Սերգեյ Փարաջանովի մասին "Ես վրեժխնդիր կլինեմ աշխարհից սիրո միջոցով" վավերագրական ֆիլմը կցուցադրվի "Ոսկե ծիրան" կինոփառատոնում

Արմինֆո. "Ոսկե ծիրան" միջազգային կինոփառատոնում, որն այս տարի տեղի կունենա հուլիսի 7-14-ը Երևանում, տեղի կունենա Զառա Ջյանի՝ Սերգեյ Փարաջանովի մասին պատմող "Ես վրեժխնդիր կլինեմ աշխարհից սիրո միջոցով" վավերագրական ֆիլմի հատուկ ցուցադրությունը՝ հուլիսի 8-ին Կինոյի տան մեծ դահլիճում: Պատվավոր հյուրերն են ռեժիսորներ Ատոմ Էգոյանը և Տարսեմ Սինգհը, ովքեր նույնպես նկարահանվել են ֆիլմում:

Ֆիլմը սկսվում է հեղինակի ՝ ժամանակակից ռեժիսորի որոշումից. լքել այն երկիրը, որտեղ նա ապրում է՝ տեղի ունեցող դրամատիկ իրադարձություններ պատճառով, և վերադառնալ հայրենիք, Հայաստան ՝ հասկանալու համար, թե ինչպես շարունակել ապրել: Սերգեյ Փարաջանովի թանգարանը ոգեշնչման վայր է դառնում ռեժիսորի համար։ Ֆիլմում անցյալը հանդիպում է ներկային: Փարաջանովի կյանքի և ստեղծագործության միջոցով և հենց նրա հետ միասին կուսումնասիրվեն այնպիսի հարցեր, ինչպիսիք են մարդու ազատության թեման ոչ ազատ պայմաններում,  ինչպես են փշալարերն ու պատերազմներն ազդում մշակույթի և մշակույթի գործիչների վրա, որն է գուցե միակ ճիշտ ընտրությունը տոկսիկ իրականության պայմաններում և այլն:

 Ֆիլմը նկարահանվել է Ֆրանսիայի հետ համատեղ արտադրությամբ՝ Մեծ Բրիտանիայի մասնակցությամբ ։ Պրոդյուսերներն են Անի Ոսկանյանը և Զառա Ջյանը, ֆիլմի ֆրանսիացի համապրոդյուսերը ՝ Ստեֆան Ժուրդենը: Կադրերի հեղինակը կանադահայ կինոօպերատոր Նորայր Կասպերն է: Նախագծին աջակցել են Հայաստանի ազգային կինոկենտրոնը, Կրթության, գիտության, մշակույթի և սպորտի նախարարությունը, ինչպես նաև ֆրանսիական CNC և Cine+ընկերությունները:

Նկարահանումները տեղի են ունեցել Հայաստանում, Սերբիայում, Լատվիայում և Գերմանիայում, որտեղ նկարահանվել են հարցազրույցներ Էմիր Կուստուրիցայի (հարավսլավացի և սերբ կինոռեժիսոր), Չուլպան Խամատովայի (ռուս թատրոնի և կինոյի դերասանուհի), Լորա Գուերայի (իտալացի բանաստեղծ և գրող Տոնինո Գուերայի կինը), Ատոմ Էգոյանի (կանադացի կինոռեժիսոր), Արտավազդ Փելեշյանի (հայ կինոռեժիսոր), Ժոել Շապրոնի (ֆրանսիացի կինոգետ), Ալի Համրաևի (ուզբեկ կինոռեժիսոր և սցենարիստ) և Լևոն Աբրահամյանի (Հայ նկարիչ և ազգագրագետ) հետ: Հնդիկ կինոռեժիսոր Տարսեմ Սինգհը Երևան է ժամանել հատուկ նկարահանումներին մասնակցելու համար:

Հիշեցնենք, որ այս տարի "Ոսկե ծիրանը" նվիրվելու է Սերգեյ Փարաջանովի և Շառլ Ազնավուրի 100-ամյակներին: Ավանդույթի համաձայն, "Ոսկե ծիրանի" շրջանակներում երևանյան հանդիսատեսը հնարավորություն կունենա դիտելու մրցութային ֆիլմեր աշխարհի տարբեր երկրներից, ինչպես նաև ամենահեղինակավոր կինոփառատոններից (Կաննի, Բեռլինի և այլն): Սպասվում է նաև համաշխարհային կինոարվեստի նշանավոր գործիչների այց, ովքեր իրենց փորձն ու արվեստը կներկայացնեն հայաստանյան կինոսիրողներին: Այս տարի կինոփառատոնի պատվավոր հյուրը կլինի հոլիվուդյան օսկարակիր դերասան Քևին Սփեյսին:-