Կարեն Ավետիսյան. Քևին Սփեյսիի այցը Հայաստան պայմանավորված է նրա պրոֆեսիոնալիզմով

Արմինֆո.Մեկ շաբաթ առաջ "Ոսկե ծիրան" կինոփառատոնը հայտարարել էր, որ այս տարվա կինոփառատոնի պատվավոր հյուրն է լինելու ամերիկացի նշանավոր դերասան, "Օսկար" կինոմրցանակի դափնեկիր Քևին Սփեյսին: Նման լուրը վրդովմունք, իսկ որոշ դեպքերում, նաև կոշտ քննադատություն է առաջացրել հայ հասարակության որոշ շերտերում, իսկ շատերը, ընդհակառակը, աջակցել են կինոփառատոնի ղեկավարության որոշմանը:

Այդ առնչությամբ "Ոսկե ծիրան" կինոփառատոնի գեղարվեստական ղեկավար և տնօրեն Կարեն Ավետիսյանը հուլիսի 3-ին տեղի ունեցած մամուլի ասուլիսի ժամանակ հայտարարել է, որ Սփեյսիի այցը Հայաստան պայմանավորված է դերասանի պրոֆեսիոնալիզմով, այլ ոչ թե նրա ՝ որպես մարդու, անձնական բնութագրով: Այս առումով նա նշել է, որ կինոփառատոնի կազմակերպիչները նման մոտեցում են ցուցաբերում բոլոր անվանի հյուրերի նկատմամբ ։ "Եվ այդ հարթությունը (մարդկային-խմբ.) մեր դատապարտման առարկան չէ", - ասել է Ավետիսյանը։

Միաժամանակ, նա ընդգծել է, որ կինոփառատոնի կազմակերպիչները հարգանքով են վերաբերվում տարբեր շարժումներին, անձանց, որոնք դեմ են բռնությանը: Սակայն անտեղի է անվանել այն մեղադրանքը, թե Սփեյսիին հրավիրելով, կինոփառատոնը խրախուսում է բռնությունը։

Նշելով, որ նման հարցերով որոշումներ կայացնելու իրավասություն ունեցող դատական ատյաններ կան, "Ոսկե ծիրանի" տնօրենը տեղեկացրել է, որ կազմակերպիչներն ուշադրությամբ հետևել են ԱՄՆ-ում և Մեծ Բրիտանիայում Սփեյսիի գործով բարձրագույն դատական ատյանների որոշմանը: Եվ երկու դեպքում էլ դատարանն արդարացրել է դերասանին։ Բացի այդ, Ավետիսյանը նշել է, որ Քևին Սփեյսին հրապարակավ զղջացել է, բայց ոչ թե ծանր հանցագործությունների համար, այլ՝ էթիկական նկատառումներով ։ Նա հիշեցրել է նաև, որ հայտնիներին հոտնկայս, 6 րոպեանոց ծափահարություններով դիմավորել են Օսկֆորդի համալսարանում, որն աշխարհում վերջին կառույցը չէ, իսկ հայտնի դերասանները, այդ թվում ՝ Շերոն Սթոունը, Շայա Լաբաֆը և Լիամ Նիսոնը բաց նամակներ են գրել ՝ խնդրելով Սփեյսիին վերադարձնել Հոլիվուդ: Բացի այդ, օսկարակիր ռեժիսոր Փոլ Շրյոդերը Քևին Սփեյսիին տեսնում է Ֆրենկ Սինատրայի մասին իր նոր ինքնակենսագրական ֆիլմում գլխավոր դերի համար: "Մենք այստեղ ինքնախաբեությամբ չենք զբաղվում, սա դիսկուրս է լայն քննարկումների համար, և կարևոր է, որ մենք էլ անմասն չենք մնացել, որ Հայաստանը կղզիական տրամաբանության պետություն չէ՝ հեռու ողջ աշխարհից, որտեղ մարդիկ տեղյակ չեն, թե ինչ է կատարվում", - ասել է նա:

Միևնույն ժամանակ, Ավետիսյանն անարդար է անվանել մեղադրանքները "Ոսկե ծիրանի" հասցեին, որ կինոփառատոնը ցանկանում է գովազդվել ամեն գնով, այդ թվում ՝ սև փիարի դիմելով՝ Սփեյսիին հրավիրելով։

Եթե կինոփառատոնն առաջին անգամ անցկացվեր, ապա նման մեղադրանքները, ինչպես նշել է գեղարվեստական ղեկավարը, լիովին լեգիտիմ կլինեին, սակայն ունենալով 20 տարի փառատոնին մասնակցած աստղային անունների  "պանթեոն" ՝ Քեւին Սփեյսին այդ համատեքստում հերթական հյուրն է:

Հատկանշական է, որ "Ոսկե ծիրանի" շրջանակներում տեղի կունենա "Դեյվիդ Գեյլի կյանքը" ֆիլմի ցուցադրությունը (ռեժ. Ալան Փարքեր, 2003թ.)՝ Քևին Սփեյսիի մասնակցությամբ, որտեղ ֆիլմի հերոսը կանգնում է դատարանի առջև։ Ավետիսյանը նկատել է, որ տվյալ դեպքում իրական համատեքստը հանգավորվում է ֆիլմի հետ ։ Խոսելով "Ոսկե ծիրանի" ժամանակ այդ ժապավենը ցուցադրելու որոշման մասին ՝ կինոփառատոնի ղեկավարն ընդգծել է. "Դրա իրավունքը մենք ունենք։ Սա գեղարվեստական դաշտի որոշում է, ոչ թե՝ իրավական և բարոյական>։

Հիշեցնենք, որ Քևին Սփեյսին մեղադրվում էր սեռական բռնության գործերով ։ 2023 թվականի հուլիսին Լոնդոնի դատարանը Սփեյսիին անմեղ էր ճանաչել սեռական հանցագործությունների գործով։ Սա դատարանում նրա արդեն երկրորդ հաղթանակն էր այն բանից հետո, երբ 2022 թվականին ԱՄՆ-ում դատարանն արդարացրեց դերասան Էնթոնի Ռեփի մեղադրանքների գործով դերասանին ։ Նշենք, որ Սփեյսին "Օսկար" կինոմրցանակի կրկնակի դափնեկիր է, "Ոսկե գլոբուս" - ի դափնեկիր "Հեռուստասերիալի լավագույն դերասան" անվանակարգում, ինչպես նաև Լորենս Օլիվիեի (Laurence Olivier Award) մրցանակի ՝ լավագույն թատերական դերի համար: Իր կարիերան սկսել է թատերական բեմից, իսկ 1995 թվականին արժանացել է կինոքննադատների հավանությանը ՝ " Յոթ " ֆիլմում Ջոն Դոյի դերի համար։ Քևին Սփեյսիի մինչ օրս ամենահաջող աշխատանքներից են ՝ < Կասկածելի դեմքեր>, < Ամերիկյան գեղեցկություն>, < Դեյվիդ Գեյլի կյանքը>, < Սուպերմենի վերադարձը > և <Քարտերի տուն > սերիալը: Վերջին 40 տարիների ընթացքում Սփեյսին նկարահանվել է այնպիսի աստղերի հետ, ինչպիսիք են Բրեդ Փիթը, Մարտին Ֆրիմանը, Ալ Պաչինոն, Քիմ Բեյսինջերը, Ռասել Քրոուն, Սեմ Ռոքուելը, Գվինեթ Փելթրոուն, Ջեֆ Բրիջեսը, Ջեք Լեմոնը, Անետ Բենինգը, համագործակցել է ամերիկացի եւ բրիտանացի լավագույն ռեժիսորների հետ, որոնց թվում են Դեւիդ Ֆինչերը, Ալան Փարքերը, Սեմ Մենդեսը, Էդգար Ռայթը, Քերթիս Հանսոնը, Ջոն Լասեթերը, Դանկան Ջոնսը, Մայք Նիքոլսը, Բրայան Սինգերը եւ այլոք: