Արաբական աշխարհը և ՀԱՄԱՍ-ը ողջունում են Հայաստանի կողմից Պաղեստինի ճանաչումը

Արմինֆո.Արաբական աշխարհի մի շարք երկրներ ողջունել են Հայաստանի կողմից Պաղեստինի ճանաչումը։

Սաուդյան Արաբիայի ԱԳՆ հայտարարության մեջ ողջունվում է Պաղեստին պետությունը ճանաչելու Հայաստանի կառավարության որոշումը և ընդգծվում է, որ այդ որոշումը կարևոր քայլ է անկախ պաղեստինյան պետության ստեղծման ճանապարհին՝ Արևելյան Երուսաղեմը որպես նրա մայրաքաղաք:

Իսկ Լիբանանի ԱԳՆ-ում բարձր են գնահատել այդ դիրքորոշումը, որն արտացոլում է Հայաստանի հավատարմությունը միջազգային իրավունքին և հավասարության, ինքնիշխանության և ժողովուրդների ՝ իրենց ճակատագիրը որոշելու իրավունքի սկզբունքներին:

Հորդանանի արտաքին գործերի և օտարերկրացիների հարցերի նախարարությունում համոզմունք են հայտնել, որ Պաղեստինի պետության ճանաչումը կարևոր քայլ է, որն արտացոլում է Հայաստանի կողմից միջազգային իրավունքի նորմերի և միջազգային օրինականության համապատասխան բանաձևերի պահպանումը:

Հայաստանի որոշումը ողջունել են նաև Կատարում։ "Կատարը դա կարեւոր քայլ է համարում երկու պետությունների ստեղծման որոշմանն աջակցելու եւ տարածաշրջանում խաղաղության ու կայունության հասնելու համար։ Կոչ ենք անում անհապաղ դադարեցնել պատերազմը Գազայի հատվածում և վերադառնալ քաղաքական ուղուն ՝ որպես տարածաշրջանում կայունության հասնելու միակ երաշխիք։ Հուսով ենք, որ Պաղեստինը ճանաչած երկրների թիվը կավելանա", - ասվում է երկրի ԱԳՆ հայտարարությունում։

Ինչպես հաղորդում է Al Jazeera-ն, Իսլամական դիմադրության շարժումը (ՀԱՄԱՍ) նույնպես ողջունել է Պաղեստին պետության ճանաչման վերաբերյալ Հայաստանի հայտարարությունը և այդ որոշումը կարևոր քայլ է համարել Պաղեստինի ժողովրդի իրավունքների միջազգային ճանաչման ճանապարհին:

Նշենք, որ հունիսի 21-ին Հայաստանը ճանաչել է Պաղեստին պետությունը։ Պաշտոնական Երևանն ընդգծել է, որ Գազայում տիրող աղետալի հումանիտար իրավիճակը և շարունակվող ռազմական հակամարտությունն այսօր միջազգային քաղաքական օրակարգի՝ կարգավորում պահանջող առաջնային խնդիրներից մեկն է: «Հայաստանի Հանրապետությունը կտրականապես մերժում է զինված հակամարտության ընթացքում քաղաքացիական ենթակառուցվածքների թիրախավորումը, քաղաքացիական բնակչության դեմ բռնությունները և քաղաքացիական անձանց պատանդառումն ու գերեվարումը և միանում է առանց նախապայմանների նրանց ազատ արձակման միջազգային հանրության պահանջներին: Հայաստանի Հանրապետությունը միացել է ՄԱԿ-ի ԳԱ-ի բանաձևերին, որոնք կոչ են անում անհապաղ հրադադար հաստատել Գազայում: Ավելին, Հայաստանի Հանրապետությունն անկեղծորեն շահագրգռված է Մերձավոր Արևելքում խաղաղության և կայունության հաստատմամբ, հրեա և պաղեստինցի ժողովուրդների միջև տևական հաշտության կայացմամբ: Միջազգային տարբեր հարթակներում մենք մշտապես հանդես ենք եկել պաղեստինյան հարցի խաղաղ և համապարփակ կարգավորման օգտին և պաշտպանում ենք իսրայելա-պաղեստինյան հակամարտության լուծման՝ «երկու պետություն» սկզբունքը: Համոզված ենք, որ դա միակ ճանապարհն է երաշխավորելու, որ պաղեստինցիներն ու իսրայելցիները կարող են իրականացնել իրենց օրինական ձգտումները: Ելնելով վերոնշյալից և վերահաստատելով իր հավատարմությունը միջազգային իրավունքին և ժողովուրդների հավասարության, ինքնիշխանության ու խաղաղ համակեցության սկզբունքներին՝ Հայաստանի Հանրապետությունը ճանաչում է Պաղեստինի պետությունը», - ասվում է ՀՀ ԱԳՆ հայտարարությունում:

Իսրայելը Հայաստանի այդ հայտարարության ֆոնին երկրի ԱԳՆ է կանչել ՀՀ դեսպանին։

2024 թվականի հունիսի 9 - ի դրությամբ Պաղեստին պետության անկախությունը ճանաչել են ՄԱԿ-ի անդամ 147 պետություններ, ինչպես նաև ՄԱԿ-ում դիտորդ հանդիսացող Վատիկանը (Սուրբ Աթոռը) և ՍԱԴՀ-ը: Այսպիսով, Հայաստանը դարձավ 148-րդ պետությունը, որը Պաղեստինը ճանաչում է որպես անկախ պետություն։