՝ հիմա ով էր խոսում։ Դերասանը պետք է ունենա խոսելու ունակություն և չկորցնի իր ձայնը>: Ընդ որում, նա նշել է, որ դերասանական կարիերայում անհաջողությունների դեպքում պետք չէ մտածել արդյունքի մասին, այստեղ առաջին պլան պետք է դուրս գան գործադրված ջանքերը:

Սփեյսին կիսվել է նաև մանկության հուզիչ պատմությամբ, որը նրան ինչ-որ կերպ դուրս է բերել դերասանական ուղի: Նա պատմել է, որ մանուկ հասակում մայրն իրեն հաճախ է կինո և թատրոն տարել, և ինքը դիտել է, թե ինչպես է նա ծիծաղում Ջ.Ստյուարտի, Ք.Հեփբյորնի մասնակցությամբ ֆիլմերի վրա։ Տուն հասնելուն պես փոքրիկ Քևինը սկսել է նմանակել դերասաններին, որոնց նրանք տեսնում էին էկրանին կամ թատրոնի բեմում, ինչը նույնպես ծիծաղեցնում էր Սփեյսիի մայրիկին: <Եվ ես լսում էի, թե ինչպես է մայրս ծիծաղում.>, - ասել է դերասանը՝ հուզվելով:

Հանդիպման ընթացքում լրատվամիջոցների ներկայացուցիչներն անդրադարձել են նաև Հայաստանի Ամերիկյան համալսարանում հոլիվուդյան դերասանի հետ հանդիպումը չեղարկելու հարցին, ինչի պատճառով վերջինս տեղի է ունեցել Կինոյի տանը: Հարցին, թե ինչպես է Սփեյսին վերաբերվում նման որոշմանը, նա միայն ասել է, որ այդ մասին ոչինչ չգիտի և եկել է այստեղ անելու այն, ինչ պետք է անի: "Ինձ հրավիրել են ձեր երկիր ՝ որպես պատվավոր հյուր ներկա գտնվելու կինոփառատոնին, և ինձ համար մեծ պատիվ է գտնվել այստեղ", - ասել է դերասանը, միաժամանակ նշելով, որ երեկվա վարպետության դասը հայ ուսանողների հետ ուղղակի հրաշալի է անցել:

Նշենք, որ Քևին Սփեյսին "Օսկար" կինոմրցանակի կրկնակի դափնեկիր է, "Ոսկե գլոբուս" - ի դափնեկիր "Հեռուստասերիալի լավագույն դերասան" անվանակարգում, ինչպես նաև Լորենս Օլիվիեի մրցանակի դափնեկիր ՝ լավագույն թատերական դերի համար: Նա իր կարիերան սկսել է թատերական բեմից, իսկ 1995 թվականին կինոքննադատների կողմից արժանացել է հավանության ՝ "Յոթ " ֆիլմում Ջոն Դուի դերի համար։ Քևին Սփեյսիի մինչ օրս ամենահաջողված աշխատանքներից են ՝ <Կասկածելի դեմքեր>, <Ամերիկյան գեղեցկություն>, <Դեւիդ Գեյլի կյանքը>, <Սուպերմենի վերադարձը > և <Քարտերի տուն > սերիալը: Վերջին 40 տարիների ընթացքում Սփեյսին նկարահանվել է այնպիսի աստղերի հետ, ինչպիսիք են Բրեդ Փիթը, Մարտին Ֆրիմանը, Ալ Պաչինոն, Քիմ Բեյսինջերը, Ռասել Քրոուն, Սեմ Ռոքուելը, Գվինեթ Փելթրոուն, Ջեֆ Բրիջեսը, Ջեք Լեմոնը, Անետ Բենինգը, համագործակցել է ամերիկացի եւ բրիտանացի լավագույն ռեժիսորների հետ, որոնց թվում են Դեւիդ Ֆինչերը, Ալան Փարքերը, Սեմ Մենդեսը, Էդգար Ռայթը, Քերթիս Հանսոնը, Ջոն Լասեթերը, Դանկան Ջոնսը, Մայք Նիքոլսը, Բրայան Սինգերը եւ այլոք:

Հիշեցնենք, որ այս տարի "Ոսկե ծիրանն" անցկացվում է հուլիսի 7-14 - ը և նվիրված է Սերգեյ Փարաջանովի և Շառլ Ազնավուրի 100-ամյա հոբելյաններին: Ավանդույթի համաձայն, "Ոսկե ծիրանի" շրջանակներում երևանյան հանդիսատեսը հնարավորություն կունենա դիտելու մրցութային ֆիլմեր աշխարհի տարբեր երկրներից, ինչպես նաև ամենահեղինակավոր կինոփառատոններից (Կաննի, Բեռլինի և այլն): Կինոդիտումներն անցկացվում են Կինոյի տանը և "Մոսկվա" կինոթատրոնում:-