Սահմանադրական դատարանը կքննի հավաքների մասնակիցների "նյութական շահագրգռվածության" մասին ՀՀ քրեական օրենսգրքի հոդվածի՝ հիմնական օրենքին համապատասխանության մասին գործը

Արմինֆո. Երեկ ՀՀ Սահմանադրական դատարանը որոշում է կայացրել վարույթ սկսել ՀՀ Քրեական օրենսգրքի 236.2 հոդվածի ՀՀ Սահմանադրությանը համապատասխանության վերաբերյալ։ Այդ մասին հաղորդել է հասարակական-քաղաքական գործիչ, "Հայաքվե" նախաձեռնության համակարգող Ավետիք Չալաբյանը:

Նա հիշեցնում է, որ 2022 թ․ այդ անհեթեթ և գաղտագողի "թխված" հոդվածի հիման վրա է իր դեմ շինծու քրեական գործ էր հարուցվել (և մինչև հիմա էլ ընթանում է), և իրենք ի սկզբանե դատարանում վիճարկել են ոչ միայն իր մեղքի առկայությունն այս գործով, այլև քրեական գործ հարուցելու բուն օրինականությունը և մեղադրանքի համապատասխանությունը ՀՀ Սահմանադրությանը։

«Հիմա, երբ այս նույն հոդվածի հիման վրա մի շարք նոր գործեր են հարուցվել տարբեր ընդդիմադիր գործիչների դեմ, հարցը հավելյալ հնչեղություն է ստացել, և ԱԺ ընդդիմությունը պաշտոնապես դիմել է Սահմանադրական դատարան։

Նրանից հետո, երբ նույնիսկ Եվրոպական Խորհրդի Խորհրդարանական Վեհաժողովը իր զեկույցում անդրադարձավ այս հարցին, և մանտնանշեց 236.2 հոդվածի ոչ իրավաչափությունը և հակասությունը Խաղաղ հավաքների անցկացման Եվրոպական ուղեցույցին, ՀՀ Սահմանադրական դատարանն այս հարցն ընդունեց քննության։ Շնորհակալ եմ բոլոր այն գործընկերներին, որոնց հետևողական աշխատանքն ու պայքարը հանգեցրեց այս կարևոր հանգրվանին, սակայն դեռ մեծ աշխատանք է սպասվում առջևում՝ այս հարցին իրավական և արդարացի լուծում տալու համար», - գրել է Չալաբյանը՝ «Ֆեյսբուքի» իր էջում