Արմինֆո.Հանձնել Տավուշի 4 գյուղերը՝ նշանակում է Հայաստանը դատապարտել նույն ճակատագրին, ինչ տեղի ունեցավ Արցախի հետ։ Այդ կարծիքին է Հայաստանի պետական տնտեսագիտական համալսարանի Տնտեսագիտության տեսության ամբիոնի դոցենտ Ատոմ Մարգարյանը:
«Դա նշանակում է շատ կարճ ժամանակում թուրքին հանձնել Հայաստան մտնող գազամուղի փականը, երկաթգիծը և դեպի Վրաստան գնացող ավտոմայրուղին։ Իսկ այդտեղից վերադարձը դեպի 1990-ականների սկզբի ցրտի, սովի ու մթի դժնդակ տարիներ հաշված ամիսներ են։ Ուրեմն, լա՛վ մտածեք, հայրենակիցնե՛ր։ Ձերբազատվե՛ք թմբիրից, ոտքի կանգնե՛ք։ Ով ուզում է հանձնել այդ տարածքները, դուռ է բաց անում Հայաստանի ոչնչացման։ Պետք է դա թույլ չտալ, պետք է ամեն գնով պաշտպանել մեր տարածքները․ հնարավոր է, դա լինելու է մեր նոր Սարդարապատը», - գրել է նա «Ֆեյսբուքի» իր էջում։
Հիշեցնենք, որ ավելի վաղ Բաքուն հայտարարել էր Հայաստանի Տավուշի մարզի եւ Ադրբեջանի Ղազախի շրջանի սահմանին գտնվող 4 գյուղերի «անհապաղ վերադարձի» մասին: Հայտարարությունը հաջորդել էր երկու երկրների փոխվարչապետներ Մհեր Գրիգորյանի և Շահին Մուստաֆաևի գլխավորած սահմանագծման հանձնաժողովների նիստին: "Ինչ վերաբերում է Հայաստանի կողմից օկուպացված ադրբեջանական չորս ոչ էքսկլավային գյուղերին (Բաղանիս Այրըմ, Աշաղի Էսկիպարա, Խեյրիմլի և Գիզիլգաջիլի), ապա դրանց պատկանելությունն Ադրբեջանին անվիճելի է, և դրանք ենթակա են անհապաղ ազատման", - ասվում էր հայտարարության մեջ: Բաքվում նաև վստահ են, որ սահմանազատման գործընթացի շրջանակներում «կլուծվի նաև չորս էքսկլավ գյուղերի (հայկական Տավուշում գտնվող Յուխարի Ասկիպարա, Սոֆուլու, Բարխուդարլու, ինչպես նաև Արարատի մարզում ՝ Նախիջևանի հետ սահմանին Քյարքիի (Տիգրանաշեն) ազատման հարցը)»: Ընդ որում, Բաքվում հերքել են Հայաստանի իշխանությունների հայտարարություններն այն մասին, որ Ադրբեջանը օկուպացրել է մոտ 200 քառակուսի կիլոմետր ընդհանուր մակերեսով 31 հայկական բնակավայրի տարածք 5 մարզերում՝ դա որակելով "անհիմն հայտարարություն": Դրանց մի մասն Ադրբեջանի վերահսկողության տակ է անցել դեռևս 1990-ականներին՝ ղարաբաղյան առաջին պատերազմի ժամանակ, մյուս մասը՝ 2021-2022 թվականների ադրբեջանական ագրեսիայի արդյունքում։
Չնայած դրան՝ Փաշինյանը վերջին ասուլիսում հայտարարել է, որ Հայաստանի Հանրապետության տարածքում երբեք նման անվանումներով գյուղեր չեն եղել, ընդ որում, ոչ միայն խորհրդային տարիներին, այլև դրանից հետո: Նրա կարծիքով՝ հետագայում խնդիրներից խուսափելու համար ավելի ճիշտ է նոր կոմունիկացիաներ կառուցել, որպեսզի դրանք անցնեն ՀՀ դե յուրե տարածքով (այն տարածքները, որոնց հավակնում է Ադրբեջանը, գտնվում են Տավուշի մարզում։ Այնտեղ է անցնում Հայաստանը Վրաստանին կապող միջպետական մայրուղին՝ Իջևանով, Նոյեմբերյանով, Բագրատաշենով-խմբ.)։ Ապրիլի 10-ին վարչապետը հայտարարել է սահմանազատումը Տավուշի մարզից սկսելու պատրաստակամության մասին, ընդ որում, չի երաշխավորել խաղաղություն՝ անգամ տվյալ տարածքները Բաքվին հանձնելուց հետո։