Ոչ թե դիվերսիֆիկացում, այլ հարաբերությունների խաթարում. քաղաքագետ

Արմինֆո.Ռուս-հայկական ուղղությամբ այսօր տեղի ունեցող գործընթացներն այն չեն, ինչ կարելի է դիվերսիֆիկացիա անվանել ։ Այդ մասին լրագրողների հետ հանդիպման ժամանակ հայտարարել է քաղաքագետ Արման Ղուկասյանը։

<Երբ փորձում ես զարգացման լրացուցիչ ուղիներ փնտրել, չես քանդում զարգացման հիմնական վեկտորը, ինչպես հիմա անում են Հայաստանի իշխանությունները։ Ակնհայտ է, որ Մոսկվայի հետ քաղաքական հարաբերությունները խզելուն նպատակաուղղված քաղաքականություն է ընթանում", - կարծում է նա ։ "Հետաքրքիր է, որ Հայաստանի իշխանությունները քաղաքականապես շարժվում են դեպի Արևմուտք, բայց ցանկանում են պահպանել տնտեսական հարաբերությունները Ռուսաստանի հետ, որովհետև շատ լավ հասկանում են, որ ռուսական շուկայի նկատմամբ այլընտրանք Հայաստանը, պարզապես, չունի ։ Եվրոպական շուկաները լոգիստիկայի և այլ ներքին առանձնահատկությունների առնչությամբ չեն կարող այլընտրանք դառնալ, հայկական ապրանքները եվրոպական շուկաներում անմրցունակ են, առավել ևս, այն երկրների ապրանքների հետ, որոնք այնտեղ ընդհանուր սահման ունեն, - նշել է նա։

Ղուկասյանի խոսքով՝ Հայաստանի ղեկավարությունը շատ հպարտ է 2023 թվականի արդյունքներով երկնիշ տնտեսական աճով, սակայն այդ աճը (շուրջ 9 տոկոս) ԵԱՏՄ-ին Հայաստանի մասնակցության արդյունք է ։ <Միայն Հայաստանի և Ռուսաստանի միջև ապրանքաշրջանառությունը 2023 թվականին կազմել է ավելի քան 7 մլրդ դոլար (42,7% աճ): Սակայն հայկական իշխանությունները ոչինչ չեն նշում այն առավելությունների մասին, որոնք մեր տնտեսությանը տալիս են Ռուսաստանը և ԵԱՏՄ մյուս երկրները", - ընդգծել է նա։

Ղուկասյանը նշել է, որ Փաշինյանի՝ Ժնև և Փարիզ կատարած ուղեւորությունից հետո հակառուսական հռետորաբանությունը Հայաստանում զգալիորեն ակտիվացել է։ "Իշխանության բարձրաստիճան ներկայացուցիչների կողմից ամենօրյա ռեժիմով մենք անընդհատ հարձակումներ ենք լսում Ռուսաստանի հասցեին ։ Բայց նման քաղաքականությունը չի կարող ունենալ վերջնական արդյունք>, - ընդգծել է Ղուկասյանը։ Նրա խոսքով ՝ երկրների միջև խնդրահարույց հարցերը լուծվում են այլ, փակ ռեժիմով, այլ ոչ թե նպատակաուղղված հրապարակային ։ Այնպես որ, այստեղից կարելի է եզրակացնել, որ նպատակը ոչ թե հարցեր լուծելն է, այլ իրավիճակն էլ ավելի սրելը ։ Ղուկասյան նաև նշել է, որ տեղեկատվական տիրույթում ակտիվորեն շրջանառվում է այն միտքը, որ Հայաստանի իշխանությունները ծրագրում են հայտ ներկայացնել Եվրամիությանն անդամակցելու թեկնածու երկրի կարգավիճակ ստանալու նպատակով: <Նման կարգավիճակ ստանալու համար, անշուշտ, արտաքին ուժերը շահագրգռված են Հայաստանը տեսնել որպես երկիր, որը գնում է Ռուսաստանի հետ հարաբերությունների խզման։ Միամտություն է կարծել, թե Ռուսաստանի հետ քաղաքական խզումից հետո Հայաստանը կշարունակի իր տնտեսական բարգավաճումը։ Նման քաղաքականությունը կարող է Հայաստանին բերել, մեղմ ասած, ոչ լավագույն վիճակի", - ասել է նա ։

Քաղաքագետը հատկանշական է համարել, որ նախօրեին ՌԴ նախագահի մամուլի քարտուղար Դմիտրի Պեսկովը հայտարարեց, թե Հայաստանը պաշտոնապես չի տեղեկացրել ՌԴ-ին Երևանի "Զվարթնոց" օդանավակայանից ՌԴ սահմանապահներին դուրս բերելու մասին: Պեսկովի հայտարարությանը անմիջապես հաջորդեց Հայաստանի Անվտանգության խորհրդի քարտուղար Արմեն Գրիգորյանի հայտարարությունն այն մասին, որ Հայաստանն արդեն գրավոր տեղեկացրել է Ռուսաստանին, որ մտադիր է դուրս բերել ռուս սահմանապահներին Երևանի "Զվարթնոց" օդանավակայանից: Այնուհետև, ինչպես կարծում է Ղուկասյանը, ամենայն հավանականությամբ, կլինի ՀԱՊԿ-ից դուրս գալու փորձ, Հայաստանի ողջ տարածքից ՌԴ սահմանապահների դուրս բերում, իսկ հետո հերթը կհասնի նաև Գյումրիի 102-րդ ռուսական ռազմակայանին:

"Արդյո՞ք սա արտաքին քաղաքականության կամ անվտանգության համակարգի դիվերսիֆիկացում է, ինչպես ասում են հանրապետության իշխանությունները: Մենք բոլորս կողմ ենք Հայաստանի բարեկեցությանը և բարգավաճմանը, նրա ինքնիշխանությանը և անվտանգությանը, բայց այն քայլերը և այն քաղաքականությունը, որն այսօր կյանքի է կոչվում Հայաստանի իշխանությունների կողմից, չեն կարող մեր երկրի համար լավ ապագա ապահովել։ Այս քայլերն ավելի շատ լուրջ ռիսկեր ու սպառնալիքներ են ստեղծում։ Դեռ երբեք Ռուսաստանի դեմ ուղղված քաղաքականությունը  ոչ մի երկրի լավ արդյունք չի տվել։ Օրինակները չափազանց շատ են, եւ պետք է, պարզապես, շուրջը նայել>, - ընդգծել է Արման Ղուկասյանը։

Ինչ վերաբերում է մամուլում շրջանառվող տեղեկություններին, թե՝ Փաշինյանը նախատեսում է աշնանը հանրաքվե անցկացնել ՀՀ սահմանադրության փոփոխության վերաբերյալ, Ղուկասյանն ընդգծել է, որ, եթե հանրաքվեն կայանա, ապա հենց ժողովուրդը պետք է քվեարկի արտաքին քաղաքական վեկտորի փոփոխության օգտին: Ղարաբաղյան 44-օրյա պատերազմից հետո հայկական իշխանությունների կողմից հակառուսական տրամադրությունների կանոնավոր գեներացման մեջ հենց վերը նշված նպատակն է թաքնված ։ Այսինքն, ժողովուրդը կքվեարկի, չկարողանալով իմանալ ճշմարտությունը, քանի որ վերջին երկու-երեք տարիների ընթացքում ողջ պետական մեքենան բոլոր հնարավոր տեղեկատվական ռեսուրսներով Ռուսաստանին մեղադրում էր հակահայկական քաղաքականության մեջ։ Իսկ իրականում, կարծում է Ղուկասյանը, հայկական իշխանության ներկայացուցիչներն իրենց պատասխանատվությունը բարդում էին Ռուսաստանի վրա ՝ նրան դարձնելով Հայաստանի կրած բոլոր դժբախտությունների գլխավոր մեղավորը ։

Քաղաքագետը ցավով է նշել, որ նման քաղաքականությունն արդեն տալիս է իր բացասական պտուղները։ <Հայաստանը Ռուսաստանի հարևան երկրների բարեկամության վարկանիշում, որը կազմել է Հաղորդակցությունների զարգացման ազգային հետազոտական ինստիտուտը (ք.Մոսկվա) 2023 թվականի համար, զբաղեցրել է 10-րդ տեղը: 2022 թվականին Հայաստանը 5-րդ տեղում էր ։ Մեկ տարվա ընթացքում թռիչքաձև քայլերով մենք վարկանիշում ընկանք շնորհիվ այն քաղաքականության, որն այսօր ակտիվորեն իրագործվում է պաշտոնական Երևանի կողմից", - եզրափակել է Ղուկասյանը։