ՄԱԿ-ի Խոշտանգումների դեմ կոմիտեն տագնապած է զինված հակամարտությունների ժամանակ հայերի նկատմամբ ադրբեջանցիների արտադատական սպանությունների, խոշտանգումների եւ դաժան վերաբերմունքի առնչությամբ

Արմինֆո.ՄԱԿ-ի Խոշտանգումների դեմ կոմիտեն (CAT) հրապարակել է եզրակացություններ Ավստրիայի, Ադրբեջանի, Ֆինլանդիայի, Հոնդուրասի, Լիխտենշտեյնի և Հյուսիսային Մակեդոնիայի կողմից Խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի ու պատժի դեմ  կոնվենցիայի կատարման վերաբերյալ:

ՄԱԿ-ի Մարդու իրավունքների գերագույն հանձնակատարի գրասենյակի կայքում զետեղված հաղորդագրության համաձայն, եզրակացություններն արտացոլում են Կոմիտեի հիմնական խնդիրները և յուրաքանչյուր երկրի կողմից Խոշտանգումների և այլ դաժան, անմարդկային կամ արժանապատվությունը նվաստացնող վերաբերմունքի և պատժի դեմ կոնվենցիայի կատարման վերաբերյալ առաջարկությունները:

Ադրբեջանի մասով նշվում է, որ կոմիտեն տագնապած էր զինված հակամարտությունների և հակաահաբեկչական գործողությունների ժամանակ հայերի նկատմամբ ենթադրյալ արտադատական սպանությունների, խոշտանգումների և դաժան վերաբերմունքի, ինչպես նաև այդ մեղադրանքներով հետաքննության և դատական հետապնդման ենթադրյալ բացակայության առնչությամբ:

Կոմիտեն նաեւ մտահոգություն է հայտնել "ահաբեկչության եւ դրա հետ կապված հանցագործությունների մեղադրանքով" 23 հայերի տեւական կալանքի կապակցությամբ:

Կոմիտեն կոչ է արել Ադրբեջանին ամենաբարձր մակարդակով հայտարարել, որ միջազգային մարդասիրական իրավունքի և մարդու համընդհանուր իրավունքների ցանկացած խախտում անընդունելի է: Նա նաև կոչ է արել անցկացնել լուրջ խախտումների մասին պնդումների անկախ, անկողմնակալ, թափանցիկ և արդյունավետ հետաքննություն և մասնակից պետությանը կոչ է արել պատասխանատվության ենթարկել մեղավորներին:

Կոմիտեն մտահոգություն է հայտնել այն պնդումների վերաբերյալ, որ Ադրբեջանում իրավապաշտպաններն ու լրագրողները շարունակում են բախվել ֆիզիկական և դատական հետապնդումների, իսկ որոշ դեպքերում՝ խոշտանգումների և վատ վերաբերմունքի: Կոմիտեում նաև մտահոգություն են հայտնել երկրում քաղաքացիական տարածքի կրճատման կապակցությամբ ՝ հիշեցնելով, որ ազատ և ակտիվ քաղաքացիական հասարակությունը խոշտանգումների և վատ վերաբերմունքի կանխարգելման բանալին է: Կոմիտեն Ադրբեջանին կոչ է արել իրավապաշտպանների և լրագրողների համար ապահովել իրենց աշխատանքը կատարելու համար բարենպաստ միջավայր՝ զերծ սպառնալիքներից, բռնաճնշումներից, բռնություններից և հետապնդման այլ ձևերից:

Նշենք, որ մինչ օրս հայտնի չէ ադրբեջանական բանտերում պահվող հայ ռազմագերիների և պատանդների ստույգ թիվը։ Փորձագետների գնահատմամբ՝ դրանք մի քանի հարյուր են։ Ադրբեջանական գերության մեջ պահվող անձանց թվում են նաև Արցախի ռազմաքաղաքական ղեկավարության նախկին և գործող 8 ներկայացուցիչներ՝ Արցախի նախկին նախագահներ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախկին նախարար Դավիթ Բաբայանը, ինչպես նաև խորհրդարանի խոսնակ Դավիթ Իշխանյանը, Արցախի պաշտպանության բանակի նախկին հրամանատար, գեներալ Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը:

Հավելենք, որ Արցախի նկատմամբ 2020 թվականի ագրեսիայի և դրան հաջորդած հարձակումների ընթացքում Ադրբեջանը կատարել է պատերազմական հանցագործություններ։ Համացանցում տարածվել են հայերի, այդ թվում ՝ կանանց եւ ծերերի նկատմամբ խոշտանգումների հարյուրավոր սահմռկեցուցիչ տեսանյութեր։