Նախարար. Վստահություն կա, որ ընթացիկ տարում Սևանա լճից ջրառը կհասցվի նվազագույնի

Արմինֆո.Հունիսի 5-ի առավոտյան դրությամբ Սևանա լիճ  մուտք է գործել 127 մլն խմ ջուր, ընդ որում, լճից ջրառ չի իրականացվել։ Այդ մասին հունիսի 5-ին ԱԺ-ում հայտարարել է ՀՀ տարածքային կառավարման և ենթակառուցվածքների նախարար Գնել Սանոսյանը՝ 2023 թվականի պետական բյուջեի կատարման շուրջ լսումների ժամանակ:

Արդյունքում, ինչպես նշել է նախարարը, Սևանա լճի մակարդակը բարձրացել է 10 սանտիմետրով: Անցած տարվա ընթացքում լիճ  մուտք է գործել, ընդհանուր առմամբ, 168 մլն խմ ջուր։ Բացի այդ, Սանոսյանի ասելով, երկրի գրեթե բոլոր ջրամբարներն ամբողջությամբ լցված են, ինչը ստիպում է սկսել ջրբացթողումներ։ "Այս ամենը թույլ է տալիս մեծ վստահությամբ ենթադրել, որ ընթացիկ տարում Սևանա լճից ջրառը կհասցվի նվազագույնի, իսկ ոռոգման սեզոնը կանցնի առանց արտառոց միջոցառումների", - ասել է նախարարը: Նա հիշեցրել է Լոռու և Տավուշի մարզերում ջրհեղեղների մասին, որոնք աղետալի հետևանքների են հանգեցրել։ Սանոսյանը նշել է, որ վնասի չափը դեռ չի հաշվարկվել։ <Ոչ թե այն պատճառով, որ մենք չենք կարող հաշվել, այլ այն պատճառով, որ կան օբյեկտիվ տարբեր պատճառներ: Օրինակ, բազմահարկ շենքերի առաջին հարկերի տիղմը մաքրելուց հետո անհրաժեշտ է գնահատել այս շենքի վթարայնության մակարդակը, արդյոք այն հարմար է հետագա շահագործման համար, թե՝ ոչ: Եվ նման հարցեր առաջանում են հսկայական քանակությամբ", - ասել է նախարարը։

Հիշեցնենք, որ մայիսի 25-26-ը Հայաստանի հյուսիսում տեղացել են հորդառատ անձրեւներ, որոնք հանգեցրել են Դեբեդ, Աղստեւ եւ Դեբեդ գետերի ափերից դուրս գալուն եւ ջրհեղեղի Լոռու և Տավուշի մարզերում։ Արդյունքում՝ փլուզվել են բազմաթիվ ճանապարհներ ու կամուրջներ, հեղեղվել են տներ։