Հայաստանի և Ղազախստանի փոխվարչապետները կարևորել են Կասիմ-Ժոմարտ Տոկաևի առաջիկա այցը ՀՀ

Արմինֆո.Հայաստանի Հանրապետության փոխվարչապետ Մհեր Գրիգորյանի և Ղազախստանի Հանրապետության փոխվարչապետ Սերիկ Ժումանգարինի համանախագահությամբ տեսակապի ձևաչափով կայացել է Տնտեսական համագործակցության հարցերով հայ-ղազախական միջկառավարական հանձնաժողովի 10-րդ նիստը:

ՀՀ կառավարության հաղորդագրության համաձայն, նիստի շրջանակներում երկու երկրների փոխվարչապետները հանդես են եկել ելույթներով:

Փոխվարչապետ Մհեր Գրիգորյանը ընդգծել է միջկառավարական հանձնաժողովի առանցքային դերը երկկողմ օրակարգի հարցերի լայն շրջանակի առաջմղման, ինչպես նաև նոր հեռանկարային ուղղությունների բացահայտման գործում:

«Մեր նպատակն է հայ-ղազախական գործակցությունն էլ ավելի դինամիկ, արդյունավետ և փոխշահավետ դարձնել՝ ի շահ մեր երկրների և մեր քաղաքացիների։ Մենք մտադիր ենք զարգացնել առևտրատնտեսական համագործակցությունը, խթանել ներդրումները, ապահովել դրանց պաշտպանությունը, զարգացնել ենթակառուցվածքային կապերն ու առևտուրը»,- նիստի ընթացքում նշել է Մհեր Գրիգորյանը:

Անդրադառնալով տրանսպորտային և լոգիստիկ ենթակառուցվածքների զարգացման կարևորությանը՝ փոխվարչապետ Մհեր Գրիգորյանը նշել է տարածաշրջանի համար խոշոր ենթակառուցվածքային նախագծի՝ «Խաղաղության խաչմերուկ»-ի դերակատարությունը, որը ենթադրում է մի շարք տրանսպորտային հաղորդակցությունների ստեղծում և արդիականացում:

Հայ-ղազախական հարաբերությունների զարգացման տեսանկյունից երկուստեք կարևորվել է նաև Ղազախստանի Հանրապետության նախագահ Կասիմ-Ժոմար Տոկաևի՝ առաջիկայում Հայաստան նախատեսված առաջին պաշտոնական այցը:

Ավելի վաղ ԱրմԻնֆո-ն, հղում անելով "Աստանա" դիվանագիտական ակումբի մամուլի ծառայությանը, հաղորդել էր, որ Հայաստանն ու Ղազախստանը պայմանավորվել են համատեղ բիզնես-ակումբի ստեղծման շուրջ: Այդ մասին հայտնի է դարձել Հայաստանի արդյունաբերողների եւ գործարարների միության անդամների հետ "Աստանա" դիվանագիտական ակումբի գործարար պատվիրակության երեւանյան հանդիպման արդյունքում: Աղբյուրի համաձայն, ղազախահայկական բիզնես ակումբը կաջակցի Երևանում Հայաստանի արդյունաբերողների և գործարարների միության և "Աստանա" դիվանագիտական ակումբի միջև ստորագրված համագործակցության հուշագրում ամրագրված նպատակների իրականացմանը: Մասնավորապես, փաստաթուղթն ուղղված է տնտեսական կապերի հետագա ամրապնդմանը, առևտրի ընդլայնմանը, համագործակցության հնարավորությունների ստեղծմանը ներդրումների, ՏՏ և փոխադարձ հետաքրքրություն ներկայացնող այլ ոլորտներում: Բացի այդ, հանդիպման շրջանակում "Աստանա" ԴԱ-ի նախագահ Քայիրբոլատ Սախմետովն առաջարկել է եւս մեկ երկկողմ գործարար համաժողով անցկացնել այս տարի, սակայն՝ արդեն Աստանայում:

ՀՀ վիճակագրական կոմիտեի տվյալներով՝ Հայաստանի և Ղազախստանի միջև առևտրաշրջանառությունը 2023 թվականին հասել է 100.5 մլն դոլարի՝ տարվա ընթացքում գրանցելով 2.4 անգամ աճ։ Ընդ որում, արտահանումն ավելացել է 3.8 անգամ՝ մինչև 71.3 մլն դոլար՝ ներմուծման 23.6%-ով՝ մինչև 29.2 մլն դոլար աճի դեպքում։