Արմինֆո.Հայաստանում ամեն տարի օգոստոսի 3-ին կնշվի իրաքյան Սինջարում եզդիների ցեղասպանության զոհերի հիշատակի օրը: ՀՀ Ազգային ժողովի Մարդու իրավունքների պաշտպանության եւ հանրային հարցերի մշտական հանձնաժողովն ապրիլի 15-ի նիստում դրական եզրակացություն է տվել «ՀՀ տոների եւ հիշատակի օրերի մասին» օրենքում փոփոխությունների նախագծին:
Կարգավորումը պայմանավորված է եզդի ազգի նկատմամբ տեղի ունեցած ցեղասպանության հիշատակման, անմեղ զոհերի հիշատակը հարգելու անհրաժեշտությամբ, հասարակության լայն շրջանակի կողմից մարդկային այդ աղետի վերաբերյալ տեղեկացվածության առավել բարձրացմամբ: Այդ մասին ասել է Մարդու իրավունքների պաշտպանության եւ հանրային հարցերի մշտական հանձնաժողովի նախագահի տեղակալ Ռուստամ Բաքոյանը:
«Վերջին ժամանակահատվածում նոր ուժ է ստացել եզդի ժողովրդի նկատմամբ կատարված ցեղասպանությունը ճանաչելու գործընթացը: 2023 թվականին Գերմանիայի Դաշնության Բունդենսթագը միացավ այս նախաձեռնությանը եւ հանուն պատմական արդարության վերականգնման՝ ճանաչեց եւ դատապարտեց 2014 թվականի Սինջարի եզդիների ցեղասպանությունը»,- տեղեկացրել է Ռուստամ Բաքոյանը:
ԱԺ հաղորդագրության համաձայն, պատգամավորը նշել է, որ 2023 թվականի օգոստոսի 1-ին Մեծ Բրիտանիան ճանաչել է «Իսլամական պետություն» ահաբեկչական խմբավորման կողմից եզդիների դեմ իրականացված ցեղասպանությունը: Մեծ Բրիտանիայի որոշումը հետեւել է Գերմանիայի արդարադատության դաշնային դատարանի որոշմանը, որն «Իսլամական պետության» նախկին մարտիկին մեղավոր է ճանաչել ցեղասպանության եւ ռազմական հանցագործությունների համար: Ռուստամ Բաքոյանը նշել է, որ առաջարկվում է օրենքը լրացնել նոր հոդվածով, ըստ որի՝ օգոստոսի 3-ը նշվելու է 2014 թվականի Սինջարի եզդիների ցեղասպանության զոհերի հիշատակի օր:
Հարակից զեկուցող, ԱԺ «Քաղաքացիական պայմանագիր» խմբակցության պատգամավոր Արթուր Հովհաննիսյանը նշել է, որ հայ ժողովուրդը պետք է իր ուրույն տեղն ունենա աշխարհում ցեղասպանությունների կանխարգելման հարցում: Նա կոչ է արել կողմ քվեարկել օրենքի նախագծին:
ՀՀ արտաքին գործերի նախարարի տեղակալ Պարույր Հովհաննիսյանը նշել է, որ ԱԳՆ-ն ողջունում է նախաձեռնությունը: