Առողջապահության նախարարը պատմել է Հայաստանում անպտղության բուժման պետական ծրագրի փոփոխությունների մասին

Արմինֆո. Ս.թ. օգոստոսից կվերանայվի Հայաստանում անպտղության բուժման պետական ծրագրի տարիքային ցենզը: Այդ մասին ապրիլի 11-ին Ազգային ժողովում հայտարարել է առողջապահության նախարար Անահիտ Ավանեսյանը՝ պատասխանելով խորհրդարանականների հարցերին։

Մասնավորապես, նա պատմել է, որ առաջնային անպտղության դեպքում ծրագիրն այսուհետ կգործի մինչև 40 տարեկան կանանց համար, մինչդեռ, գործող կարգավորումներով բուժման և արտամարմնային բեղմնավորման տարիքային ցենզը սահմանվել է 36 տարեկան: Բացի այդ, երկրորդային անպտղության դեպքում, ինչպես նշել է Ավանեսյանը, պետական ծրագրի շահառու կարող են դառնալ ոչ միայն սահմանամերձ շրջանների, այլեւ ամբողջ հանրապետության կանայք։ "Սա շատ կարեւոր առաջընթաց քայլ է", - ընդգծել Է նախարարը: Ընդ որում, նա նշել է, որ Առողջապահության նախարարությունն այս ծրագրով առաջ է շարժվում կես տարին մեկ անցկացվող մոնիթորինգի արդյունքների համաձայն, ինչպես ֆինանսական մասով, այնպես էլ ծրագրի շրջանակներում գրանցված հղիությունների եւ ծնված երեխաների թվով:

Հիշեցնենք, որ վերարտադրողական օժանդակ տեխնոլոգիաների  անվճար կամ արտոնյալ պայմաններով հասանելիության միջոցով Անպտղության բուժման ծրագրի մեկնարկի մասին հայտարարվել էր 2019 թվականի օգոստոսին կառավարության նիստում:

ՀՀ վիճակագրական կոմիտեի տվյալներով ՝ 2024թ. հունվար-փետրվարին Հայաստանում  ծնվել է 5477 երեխա, ինչը 7.3% - ով ցածր է նախորդ տարվա ցուցանիշից: Հաշվետու ժամանակահատվածում ծնելիության գործակիցը 1000 բնակչի հաշվով կազմել է 11,3 պրոմիլ՝ մեկ տարի առաջվա 12,5 պրոմիլի դիմաց։

Նշենք, որ ՄԱԿ-ի Բնակչության հիմնադրամի տվյալների համաձայն, Հայաստանում անպտղությունը (վերարտադրողական տարիքի ընտանիքների շրջանում) կազմում է 16,8% ՝ 15% կրիտիկական մակարդակի դեպքում։