Չորեքշաբթի, 3 Ապրիլի 2024 15:40

Արմինֆո. Հայաստանում չկա իշխանություն, կա հակաազգային, հակապետական, հակաժողովրդական ռեժիմ։ Այդ մասին ապրիլի 3-ին լրագրողներին հայտարարել է ՀՀԿ վարչության անդամ Էդուարդ Շարմազանովը։

 

Նրա խոսքով՝ ներկայիս իշխանությունը ոչ մի կապ չունի ժողովրդավարության հետ։ "Հայաստանում կա մեկ մարդու իշխանություն, և, եթե այդ մարդն ասի, օրինակ, որ Արմեն Աշոտյանը մարգարե է, ապա բոլորն անխտիր նրան հրեշտակ կճանաչեն, իսկ եթե այդ անձը մեղադրի Աշոտյանին բոլոր մահացու մեղքերի մեջ, բոլորը կընդունեն այդ մեղադրանքները", - ասել է քաղաքական գործիչը:

 

Նա նշել է, որ, բարեբախտաբար, հայ հասարակությունը սկսում է սթափվել, և մեծամասնությունն արդեն ընդունում է, որ երկրում կան քաղաքական բանտարկյալներ, որոնց թվում են, բացի Աշոտյանից,  նաև Մամիկոն Ասլանյանը, Նարեկ Մալյանը, Վազգեն Սաղաթելյանը և այլոք:

 

Շարմազանովը նշել է, որ ՀՀ ներկայիս վարչապետ Նիկոլ Փաշինյանը, գալով իշխանության, հայ ժողովրդի գլխին բերեց երկու պատերազմ և Արցախի հայաթափում: Հայ հասարակությունն այդ իրադարձությունների ականատեսն է, այն կտրված չէ իրականությունից։ Երկրի քաղաքացիները հիասթափվել են Փաշինյանից, և այդ հարցի շուրջ կոնսենսուսն ակնհայտ է։ "Ես համոզված եմ, որ երկրի քաղաքացիների ճնշող մեծամասնությունն արդեն իսկ մտավախություն է հայտնում, որ Փաշինյանի ռեժիմը խիստ վտանգավոր է նրանցից յուրաքանչյուրի առողջության համար։ Այդ իսկ պատճառով նոր փուլում անհրաժեշտ է պետական մտածողությամբ ուժերի համախմբում՝ այդ գաղափարի շուրջ հասարակությանը միավորելու նպատակով ։ Կստացվի, լավ կլինի, չի ստացվի, շատ վատ կլինի", - փաստել է քաղաքական գործիչը։

 

Նշենք, որ այսօր ՀՀ հակակոռուպցիոն դատարանում շարունակվում է կրթության և գիտության նախկին նախարար, ՀՀԿ փոխնախագահ Արմեն Աշոտյանի գործով դատաքննությունը, ով 2023 թվականի հունիսի 16 - ին երկու ամսով կալանավորվել էր: Այդ ժամանակից ի վեր խափանման միջոցը պարբերաբար երկարաձգվում է։ Աշոտյանը, ինչպես և Երևանի պետական բժշկական համալսարանի նախկին ռեկտոր Միքայել Նարիմանյանը, մեղադրվում են բուհի մոտ 100 հազար դոլարի չափով գույք յուրացնելու համար: