Արմինֆո. Հայաստանում ԵՄ քաղաքացիական առաքելության (EUMA) դիտորդներն այս պահին չեն պարեկում Ադրբեջանի հետ սահմանի այն հատվածները, որոնք գտնվում են սահմանազատման փուլում, սակայն նախատեսում են դա անել ապագայում: Այդ մասին «ՍիվիլՆեթ»-ի հետ հարցազրույցում հայտարարել է Հայաստանում Եվրամիության դիտորդական առաքելության ղեկավար Մարկուս Ռիտերը՝ ի պատասխան ճշգրտող հարցի, թե արդյոք այժմ իրենք պարեկություն են իրականացնում Տավուշում, որտեղ ընթանում է սահմանի սահմանազատում։
"Այս պահին, քանի դեռ ընթանում են այդ շատ բաց և թեժ քննարկումները, մենք հեռու կմնանք դրանցից, որովհետև չենք ուզում որևէ կերպ ազդել այդ գործընթացի վրա։ Դա Հայաստանի և Ադրբեջանի գործն է։ Երբ այդ հարցերը կարգավորվեն և համաձայնեցվեն, մենք կշարունակենք այնտեղ
պարեկությունը... Երբ պարզենք, թե կոնկրետ որտեղ է գտնվում սահմանը, կշարունակենք։ Այո, հենց այդ ենք մենք անում [մենք հետ ենք քաշվելու սահմանազատման ժամանակ-խմբ.], քանի որ դա սկիզբ դրեց այս բոլոր շրջափակումներին, մանր ցույցերին և այլն։ Եվ մենք չենք, որ պետք է հայտնվենք այնտեղ և ինչ-որ կերպ ներգրավվենք դրանում: Դա [սահմանազատումը-խմբ.] Հայաստանի ինքնիշխան որոշումն է։ Կառավարությունը պետք է գործ ունենա իր ժողովրդի հետ: Նրանք որոշում են, մենք հետևում ենք նրանց քաղաքականությանը։ Հենց որ կառավարությունն ասի, որ ամեն ինչ որոշված է, մենք կշարունակենք", - նշել է նա ։ Ռիտերը նաև հաղորդել է, որ եվրոպացի դիտորդները նաև մտադիր են մեկնել այն շրջաններ, ուր նրանք նախկինում մուտք չեն ունեցել ՝ այնտեղ ռուսական զորքերի գտնվելու պատճառով: Խոսքը, մասնավորապես, Ներքին հանդ գյուղի մասին է։ "Բայց հիմա ռուս սահմանապահների դուրսբերումից հետո մենք կգնանք այնտեղ, երբ ռուսների դուրսբերումն ավարտվի։ Մենք չենք ցանկանում որևէ միջադեպ հրահրել, ուստի կսպասենք, մինչև նրանք հեռանան, իսկ հետո կսկսենք պարեկությունը, քանի որ ողջ երկրում տեղաշարժվելու ազատություն ունենք", - հայտարարել է Ռիտերը։
Դիտորդական առաքելության վերաբերյալ Ադրբեջանից, Իրանից և Ռուսաստանից հնչող քննադատություններին գնահատական տալու խնդրանքին ի պատասխան՝ EUMA-ի ղեկավարը վստահություն է հայտնել, որ "այդ կեղծ տեղեկատվությանն արձագանքը պետք է բխի Բրյուսելից, և այն գալիս է, բայց միշտ ավելի չափավոր ձևով, քան մեղադրանքները..."
"Ես կարող եմ միայն հավաստիացնել, որ մենք չունենք գաղտնի ծրագիր։ Մենք քաղաքացիական դիտորդների առաքելություն ենք, մեզանից շատերը ոստիկաններ են. մենք ուզում ենք լուծում գտնել այս հակամարտությանը։ Մենք չենք ուզում ինչ-որ մեկի հետ առճակատման գնալ։ Մենք գաղտնի զինվորական ստորաբաժանում կամ նման մի բան չենք", - վստահեցրել է նա։
Հավելենք, որ այսօր հայտնի է դարձել, որ այսօրվա դրությամբ EUMA-ն իրականացրել է ավելի քան 2300 պարեկություն:
Ինչպես հաղորդում է EUMA -ի մամուլի ծառայությունը, առաքելության ղեկավար Մարկուս Ռիտերը մայիսի 29-ին Գորիսում հանդիպել է առաքելության աշխատակիցների հետ: Թիմն այցելել է նաև Հայաստանի և Ադրբեջանի "սահմանին" գտնվող Սև լիճ:
Նշենք, որ 2021 թվականի մայիսին Ադրբեջանի ԶՈՒ-ն այդ հատվածում ներխուժել է Հայաստանի ինքնիշխան տարածք և օկուպացրել ավելի քան 15 քառ.կմ հայկական տարածք ։