Արմինֆո. Տավուշի մարզի Ոսկեպար համայնքի բնակիչների հետ հանդիպմանը վարչապետ Նիկոլ Փաշինյանը հայտնել է, որ 4 գյուղերը պետք է անհապաղ հանձնել Ադրբեջանին, այլապես պատերազմ կլինի: «Ադրբեջանը ուժով կվերցնի, իսկ մենք չենք կարող դիմակայել», - հայտարարել է Փաշինյանը՝ ըստ "Հայաստան" ընդդիմադիր խմբակցության պատգամավոր Գառնիկ Դանիելյանի:
«Ինչպես հայտնի է՝ Նիկոլ Փաշինյանն այսօր անակնկալ այց է կատարել Տավուշի մարզ: Ոսկեպար համայնքում տեղի է ունեցել հանդիպում մարզպետի, Նոյեմբերյան խոշորացված համայնքի ղեկավարի և մի քանի գյուղերի վարչական ղեկավարների ներկայությամբ:
Փաստենք, որ նշված հանդիպմանը ներկա չեն եղել զանգվածային լրատվության ներկայացուցիչները:
Այսինքն՝ Փաշինյանն իր հետ տարած մի տեսախցիկով փորձելու է ստեղծել շինծու տպավորություններ և հերթական անգամ մոլորեցնել հանրությանը:
Հանդիպմանը մասնակից մարդկանց ձեռքից հավաքել են հեռախոսները և այլ իրեր: Այն ացնել է թեժ մթնոլորտում:
Նիկոլ Փաշինյանը հայտնել է, որ 4 գյուղերը պետք է անհապաղ հանձնել Ադրբեջանին, այլապես պատերազմ կլինի, Ադրբեջանը ուժով կվերցնի, իսկ մենք չենք կարող դիմակայել:
Հանդիպման մասնակիցները հարց են ուղղել՝ արդյո՞ք այդ գյուղերի հանձնմամբ Ադրբեջանին չի անցնի նաև միջպետական ճանապարհը, որտե՞ղ են դրա արդյունքում հայտնվելու ադրբեջանցիները, և արդյո՞ք երաշխավորվում է դրանով, որ պատերազմ չի լինի:
Փաշինյանն պատասխանել է՝ չի կարող երաշխավորել, և կարող է ընդամենը հուսալ, որ չի լինի պատերազմ և կփորձի այնպես անել, որ այդ ճանապարհներն անվտանգ կլինեն: Նա նաև հայտնել է, որ Ադրբեջանի հետ նաև Թուրքիան է, և այլ ճար չկա՝ պետք է տանք:
Փաշինյանը կոնկրետ ժամկետներ չի նշել, սակայն մեր տեղեկություններով՝ այցի նպատակը հենց գործողություններն արագացնելն է եղել:
Եվ չնայած որ Փաշինյանն իր հետ նաև մարդիկ է տարել՝ որոշակի մեղմ ֆոն ստեղծելու նպատակով, այդուհանդերձ, գյուղացիները բավականին սուր հարցեր են ուղղել՝ փորձելով հասկանալ, թե, ի վերջո, ադրբեջանցիները որտե՞ղ են կանգ առնելու: Փաշինյանը կրկին իրեն հատուկ մանիպուլացնող ոճով պատասխանել է, որ կաշխատեն այլընտրանքային ճանապարհներ կառուցել և այլն:
Փաստենք, որ սրանով հաստատվում են մեր բոլոր մտահոգությունները. օկուպացիոն ռեժիմի սույն պարագլուխն Ադրբեջանի հետ միասին դուրս է եկել հայ ժողովրդի դեմ և պատերազմի սպառնալիքներով, խաղաղության խոստումներով փուլ առ փուլ հասնելու է նրան, որ մի օր այդ «դեմարկացիան» տեղի ունենա Երևանում», - գրել է Գառնիկ Դանիելյանը՝ «Ֆեյսբուքի» իր էջում:
Հիշեցնենք, որ այսօր վարչապետ Նիկոլ Փաշինյանն այցելել է Տավուշի մարզ: Ոսկեպարում նա հանդիպել է Կիրանցի, Ոսկեպարի, Բաղանիսի և մերձակա բնակավայրերի բնակիչների հետ։ Այդ մասին տեղեկանում ենք "Քաղաքացիական պայմանագիր" կուսակցության Facebook-յան էջից։ Ընդ որում, կառավարող կուսակցությունում ձեռնպահ են մնացել տավուշցիների հետ վարչապետի հանդիպման մանրամասներից։
Մարտի 12-ին կայացած մամուլի ասուլիսի ժամանակ ՀՀ վարչապետը, մեկնաբանելով Հայաստանի Տավուշի մարզի եւ Ադրբեջանի Ղազախի շրջանի սահմանին գտնվող 4 գյուղերի անհապաղ ազատման մասին Բաքվի պահանջը, հայտարարել էր, որ Հայաստանի Հանրապետության տարածքում երբեք նման անվանումներով գյուղեր չեն եղել, ընդ որում ոչ միայն խորհրդային տարիներին, այլեւ դրանից հետո: Միաժամանակ, վարչապետը չէր բացառել, որ դելիմիտացիան կարող է սկսվել Տավուշի մարզից։ Անդրադառնալով տարածքների փոխանակման հնարավորությանը՝ Փաշինյանն ասել էր, որ դա կարող է դեֆորմացնել կամ հանգեցնել լրացուցիչ ռիսկերի։ Այդ համատեքստում, նրա կարծիքով, հետագայում խնդիրներից խուսափելու համար ավելի ճիշտ է կառուցել նոր կոմունիկացիաներ, որպեսզի դրանք անցնեն ՀՀ դե յուրե տարածքով (այն տարածքները, որոնց հավակնում է Ադրբեջանը, գտնվում են Տավուշի մարզում։ Այնտեղ է անցնում Հայաստանը Վրաստանին կապող միջպետական մայրուղին՝ Իջևանով, Նոյեմբերյանով, Բագրատաշենով-խմբ.)։