Չորեքշաբթի, 22 Մայիսի 2024 19:37

Արմինֆո. Կամավորների կողմից արդեն երեք տասնամյակի պատմություն ունեցող գործունեությունն անգնահատելի դերակատարում ունի կրթության և երիտասարդության զարգացման, ինչպես նաև հայ և ամերիկացի ժողովուրդների միջև կապն ավելի ամրապնդելու գործում: Մայիսի 22-ին այդ մասին հայտարարել է  Հայաստանում ԱՄՆ դեսպան Քրիստինա Քվինը՝ ելույթ ունենալով «Խաղաղության կորպուսի» նոր խմբի կամավորների երդման հանդիսավոր արարողությանը։  

 

Իր ողջույնի խոսքում դեսպանը նշել է, որ ուրախ է ներկա գտնվել այդ կարևոր միջոցառմանը՝ «Խաղաղության կորպուսի» կամավորների  29 - րդ խմբի երդման արարողությանը: «Օրը հատկապես առանձնահատուկ է նրանով, որ իր ներկայությամբ մեզ պատվում է «Խաղաղության կորպուսի» կենտրոնական գրասենյակի տնօրեն Քերոլ Սփենը և մեր հայ բարեկամներն ու գործընկերները։ Ես կարծում եմ, որ կրթության և երիտասարդության զարգացման հարցերում «Խաղաղության կորպուսի» անգնահատելի ներդրումից բացի՝ նրանց ունեցած ներդրումն առավել մեծ կարևորություն ունի մեր երկու ժողովուրդների միջև կապերի ամրապնդման գործում։ «Խաղաղության կորպուսի» առաջին կամավորները Հայաստան ժամանեցին 1992 թվականից, և այդ ժամանակվանից ի վեր 1100 կամավոր է ծառայել Հայաստանում։ Ես առիթ եմ ունեցել շփվել «Խաղաղության կորպուսի» նախկին կամավորների հետ և նաև այն մարդկանց հետ, ովքեր շփվել են կորպուսի կամավորների հետ այստեղ՝ Հայաստանում, և կարող եմ հստակ փաստել, որ, այո, այս ծրագրի շրջանակն օգնել է, որպեսզի մեր ժողովուրդների միջև կապն առավել սերտ դառնա»,-  ասել է ԱՄՆ դեսպանը, երախտիքի խոսք հայտնելով այն ընտանիքներին, կազմակերպություններին, որոնք ընդունել են «Խաղաղության կորպուսի» կամավորներին։ Դեսպանը նաև շնորհակալություն է հայտնել հենց կամավորներին, կարծիք հայտնելով, որ վերջիններիս շնորհիվ ավելի են ամրապնդվում բարեկամական կապերը Հայաստանի և ԱՄՆ-ի միջև։

 

Միջոցառմանը ողջույնի խոսքով հանդես է եկել «Խաղաղության կորպուսի» հայաստանյան գրասենյակի տնօրեն Ջոան Ֆեյրլին, ով նշել է, որ երդմնակալության արարողության արդյունքում Հայաստանում «Խաղաղության կորպուսի» մասնակիցների շարքերը կհամալրվեն 21 նոր կամավորներով։ Նա հավելել է, որ ընթացիկ տարին առանձնահատուկ է, քանի որ տեղի ունեցող հանդիսավոր արարողությանն իր մասնակցությունն է ունենում նաև «Խաղաղության կորպուսի» կենտրոնական գրասենյակի տնօրեն Քերոլ Սփենն, ում ներկայությունը խորհրդանշական է ինչպես կորպուսի հայաստանյան գրասենյակի համար, այնպես էլ խորհրդանշում է «Խաղաղության կորպուսի» ունեցած համերաշխությունը հայ ժողովրդի նկատմամբ։

 

Քերոլ Սփենն, իր հերթին, շնորհակալություն է հայտնել հայ ժողովրդին ջերմ ընդունելության համար, նշելով, որ թեև մեկ օր է, ինչ գտնվում է Հայաստանում, այդուհանդերձ, հասցրել է զգալ հայ ժողովրդի ջերմ հյուրընկալությունը։ «Մեր այս գեղեցիկ համագործակցությունը 3 տասնամյակի պատմություն ունի, և այն սկիզբ է առել Հայաստանի անկախության առաջին տարիներից։ 1992 թվականի ձմռանը, երբ «Խաղաղության կորպուսի» առաջին կամավորները ժամանեցին Հայաստան, այս նորանկախ պետության համար դժվարին ժամանակներ էին․երկիրը մաքառում և ոտքի էր կանգնում կործանարար պատերազմից և աղետալի երկրաշարժից հետո… «Խաղաղության կորպուսն» անչափ ուրախ է, որ եղել է հայ ժողովրդի կողքին, եղել է հայ ժողովրդի գործընկերն այս դժվարին ճանապարհին։ «Խաղաղության կորպուսն» աշխատել է 142 երկրում, և մենք շատ հստակ գիտակցում ենք և շատ լավ հասկանում ենք, որ ոչինչ չի կարող հարաբերությունների ամրապնդման հարցում այնքան ազդեցիկ լինել, որքան մարդկանց միջև ձևավորված կապերը»,- ասել է Քերոլ Սփենը, ընդգծելով, որ «Խաղաղության կորպուսի» կամավորների կատարած աշխատանքը և նրանց գործունեությունը խաղաղության հիմք է ձևավորում ոչ միայն Հայաստանում, այլև ողջ աշխարհում։

 

Իսկ ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը հավաստիացրել է, որ հանրապետությունում մեծապես կարևորում են այդ ծրագիրը՝ մի քանի առումներով, այդ թվում՝ ինչպես Հայաստանում անգլերենի ուսուցման, խորացման, կամավորության և, առհասարակ, երիտասարդական աշխատանքի զարգացման, այնպես էլ հայ-ամերիկյան միջմշակութային երկխոսության զարգացման տեսանկյուններից։ «Իհարկե, մենք հետևողական ջանքեր ենք գործադրում Հայաստանում օտար լեզուների կրթությունը զարգացնելու, այդ թվում՝ անգլերենի զարգացման ուղղությամբ, ինչն աշխարհում, կարծես, առանց մրցակցության գտնվում է առաջին տեղում։ Բայց, կարծում եմ, անմիջական փորձառությունը, որը մեր համայնքներում երեխաներն ունենում են «Խաղաղության կորպուսի» կամավորների հետ շփման միջոցով, անփոխարինելի է։ Մյուս կողմից մենք նաև հետևողական ջանքեր ենք գործադրում երիտասարդական քաղաքականության շրջանակներում՝ հատկապես մարզաբնակ երիտասարների ներուժի բացահայտման, կարողությունների զարգացման, երիտասարդական նախաձեռնությունների խրախուսման առումով»,- ասել է փոխնախարարը, հավելելով, որ այդ առումով անգնահատելի է կորպուսի կամավորների դերակատարումը: