Միրզոյանը խուսափել է պատասխանել Ալմա Աթայի հռչակագրի կիրառման լեգիտիմության վերաբերյալ հարցին՝ որպես Ադրբեջանի հետ սհամանի սահմանազատման հիմք

Արմինֆո. Հայաստանի և Ադրբեջանի փոխվարչապետները, որոնք նաև ղեկավարում են սահմանազատման հանձնաժողովները, պայմանավորվածություն են ձեռք բերել Ալմա Աթայի հռչակագրի հիման վրա սկսել սահմանազատման և սահմանագծման գործընթաց:

Այդ մասին մարտի 13-ին Երևանում կայացած մամուլի ասուլիսում հայտարարել է Հայաստանի ԱԳ նախարար Արարատ Միրզոյանը, անդրադառնալով ընդդիմախոս դիվանագետների քննադատությանը, թե՝ Ալմա-Աթայի հռչակագիրը չի կարող ընկած լինել սահմանազատման և սահմանագծման գործընթացի հիմքում, և՝ որ այդ գործընթացը պետք է լինի համապարփակ, և զորքերի հետքաշումը չի կարող լինել որևէ առանձին հատվածում, քանի դեռ համաձայնեցված չէ գործընթացը սահմանի բոլոր հատվածներում՝ կոնկրետ քարտեզի հիման վրա:

Միևնույն ժամանակ, Հայաստանի արտգործնախարարը հավելել է, որ մի շարք միջազգային կազմակերպություններ և երկրներ ողջունել են այդ պայմանավորվածությունը, սակայն այդպես էլ չի պատասխանել կամ չի ցանկացել պատասխանել այդ հռչակագիրը որպես սահմանազատման գործընթացի իրականացման համար փաստաթուղթ կիրառելու իրավաչափության վերաբերյալ հարցին, քանի որ այդ փաստաթղթի հիմքում ընկած չէ որևէ քարտեզ, ինչը պարտադիր պայման է սահմանազատման գործընթացում։

Անդրադառնալով այդ գործընթացի վերաբերյալ հայ դիվանագետների քննադատություններին՝ Միրզոյանը հավաստիացրել է, որ մեծ ջանքեր է գործադրում ներքաղաքական գործընթացներում չներգրավվելու համար, թեև քաղաքական թիմի անդամ է: "Ես նաեւ ջանքեր եմ գործադրում, որպեսզի այդ, այսպես կոչված, գործընկերներին պատասխանում չանցնեմ թույլատրելիի սահմանները։ Ըստ երեւույթին, ձեր նշած դիվանագետներն այն դասալիքներն են, որոնք լքել են իրենց պաշտոնները հենց նույն օրերին, երբ Հայաստանի ինքնիշխան տարածքի նկատմամբ ռազմական ագրեսիա էր իրականացվում։ Ես չեմ կարող լուրջ վերաբերվել մարդկանց այս կատեգորիային: Բայց իրականությունն ավելի վատ է, տորպեդահարելով Ալմա-Աթայի հռչակագրի հիման վրա խաղաղ գործընթացը, այդ մարդիկ շարունակում են տորպեդահարել ինքնիշխանությունը, պետականությունն ու անկախությունը, լավագույն դեպքում, անգիտակցաբար, վատագույն դեպքում ՝ այլ պետությունների թելադրանքով", - հայտարարել է նա։

Ընդ որում, Միրզոյանը հավաստիացրել է, որ Ադրբեջանի հետ վերջին բանակցություններն անցել են կառուցողական հունով՝ նախկինում հայտարարված սկզբունքների հիման վրա, և ինքը ոչինչ չունի ավելացնելու այն ամենին, ինչ ԱԳՆ-ը հայտարարել էր հանդիպման արդյունքների վերաբերյալ։

Նշենք, որ ՀՀ ԱԳ նախարար Արարատ Միրզոյանն անկեղծ չէ, երբ ասում է, թե մի շարք հայ դիվանագետներ դասալքել են այն պահին, երբ երկիրը ենթարկվել է ագրեսիայի: Հայաստանի ինքնիշխան տարածքների նկատմամբ ագրեսիան տեղի է ունեցել 2021 թվականի մայիսի 12-13-ին։ Դրանից հետո Հայաստանի վարչապետ Նիկոլ Փաշինյանը բառացիորեն հայտարարել է, որ Հայաստանի իշխանությունները չեն կռվի "այն լեռնագագաթների համար, որտեղ կես տարի ձյուն է", և " չեն գնա իրավիճակի սրման Սյունիքի մարզի "Սև լիճի" 30%-ի պատճառով": Այդ հայտարարություններից  օրեր անց Հայաստանի այն ժամանակվա ԱԳ նախարարի պաշտոնակատար Արա Այվազյանը հրաժարական է տվել, ինչը բացատրել է իշխանությունների նախաձեռնությունների հետ անհամաձայնությամբ, որոնք նա համարել է ազգային շահերին հակասող: Դրանից հետո հրաժարական տվեցին ևս մի շարք դիվանագետներ, որոնք համաձայն չէին գործող վարչապետի նման քաղաքականության հետ։