Բացահայտվել է թմրամիջոցների ապօրինի շրջանառության, դրանից ստացված եկամուտների օրինականացման հերթական դեպքը

Արմինֆո.: Բացահայտվել է թմրամիջոցների ապօրինի շրջանառության, դրանից ստացված եկամուտների օրինականացման (փողերի լվացման) հերթական դեպքը:

ՀՀ քննչական կոմիտեի ՀԿԳ ՔԳՎ մարդկանց թրաֆիքինգի, անչափահասների սեռական անձեռնմխելիության դեմ ուղղված և թմրամիջոցների ապօրինի շրջանառության հանցագործությունների քննության վարչությունում քննվող քրեական վարույթի շրջանակներում իրականացված քննչական և ապացուցողական համակարգված գործողությունների, մեծածավալ միջոցառումների արդյունքում հիմնավորվել է, որ Երևան քաղաքի 30-ամյա բնակիչը 2020-2023թթ․ ընթացքում, քննությամբ ինքնությունը դեռևս չպարզված այլ անձանց հետ նախնական համաձայնությամբ, շահադիտական դրդումներով, «Տելեգրամ» հեռահաղորդակցման հավելվածում գրանցված տարբեր օգտատերերից ապօրինի ձեռք է բերել առանձնապես խոշոր չափերով տարբեր տեսակի թմրամիջոցներ, ապահովել դրանց առանձնացումն ըստ քաշերի, փաթեթավորումն ու նախապես տեղադրումը թաքստոցներում:

«Այնուհետև թմրամիջոցների գտնվելու վայրերը լուսանկարահանվել, ծրագրային հավելվածի միջոցով նշվել են դրանց գտնվելու վայրերի կոորդինատները և հանցակիցների կողմից կառավարվող «Telegram» հեռահաղորդակցման հավելվածում գրանցված առցանց խանութ-հարթակների միջոցով դրանք փոխանցվել են թմրամիջոց ձեռք բերելու ցանկություն հայտնած և հանցակիցների կողմից փաստացի կառավարվող կրիպտոարժութային դրամապանակներին համապատասխան չափով միջոցներ փոխանցած անձանց։ Այդ կերպ իրականացվել է առանձնապես խոշոր չափերով թմրամիջոցների իրացում:

Բացի այդ, 30-ամյա տղամարդը, քննությամբ դեռևս չպարզված այլ անձանց հետ նախնական համաձայնությամբ, «Տելեգրամ» հեռահաղորդակցման հավելվածում գործող առցանց խանութ-հարթակներից թմրամիջոցներ ձեռք բերելու ցանկություն հայտնած անձանց տրամադրել են մի շարք կրիպտոարժութային դրամապանակների, այդ թվում՝ Երևանի հիշյալ բնակչի անվամբ «Քոինբեյզ» համակարգում նույնականացված դրամապանակների տվյալները՝ պատվիրված թմրամիջոցի համար նախատեսված գումարը նշված դրամապանակներին փոխանցելու նպատակով:

Դրանից հետո թմրամիջոցներ ձեռք բերելու ցանկություն հայտնած անձինք այդ էլեկտրոնային դրամապանակներին կատարել են համապատասխան չափով դրամային փոխանցումներ՝ դրանք կրիպտոարժույթով փոխանակելու և առցանց խանութ-հարթակների տրամադրած կրիպտոարժութային դրամապանակներին փոխանցելու համար։ Ապա փոխանցման անդորրագրերն ուղարկել են նշված առցանց խանութ-հարթակներին և ապօրինի ձեռք բերել պատվիրված թմրամիջոցը:

Քննությամբ պարզվել է, որ «Քոինբեյզ» համակարգում 30-ամյա տղամարդու օգտահաշվի հետ նույնականացված թվով 20 «դաշքոին» տեսակի կրիպտոարժութային դրամապանակներին 2021թ․ դեկտեմբերից 2023թ․ մարտ ընկած ժամանակահատվածում փոխանցվել է 75.109.979 ՀՀ դրամին համարժեք 3108 (169.249 ԱՄՆ դոլար) «դաշքոին» տեսակի կրիպտոարժույթ: 

Այնուհետև հանցավոր գործունեությունից ստացված առանձնապես խոշոր չափերով գույքի հանցավոր ծագումը, իրական բնույթը թաքցնելու, դրանց օրինական տեսք հաղորդելու նպատակով, կրիպտորաժութային դրամապանակներին ստացված կրիպտոարժույթը փոխանցվել է ՀՀ տարածքում կրիպտոարժույթի փոխանակմամբ զբաղվող անձանց կողմից շահագործվող կրիպտոարժութային դրամապանակներին, որից հետո փոխակերպված ֆինանսական միջոցները հանցակիցների հանձնարարությամբ փոխանցվել են տարբեր էլեկտրոնային դրամապանակների, բանկային հաշիվների, կանխիկացվել կամ այլ կերպ տնօրինվել են հանցավոր գործունեությանը ներգրավված անձանց կողմից:

Քննությամբ փաստվել է, որ 2017-2023 թվականների ընթացքում 30-ամյա տղամարդու անվամբ «Իդրամ» և «Թել-Սել» համակարգերում նույնականացված դրամապանակներին նշված եղանակով փոխանցվել և վերջինիս կողմից տնօրինվել է հանցավոր ճանապարհով ձեռք բերված առանձնապես խոշոր չափերով՝ ընդհանուր 91.841.503 ՀՀ դրամ գումար:

Ձեռք բերված բավարար փաստերի հիման վրա Երևան քաղաքի 30-ամյա բնակչին վերջնական մեղադրանք է ներկայացվել՝ ՀՀ քրեական օրենսգրքի 393-րդ հոդվածի 3-րդ մասի 2-րդ կետով և 296-րդ հոդվածի 3-րդ մասի 3-րդ կետով: Վերջինիս մասով նախաքննությունն ավարտվել է, և վարույթի նյութերն ուղարկվել են հսկող դատախազին՝ մեղադրական եզրակացությունը հստատելու և դատարան ուղարկելու համար: Հանցավոր խմբի մյուս անդամների, ինչպես նաև՝ թմրամիջոցների ձեռք բերման աղբյուրը պարզելու մասով նախաքննությունը շարունակվում է: Ձեռնարկվում են միջոցառումներ՝ թմրամիջոցների ապօրինի շրջանառության շղթայի մյուս անդամների ինքնությունը պարզելու և հայտնաբերելու ուղղությամբ: Ոստիկանության համապատասխան ստորաբաժանմանը տրվել են հանձնարարություններ», - ասվում է ՔԿ-ի հաղորդագրությունում: