Հայ ծրագրավորողների Zangi նոր բջջային հավելվածը կես տարում 200 հազար օգտատեր ունի

Տեսազանգեր, աուդիո զանգեր, ինչպես նաև ֆայլերի և ակնթարթային հաղորդագրությունների փոխանակում ապահովող Zangi հավելվածը, որը բջջային շուկա է դուրս եկել կես տարի առաջ, արդեն 200 հազար օգտատեր ունի: Այդ մասին ԱրմԻնֆո-ին հարցազրույցում հայտարարել է Zangi Livecom Pte. Ltd. ընկերության ղեկավար Վահրամ Մարտիրոսյանը: 

Նա ընդգծել է, որ հավելվածի օգտատերերի աշխարհագրությունն այսօր հավասարապես բաժանված է Հայաստանի և արտերկրի միջև: Մինչև տարեվերջ ընկերությունը նախատեսում է մի քանի միլիոնի հասցնել այդ թիվը: ՙՔանի որ մենք ունենք, իրոք, լավ ապրանք, մեզ մնում է միայն իրազեկել մարդկանց դրա գոյության մասին՚,- ասել է Վ. Մարտիրոսյանը: Տվյալ պահին հավելվածը հասանելի է Android և iOS հարթակաների համար: Մշակման փուլում են գտնվում է Windows Mobile-ի և անհատական համակարգիչների համար տարբերակները: Zangi-ն նախատեսում է նաև հավելվածի web-տարբերակի մշակում բրաուզերների և Fecebook-ի համար: Հայտնի մրցակիցների հետ Zangi-ն պատրաստվում է մրցակցել տեսազանգերի և աուդիո զանգերի որակական առավելությամբ և թեթևակշռությամբ (ligthweight):

Խոսելով Zangi-ի մշակման տեխնիկական հիմքմերի մասին`ընկերության ղեկավարն ընդգծել է օգտատերերի համար առավելագույնս հարմարավետ ապրանք ստեղծելու ձգտումը: ՙՀարմարավետություն ասելով`մենք առաջին հերթին նկատի ունենք թեթևակշռությունը: Սմարթֆոնները շատ տարբեր են`հատկապես Android սմարթֆոնները: Կան շատ թույլերը, նույն iPhone 4-ն արդեն բավական թույլ մոդել է համարվում՚,- նշել է Վ. Մարտիրոսյանը: Նա պատմել է, որ Zangi-ի թիմը թեստ է անցկացրել, որի ընթացքում 90% լիցքավորված iPhone 5s-ից կես ժամանոց զանգեր են կատարվել 3 առաջատար հավելվածներից` Skype, Viber և Zangi: Թեստի արդյունքները հաճելիորեն զարմացրել են: ՙSkype-ով և Viber-ով զանգերից հետո մասնագետներն արձանագրել են մարտկոցի շուրջ 30% ծախսում, իսկ Zangi –ով` 20%, ինչը 1.5 անգամ ավելի քիչ է, իսկ դա այնքան էլ քիչ չէ այդ ոլորտում: Դա որոշակի տեխնոլոգիական բեկում է: Եթե սովորական ձայնային զանգերը, ըստ վիճակագրության, տևում են միջինը 5-10 րոպե, ապա տեսազանգերը`կես ժամ-մեկ ժամ: Եվ մարտկոցի խնայողական ծախսումը Zangi-ի գործնական առավելությունն է ՚,- նշել է Մարտիրոսյանը`ընդգծելով, որ դա թիմի նորարարական տեխնոլոգիական լուծումների արդյունքն է: Մարտիրոսյանն ուշադրությունը հրավիրել է նաև հավելվածի ինտերֆեյսի առավելությունների վրա: ՙԵս միշտ ասել եմ իմ թիմին, որ Zangi-ի ինտերֆեյսը պետք է այնպիսին լինի, որ օգտատիրոջ մոտ այն փոխելու ցանկություն չառաջանա:

Ես ինտերֆեյսը համեմատում եմ ավտոմեքենաների թյունինգի հետ: Լավ մեքենայի դեպքում նման ցանկություններ չեն առաջանում: Կարծում եմ`մեզ հաջողվել է դա անել: Մեր թիմը չի պատրաստվում բավարարվել ձեռքբերածով և ձգտում է ամեն ամիս նորացումներ թողարկել: Հետևելու դեպքում կարելի է տեսնել, թե որքան արագ է ընթանում մեր Zangi-ի կատարելագործման գործընթացը՚,- ընդգծել է նա:Օրիգինալ տեխնիկական լուծումների ևս մեկ օրինակ է Վահրամ Մարտիրոսյանը համարում Zangi-ի միջոցով զանգի որակը: Նմանօրինակ հայտնի հավելվածներից յուրաքանչյուրն իր առանձնահատկություններն, իր ձեռագիրն ունի: Zangi-ին ձայնի բնականությունն առավելագույնս պահպանելու նպատակ է դրել: ՙԲոլոր հավելավածներում հեռացվում է աղմուկը: Մենք նույնպես անում ենք դա, սակայն այնպես, որպեսզի դրանից չտուժեն խոսողի ձայնի բնական առանձնահատկությունները: Նման առավելություն ընձեռում են թվային տեխնոլոգիաները: GSM ցանցերում ձայնի որակը կախված է դինամիկներից, իսկ թվային միջավայրում մենք կարող ենք ինքներս վերահսկել ձայնը: Մենք ունենք աուդիո ծրագրավորման մասնագետներ, ովքեր շատ որակյալ, բնական ձայն են ստանում: Դա նույնպես դրված էր Zangi-ի ստեղծման հիմքում, և մենք լավ արդյունքների ենք հասել այդ հարցում՚,- ասել է Վ. Մարտիրոսյանը: