Թուրք լրագրողուհի. Հայաստանը ճանաչել է Պաղեստինը՝ Փաշինյան-Էրդողան հեռախոսազրույցից հետո

Արմինֆո.Պաղեստինը ճանաչելու Հայաստանի որոշումը հաջորդել է երեքշաբթի Թուրքիայի նախագահ Ռեջեփ Թայիփ Էրդողանի և Հայաստանի վարչապետ Նիկոլ Փաշինյանի միջև տեղի ունեցած հեռախոսազրույցին: Այդ մասին Twitter-ի (X) իր միկրոբլոգում գրել է թուրք լրագրողուհի և Al-Monitor-ի շեֆ-թղթակից Ամբերին Զամանը, ով լուսաբանում է Մերձավոր Արևելքի և Հյուսիսային Աֆրիկայի հիմնական նորությունները:

"Թուրքիայի դաշնակից և Հայաստանի թշնամի Ադրբեջանը ռազմավարական կապեր ունի Իսրայելի0 հետ։ Հետաքրքիր կոնֆիգուրացիա", - գրել է լրագրողուհին՝ զետեղելով Թուրքիայի ԱԳՆ-ի հայտարարությունը, որում պաշտոնական Անկարան, մասնավորապես,  ողջունում է Պաղեստին պետությունը ճանաչելու Հայաստանի որոշումը՝ հետևելով այնպիսի երկրների, ինչպիսիք են Իսպանիան, Իռլանդիան, Նորվեգիան և Սլովենիան:

Նշենք, որ հունիսի 21-ին Հայաստանը ճանաչել է Պաղեստին պետությունը։ Պաշտոնական Երևանն ընդգծել է, որ Գազայում տիրող աղետալի հումանիտար իրավիճակը և շարունակվող ռազմական հակամարտությունն այսօր միջազգային քաղաքական օրակարգի՝ կարգավորում պահանջող առաջնային խնդիրներից մեկն է: «Հայաստանի Հանրապետությունը կտրականապես մերժում է զինված հակամարտության ընթացքում քաղաքացիական ենթակառուցվածքների թիրախավորումը, քաղաքացիական բնակչության դեմ բռնությունները և քաղաքացիական անձանց պատանդառումն ու գերեվարումը և միանում է առանց նախապայմանների նրանց ազատ արձակման միջազգային հանրության պահանջներին: Հայաստանի Հանրապետությունը միացել է ՄԱԿ-ի ԳԱ-ի բանաձևերին, որոնք կոչ են անում անհապաղ հրադադար հաստատել Գազայում: Ավելին, Հայաստանի Հանրապետությունն անկեղծորեն շահագրգռված է Մերձավոր Արևելքում խաղաղության և կայունության հաստատմամբ, հրեա և պաղեստինցի ժողովուրդների միջև տևական հաշտության կայացմամբ: Միջազգային տարբեր հարթակներում մենք մշտապես հանդես ենք եկել պաղեստինյան հարցի խաղաղ և համապարփակ կարգավորման օգտին և պաշտպանում ենք իսրայելա-պաղեստինյան հակամարտության լուծման՝ «երկու պետություն» սկզբունքը: Համոզված ենք, որ դա միակ ճանապարհն է երաշխավորելու, որ պաղեստինցիներն ու իսրայելցիները կարող են իրականացնել իրենց օրինական ձգտումները: Ելնելով վերոնշյալից և վերահաստատելով իր հավատարմությունը միջազգային իրավունքին և ժողովուրդների հավասարության, ինքնիշխանության ու խաղաղ համակեցության սկզբունքներին՝ Հայաստանի Հանրապետությունը ճանաչում է Պաղեստինի պետությունը», - ասվում է ՀՀ ԱԳՆ հայտարարությունում:

Իսրայելը Հայաստանի այդ հայտարարության ֆոնին երկրի ԱԳՆ է կանչել ՀՀ դեսպանին։

2024 թվականի հունիսի 9 - ի դրությամբ Պաղեստին պետության անկախությունը ճանաչել են ՄԱԿ-ի անդամ 147 պետություններ, ինչպես նաև ՄԱԿ-ում դիտորդ հանդիսացող Վատիկանը (Սուրբ Աթոռը) և ՍԱԴՀ-ը: Այսպիսով, Հայաստանը դարձավ 148-րդ պետությունը, որը Պաղեստինը ճանաչում է որպես անկախ պետություն։