Արմինֆո. "Հյուսիս-Հարավ" տրանսպորտային ուղին կարող է դառնալ պահանջված միջազգային միջանցք: Այդ մասին հայտարարել է Ռուսաստանի նախագահ Վլադիմիր Պուտինը:
"Ինչ վերաբերում է "Հյուսիս-Հարավ" այդ ճանապարհին, ապա այն կարող է վերածվել շատ լավ և պահանջված միջազգային միջանցքի։ Երբ բեռները հենց այստեղից, որտեղ մենք գտնվում ենք, Սանկտ Պետերբուրգի նավահանգստից ամբողջ եվրոպական մասով կուղևորվեն Ադրբեջան, այնուհետև՝ Իրան և դուրս կգան Պարսից ծոցի ափ", - ասել է նա։
Միևնույն ժամանակ, Ռուսաստանի ղեկավարը հավելել է, որ "Հյուսիս-Հարավը" խոստանում է լինել շատ շահավետ, դրանում ներդրումները հուսալի են, դրա շահութաբերությունը երաշխավորված կլինի: "Քանի որ այն խոստանում է լինել շատ շահավետ, այսինքն՝ այդ նախագծի նկատմամբ իրենց հետաքրքրությունը հայտարարած օտարերկրյա ներդրողները, արտատարածաշրջանային, մոտակայքում գտնվող երկրները, այդ թվում ՝ սուվերեն արաբական հիմնադրամները։ Հասկանալի է, քանի որ սուվերեն հիմնադրամները միշտ փնտրում են հուսալի ներդրումներ: Դա հուսալի ներդրումներից մեկն է, քանի որ դրա շահութաբերությունը կապահովվի, կերաշխավորվի", - հայտարարել Է Պուտինը՝ չորեքշաբթի աշխարհի առաջատար լրատվական գործակալությունների ղեկավարների հետ հանդիպման ժամանակ, հաղորդում է "ՌԻԱ Նովոստի"-ն։
Ռուսաստանի ղեկավարն անդրադարձել է նաև Ադրբեջանի հետ հարաբերություններին և երկկողմ համագործակցության զարգացման տեմպը շատ լավ համարել: Նրա խոսքով՝ Ռուսաստանն ու Ադրբեջանը ավելի ու ավելի մեծ ուշադրություն են դարձնում հարաբերությունների զարգացմանն ու դիվերսիֆիկացմանը, ինչն այդ աշխատանքի շարունակման դեպքում լավ արդյունքների կհանգեցնի: "Առևտրաշրջանառության ընդհանուր ծավալը 4,5-4,6 մլրդ դոլար է, և տեմպը լավ է։ Զարգացման տեմպը շատ լավ է։ Մենք ավելի ու ավելի ենք դիվերսիֆիկացնում մեր հարաբերությունները, և վստահ եմ, որ երկու կողմերի նման տրամադրվածությունը պահպանելու դեպքում, իսկ Ռուսաստանում մենք նույն կերպ ենք տրամադրված, վստահ եմ, որ արդյունքներ կլինեն և լավ կլինեն", - ասել է նա։
Պուտինը նշել է, որ երկու երկրների համատեղ աշխատանքի կարևոր ոլորտներից մեկը լոգիստիկան է: "Այս առումով շատ բան պետք է անել լոգիստիկայի զարգացման տեսանկյունից. դա վերաբերում է ոչ միայն Հյուսիս - Հարավ ճանապարհին, այլ նաև այլ վեկտորների. լոգիստիկ կենտրոնների կառուցում, այդ թվում ՝ Ռուսաստանի և Ադրբեջանի սահմանին ՝ Դաղստանի հատվածում, այնտեղ արդեն աշխատանքներ են ընթանում։ Դա վերաբերում է նաև այլ ուղղություններին", - նշել է Ռուսաստանի նախագահը։
Նշենք, որ Պուտինը չորեքշաբթի ՊՄՏՀ-ի շրջանակներում զրույց է ունեցել միջազգային խոշորագույն լրատվական գործակալությունների ղեկավարների հետ: Սանկտ Պետերբուրգի միջազգային տնտեսական համաժողովը (ՊՄՏՀ) անցկացվում է հունիսի 5-ից 8-ը: