Արմինֆո. Politico պարբերականը "շաբաթվա տարօրինակ լոբբիստական արշավը" վերտառությամբ հրապարակման մեջ բացահայտել է, թե ինչպես է Ադրբեջանը արտերկրում նպատակաուղղված քարոզչություն իրականացնում հայ բարերար Ռուբեն Վարդանյանի դեմ, որին նրանք ապօրինաբար պահում են Բաքվի բանտում:
Politico-ում շատ զարմացել են, երբ անցյալ շաբաթ իրենց և այլ ԶԼՄ-ների խմբագրություններն էլեկտրոնային նամակ են ստացել մի PR ընկերությունից, որում խոսվում էր Եվրոպայում, այսպես կոչված, "ռուսական ազդեցության գործակալների" գործողությունների մասին։ Թեև այդ հայտարարությունը բավականին սադրիչ էր հնչում, խմբագրությունում ուշադրություն են դարրձրել այն փաստի վրա, որ կենտրոնում հայտնվել է միայն մեկ մարդ՝ ռուս-հայկական ծագումով օլիգարխ Ռուբեն Վարդանյանը։ "Այս պահին Վարդանյանն Ադրբեջանում ճաղերի հետևում է՝ այն բանից հետո, երբ այդ երկիրը հարձակման անցավ Լեռնային Ղարաբաղը գրավելու նպատակով, որից հետո սկսվեց տարածաշրջանի հայ բնակիչների զանգվածային արտագաղթը։ Չնայած 56-ամյա գործարարն իր փողերը վաստակել է Մոսկվայում և ենթարկվել Ուկրաինայի պատժամիջոցներին ՝ ռուսամետ ենթակառուցվածքային բիզնեսին մասնակցելու համար, նա հրաժարվել է Ռուսաստանի քաղաքացիությունից՝ քաղաքականությամբ զբաղվելու և Ղարաբաղի պետական նախարար դառնալու համար: Լուրեր էին պտտվում, որ նա կապ է պահպանել Կրեմլի հետ, սակայն ռուս խաղաղապահները, որոնց տեղակայել էին տարածաշրջանում, ի վերջո Վարդանյանին եւ տեղի մյուս առաջնորդներին գերի են թողել ադրբեջանցիների մոտ", - նշում է խմբագրությունը։
Unilever-ի նախկին ղեկավար Փոլ Փոլմանը և Moderna դեղագործական ընկերության համահիմնադիր Նուբար Աֆեյանը նրանց թվում են, ովքեր ակտիվորեն քարոզում են Վարդանյանի ազատ արձակումը։ Վարդանյանի գրասենյակից նաեւ հաստատել են, որ նրան առաջադրել են Խաղաղության նոբելյան մրցանակի, սակայն նրա հարուստ անցյալով բաղձալի մրցանակը ստանալու հավանականությունը գրեթե զրոյական է: Այնուամենայնիվ, տեղական ԶԼՄ-ների մի քանի հաղորդումների համաձայն, Ադրբեջանը խիստ վրդովվել է միայն Վարդանյանին Նոբելյան մրցանակի առաջադրելու մտքից: Հենց այստեղ է սկսվում PR արշավը։ Դրանում պնդվում է, որ Եվրախորհրդարանի պատգամավորները պաշտպանել են այն առաջարկը, որը կոչ է անում Նոբելյան կոմիտեին Վարդանյանին ճանաչել ռուսական գործակալ եւ նրան հեռացնել մրցանակի պոտենցիալ դափնեկիրների թվից: Մամուլի հաղորդագրության համաձայն, որն ուղարկել է PR ընկերությունը վերլուծության եւ ռազմավարության ուկրաինական կենտրոնի հովանու ներքո, Եվրախորհրդարանի պատգամավորներ Վիոլա ֆոն Կրամոն-Տաուբադելը եւ Կարեն Մելքիորը պաշտպանել են Վարդանյանին հեղինակավոր մրցանակի "սեւ ցուցակում" ընդգրկելու կոչը: Սակայն, կա մեկ խնդիր. մի քանի օրենսդիրներ Politico-ին հայտարարել են, որ իրենք այստեղ կապ չունեն, և ենթադրել են, որ իրենց խոսքերը միտումնավոր դուրս են բերվել համատեքստից, որպեսզի աջակցեն Ադրբեջանի դիրքորոշմանը: "Ես մասնակցել եմ այդ միջոցառմանը, քանի որ խոսքը ռուսական ապատեղեկատվության մասին էր", - ասել է Գերմանիայից Եվրախորհրդարանի պատգամավոր Վիոլա ֆոն Կրամոն-Տաուբադելը: - <Ամոթալի է, որ այն (մասնակցությունը), կարծես, օգտագործվում է ադրբեջանական ապատեղեկատվության համար ։ Ես չէի աջակցի որևէ համատեղ հռչակագրի և չէի մասնակցի, եթե հետքերը տանեին Ադրբեջանի դեսպանատուն>։
Դանիացի Մելքիորը ննույնպես Politico-ին ասել է, որ ինքը չի ստորագրել այդ հայտարարության տակ և չի պատրաստվում դա անել: Բրյուսելի միջազգային մամուլի ակումբի ներկայացուցիչը հերքել է, որ որևէ առնչություն ունի նման լոբբիստական միջոցառման նկատմամբ վստահության բարձրացման հետ: "Յուրաքանչյուր ոք կարող է ամրագրել մեր հաստատությունը, ինչպես Բրյուսելի ցանկացած հյուրանոց, եւ մենք տարեկան հարյուրավոր միջոցառումներ ունենք", - հայտարարել է աշխատակիցը, որը պատասխանել է Politico թերթի զանգին: "Բայց մենք այդ միջոցառումների կազմակերպիչը չենք, մենք դրանք, պարզապես, անցկացնում ենք":
Դժվար է հասկանալ, թե ինչ է իրենից ներկայացնում վերլուծության և ռազմավարության ուկրաինական կենտրոնը։ Թվում է, թե այս կազմակերպությունը չունի անգլերեն կամ ուկրաիներեն արդիական կայք.Աան ունի 88 հավանում Facebook-ի էջում, և հրապարակված հինգ հղումներից չորսը տանում են դեպի ադրբեջանամետ հոդվածներ Google-ում, որը գրել է կենտրոնի հիմնադիր Իգոր Չալենկոն: "Ադրբեջանն արդեն քննադատության է բախվում նավթի արդյունահանման եւ Արեւմուտքում դրա ազդեցության ցանցի հետ կապված, սակայն Եվրախորհրդարանի պատգամավորների դիրքորոշումների խեղաթյուրումը կարող է հանգեցնել երկրի եւ խորհրդարանի միջեւ հարաբերությունների նոր խզման", - ասվում է պարբերականի նյութում:
Հիշեցնենք, որ 2022 թվականի աշնանը Ռուբեն Վարդանյանը հրաժարվել է Ռուսաստանի քաղաքացիությունից, տեղափոխվել Արցախ և 2022 թվականի նոյեմբերի 4-ին գլխավորել Հանրապետության կառավարությունը ։ 2023 թվականի փետրվարի 23-ին ազատվել է պաշտոնից, բայց մնացել է Արցախում ապրելու ։ Արցախի դեմ Ադրբեջանի սեպտեմբերյան ագրեսիայից մեկ շաբաթ անց Վարդանյանը փորձել է դուրս գալ հանրապետությունից, սակայն ձերբակալվել է սահմանային անցակետում՝ ադրբեջանական ուժայինների կողմից: Բաքուն նրան մեղադրում է "ահաբեկչության ֆինանսավորման", "օրենսդրությամբ չնախատեսված զինված կազմավորումների կամ խմբերի ստեղծմանը և գործունեությանը մասնակցելու" և "Ադրբեջանի Հանրապետության պետական սահմանն ապօրինի հատելու" համար: