ՀԱԵ. գործող իշխանությունները Եկեղեցի-պետություն հարաբերություններում առկա խնդիրներն արծարծում են սպառնալիքների, ճնշումների և ապատեղեկատվության գործիքակազմերի օգտագործմամբ

Արմինֆո. Մայիսի 23-ին Մայր Աթոռ Սուրբ Էջմիածնում, նախագահությամբ  Գարեգին Բ ամենայն հայոց կաթողիկոսի, տեղի է ունեցել հայաստանյան եպիսկոպոսների և թեմակալ առաջնորդների ժողով։

Մայր Աթոռ Սուրբ Էջմիածնի տեղեկատվական համակարգի հաղորդագրության համաձայն, ժողովի օրակարգում ընդգրկված նյութերը վերաբերել են հայրենիքի առջև ծառացած մարտահրավերներին, հասարակությանը հուզող հիմնախնդիրներին և Եկեղեցու առաքելությանն առնչված հարցերին։

Անդրադ0արձ է կատարվել նաև վերջին օրերին ՀՀ իշխանությունների կողմից ՀԱԵ հասցեին բարձրաձայնվող մեղադրանքներին, որոնց առիթով ժողովը հանդես է եկել հայտարարությամբ։

«ՀՀ իշխանության տարբեր ներկայացուցիչներ, այդ թվում և վարչապետը, Տավուշում սահմանազատման ու սահմանագծման անվան ներքո կատարվող տարածքային միակողմանի զիջումների դեմ հանրային ընդվզման այս օրերին, վերստին սկսել են թիրախավորել Հայաստանյայց Առաքելական Սուրբ Եկեղեցին՝ հրապարակ նետելով տարատեսակ կեղծ հայտարարություններ և ճշմարտազուրկ տեսություններ՝ առնչված Եկեղեցու պատմական առաքելությանն ու ներկա գործունեությանը։

Առավել քան զարմանալի է, որ մերկապարանոց մեղադրանքներ են հնչեցվում Եկեղեցու կողմից հարկեր չվճարելու առնչությամբ, երբ պաշտոնական վիճակագրությունները ուղղակի փաստում են ՀՀ օրենքով սահմանված հարկային պարտավորությունների կատարման մասին։ Հատկապես դատապարտելի է, երբ կառավարության ղեկավարը անհիմն մեղսագրումներով և անսքող դիտավորությամբ Հայ Եկեղեցուն ամբաստանում է ինչպես անցյալում, այնպես և այսօր «ազդեցության գործակալ» լինելու մեջ։

Ցավ ենք արտահայտում, որ գործող իշխանությունները Եկեղեցի-պետություն հարաբերություններում առկա խնդիրներն արծարծում են անվայելուչ իրենց հանգամանքին, նաև սպառնալիքների, ճնշումների և ապատեղեկատվության գործիքակազմերի օգտագործմամբ։

Հարկ է, որ ՀՀ իշխանության ներկայացուցիչները ազգի և հայրենիքի առջև իրենց պատասխանատվության գիտակցությամբ անդրադառնան Եկեղեցու պատմական հայրենաշեն ու ազգապահպան դերակատարությանը, ինչն ամրագրված է նաև ՀՀ Սահմանադրությամբ, և վերատեսության ենթարկեն որդեգրած քաղաքականությունը։ Աղոթում ենք, որ Աստված խաղաղություն պարգևի մեր հայրենիքին, բարօրություն ու ապահովություն մեր ժողովրդին», - ասվում է հայտարարությունում։

Հիշեցնենք, որ մայիսի 22-ին, ելույթ ունենալով երկրի խորհրդարանում, ՀՀ վարչապետ Նիկոլ Փաշինյանը "Տավուշը հանուն հայրենիքի" շարժման հանրահավաքների ֆոնին ՀԱԵ-ին որակել է  պատմական ժամանակներից "ազդեցության գործակալ": "Հայ ժողովուրդն ունեցել է փորձ, երբ հոգևորականները գնացել են Կեսարիա և օծվել, իսկ Հայաստան գալով ՝ դարձել են ազդեցության գործակալներ", - հայտարարել է վարչապետը, հավելելով, որ այդ ժամանակից ի վեր ոչինչ չի փոխվել, և հարցը կարելի է լուծել 2-3 ամսում ։

Նշենք նաև, որ ՀԱԵ-ն Հայաստանի 1000 հարկատուների ցանկում է: 2023 թվականի արդյունքներով նա վճարել է ավելի քան 435 մլն դրամ ՝ ցուցակում զբաղեցնելով 758-րդ հորիզոնականը ։ Իսկ 2024 թվականի առաջին եռամսյակի արդյունքներով ՝ ավելի քան 147 մլն դրամ ՝ զբաղեցնելով 488-րդ տեղը։