Արմինֆո.Ադրբեջանն Իրանի համար նույն խնդիրներն է առաջացնում, ինչ Ուկրաինան' Ռուսաստանի։ Նման կարծիք է հայտնել քաղաքագետ Ստեփան Դանիելյանը։
«Ուկրաինայի եւ Ադրբեջանի պետական քաղաքականությունը հիմնված է ազգայնականության վրա, ծայրահեղ դրսեւորումներով, հաճախ հիմնված ատելության քարոզի վրա։ Եթե Ուկրաինան համարում է, որ Ռուսական պետականությունը ծնվել է Ուկրաինայում' Կիեւում, սպա Ադրբեջանում համարում են, որ թյուրքերն են միավորել Իրանը, 7-րդ դարում արաբական արշավանքներից հետո փլուզված պատմական Իրանի ավերակների վրս, իսկ մինչ այդ թյուրքական ցեղերն էին տիրում այնտեղ, այսինքն իրենք Իրանում պետականստեղծ էթնոս են։
Ռուսաստանն ու Իրանը բազմազգ իմպերիաներ են, Ադրբեջանն ու Ուկրաինան ազգայնամոլության տարածքներ են։ Եթե Ուկրաինան Հակառուսաստան է դարձել, ապա Ադրբեջանը' Հակաիրան։
Դա իմպերիների (կայսրություն բառը չի արտահայտում իմպերիանի բնույթը) եւ ազգայնական նախագծերի կոնֆլիկտներ են ու նրանք բնույթով անհամատեղելի են։ Իրանի եւ Ադրբեջանի միջեւ կոնֆլիկտը կանխորոշված է, խնդիրը ժամանակի եւ ներգրավվող ուժերի կազմի մեջ է», - գրել է Դանիելյանը՝ «Ֆեյսբուքի» իր էջում։
Հավելենք, որ այսօր Ադրբեջանում Իրանի դեսպան Սեյիդ Աբբաս Մուսավին հաղորդել է, որ ԱՀ և ԻԻՀ նախագահներ Իլհամ Ալիևը և Իբրահիմ Ռաիսին կհանդիպեն Խուդաֆերինի (Արցախի օկուպացված տարածք) սահմանին՝ մինչև Նովրուզի տոնը: Նա նաև տեղեկացրել է, որ Թեհրանում Ադրբեջանի դեսպանատունը պատրաստվում է առաջիկայում վերսկսել իր գործունեությունը, և պատվիրակությունն արդեն ժամանել է Թեհրան ՝ անհրաժեշտ միջոցառումները հեշտացնելու համար: