Հինգշաբթի, 18 Ապրիլի 2024 11:07

Արմինֆո. Ռուսական խաղաղապահ զորախմբի Արցախից հեռանալը նախևառաջ ամրագրում է թուրքական գործոնի էական ուժեղացումն ու ամրապնդումը մեր տարածաշրջանում: Այդ մասին Facebook-ի իր էջում գրել է ՀՀ Ազգային ժողովի ընդդիմադիր "Պատիվ ունեմ" խմբակցության պատգամավոր Տիգրան Աբրահամյանը:

 

«Որքան էլ դրա հիմքում առաջին հերթին դիտարկում եմ ՀՀ իշխանության դիրքորոշումն Արցախն Ադրբեջանի կազմում ճանաչելու և Արցախի հարցը օրակարգից հանելու վերաբերյալ, սակայն ակնհայտ է, որ սա իր ռեգիոնալ առաջնահերթությունների տեսակետից հակասում է նաև ՌԴ շահերին:

 

Ռուսաստանի քաղաքականությունը Հարավային Կովկասում բերեց նրան, որ այլ գեոպոլիտիկ կենտրոններ, օգտագործելով իրադրային հնարավորությունները, ստեղծեցին իրավիճակ, որտեղ ՌԴ ազդեցությունը սկսեց թուլանալ, իսկ ի հաշիվ դրան, թուրքական ներկայությունն ուղղակի և անուղղակի ձևով աճեց:

 

Ի՞նչ է լինում նման իրավիճակում. ճիշտ այնպես ինչպես մեզ հետ տեղի է ունեցել տարբեր շրջափուլերում` հայերս կոտորվեցինք, բռնի տեղահանվեցինք, հայրենիք կորցրեցինք, բայց նույնիսկ այս վիճակում դեռ ամբողջությամբ և խորությամբ չկա այն գիտակցումը, թե ինչ եղավ մեզ հետ:

 

Երեկվանից տարբեր ռուս քաղաքական գործիչներ իրավիճակը փրկելու համար հայտարարում են, թե խաղաղապահ առաքելությունն իր խնդիրները լուծեց և դրա համար է հեռանում:

 

Իհարկե, սա ազնիվ մոտեցում չէ, որովհետև անընդհատ շահարկվող 2020 թվականի նոյեմբերի 9-ի եռակողմ հայտարարությունը լրիվ այլ բան էր սահմանել և առաջին հերթին ռուս խաղաղապահների ներկայությամբ հայկական Արցախի գոյություն: Իսկ թե ինչու ՀՀ իշխանության հետ գործակցաբար դրված իրական խնդիրները չլուծվեցին, այստեղ ևս պատասխանատվության իր չափաբաժինն ունեն ՌԴ այն գործիչներն ու կառույցները, ովքեր Հարավային Կովկասի ու հատկապես Հայաստանի հետ հարաբերություններով են զբաղվում», - ընդգծել է Աբրահամյանը:

 

Նշենք, որ ռուսաստանի խաղաղապահ զորախումբը տեղակայվել էր Արցախում 2020 թվականի նոյեմբերի 9-ին Հայաստանի, Ադրբեջանի և Ռուսաստանի ղեկավարների միջև ստորագրված եռակողմ հայտարարության արդյունքում, որը կասեցրել էր Արցախի նկատմամբ ադրբեջանաթուրքական տանդեմի նախաձեռնած պատերազմը։ Ռուսական խաղաղապահների տեղակայումը տարածաշրջանում նախատեսվում էր մինչև 2025 թվականը։ Անցյալ տարվա սեպտեմբերին Արցախի դեմ Ադրբեջանի ագրեսիայից հետո, ողջ միջազգային հանրության անգործության և արցախցիների զանգվածային արտագաղթի ֆոնին, խաղաղապահների անհրաժեշտությունը, ընդհանուր առմամբ, վերացել է: Կրեմլում արդեն հաստատել են օկուպացված Արցախից ՌԽԶ-ի ուժերի դուրսբերման գործընթացի մեկնարկի փաստը։ Իսկ Բաքվում հաղորդել են, որ այդ որոշումը կայացվել է Ռուսաստանի և Ադրբեջանի ղեկավարների մակարդակով։ Ռուս զինվորականները դուրս են բերվում Ադրբեջանի տարածքով, ըստ ԶԼՄ-ների ՝ Դաղստանի տարածքով: