Հայաստանը ԵՄ հետ քննարկումներ չի անցկացրել Թուրքիայի հետ սահման դիտորդներ ուղարկելու շուրջ. ԱԽ քարտուղար

Արմինֆո. Հայաստանը ԵՄ հետ քննարկումներ չի ունեցել հայ-թուրքական սահման եվրոպացի դիտորդներ ուղարկելու վերաբերյալ։ Այդ մասին ՀՀՀ-ի հարցազրույցում հայտարարել է Անվտանգության խորհրդի քարտուղար Արմեն Գրիգորյանը։

Նշենք, որ ՀՀ-ում ԵՄ քաղաքացիական առաքելության գործունեության համատեքստում Եվրոպական խորհրդարանի կողմից ընդունված Տնդհանուր արտաքին և անվտանգության քաղաքականության մասին հաշվետվությունում Եվրամիությանը և նրա անդամ պետություններին կոչ է արվել ուժեղացնել EUMA-ի մանդատը, ընդլայնել դրա կազմը, երկարաձգել գործողության ժամկետը, ինչպես նաև դիտորդներ տեղակայել Թուրքիայի հետ սահմանի երկայնքով:

"Մենք մինչ օրս նման քննարկում չենք ունեցել", - վստահեցրել է Գրիգորյանը:

Անդրադառնալով Ներքին Հանդում սահմանային վերջին միջադեպին, և, չնայած ՀՀ ԱԱԾ հայտարարությանն այն մասին, որ ռուս սահմանապահները որևէ կերպ չեն խոչընդոտում հայ-ադրբեջանական սահմանի որևէ հատվածում եվրոպացի դիտորդների գործունեությանը, Գրիգորյանը շարունակել է պնդել, որ Հայաստանում տեղակայված ԵՄ քաղաքացիական առաքելության դիտորդները մուտք չունեն Սյունիքի մարզի Ներքին Հանդ բնակավայր: "Նման խնդիր կա, և մենք մտադիր ենք լուծել այն", - ասել է ԱԽ քարտուղարը: Նա ևս մեկ անգամ նծել է, որ այնտեղ կան ռուս սահմանապահներ, որոնք տեղակայված են ՀՀ անվտանգությունն ապահովելու համար։ "Ներքին Հանդ գյուղում տեղակայված ՌԴ ԱԴԾ սահմանապահ հենակետում գտնվում են սահմանապահ զորքերի ներկայացուցիչները, և նրանք այնտեղ են՝ Հայաստանի անվտանգությունն ապահովելու համար։ Փաստաթղթերով Ռուսաստանը Հայաստանի գործընկերն է անվտանգության ապահովման ոլորտում։ Միգուցե հիմա նրանք դա չեն ընդունում, և 2020 թվականից մենք տեսնում ենք, որ 1990-ականներին ներդրված մեխանիզմն, ընդհանրապես, չի աշխատում ։ Ռուսաստանն այնտեղ ներկայություն ունի և չի կարողացել կանխել էսկալացիան", - կրկնել է Գրիգորյանը։

Հայ պաշտոնյան նաև դրական պատասխան է տվել այն հարցին, թե արդյոք կավելացվի Հայաստանում ԵՄ քաղաքացիական առաքելության դիտորդների թիվը: "Այո, քանի որ Հայաստանի և Ադրբեջանի միջև սահմանը շատ երկար է, և այն ռեսուրսները, որոնք մինչ այժմ ունեցել է ԵՄ քաղաքացիական առաքելությունը, բավարար չեն պատշաճ մակարդակով աշխատանք ապահովելու համար։ Մենք կարծում ենք, որ ԵՄ առաքելությունն արդյունավետ աշխատանք է տանում, ուստի այն պետք է էլ ավելի մեծ հնարավորություններ ունենա աշխատանքը շարունակելու և այն ավելի արդյունավետ դարձնելու համար", - ասել է Գրիգորյանը։

Հարցին, թե արդյոք հնարավոր է, որ ԵՄ առաքելությունը դիտարկի ոչ միայն Ադրբեջանի, այլև Թուրքիայի և Իրանի հետ սահմանը, Գրիգորյանը պատասխանել է, որ առաքելությունը գործում է միայն հայ-ադրբեջանական սահմանի երկայնքով:

Մեկնաբանելով Ռուսաստանի ԱԳՆ պաշտոնական ներկայացուցիչ Մարիա Զախարովայի հայտարարությունն այն մասին, որ ԵՄ դիտորդները "հետախուզական գործունեություն են ծավալում Ռուսաստանի և Իրանի դեմ", Ախ քարտուղարն այդ հայտարարությունն անհասկանալի է որակել:

"Ես չեմ հասկանում, թե ինչու է Ռուսաստանը, բարձրաձայնելով իր խնդիրներն այլ երկրների հետ, ներգրավում երրորդ պետություններին։ Նախ, ԵՄ դիտորդները ներկա չեն Հայաստանի և Իրանի սահմանին, ես չեմ հասկանում, թե ինչու են Ռուսաստանի ներկայացուցիչները նման դժգոհություններ ներկայացնում։ Պարզ է, որ նրանք ներկա են միայն Ադրբեջանի հետ սահմանին, կայունություն են բերում տարածաշրջան, կայունությունը բխում է Հայաստանի շահերից։ Ես չգիտեմ, թե ինչպես ԵՄ դիտորդները կարող են լրտեսել Ռուսաստանին։ Ռուսաստանը կարող է ցանկացած մեղադրանք ներկայացնել, թող փաստեր ներկայացնեն, այդ ժամանակ կքննարկենք", - հավաստիացրել է պաշտոնյան:

Ճշտմանը, թե արդյոք Հայաստանը պատրաստվում էր դիտարկել ԵՄ անդամակցության հարցը, Գրիգորյանը նշել է, որ եթե Եվրամիությունը Երևանին առաջարկի անդամակցություն, ինքը կարձագանքի:

Դիտարկմանը, թե Երևանն արդեն պատասխանել է հայտարարությամբ, որ պատրաստ է խորացնել կապերը այնքանով, որքանով ցանկանում է և պատրաստ կլինի Եվրամիությունը, Գրիգորյանը նշել է, որ ԵՄ-ն Հայաստանի հետ ունի շատ ընդլայնված օրակարգ ՝ վիզային ռեժիմի ազատականացումից մինչև խաղաղության եվրոպական գործիք: "Անվտանգությունը շատ կարևոր տեղ է զբաղեցնում Եվրոպական միության օրակարգում ։ Ֆրանսիան լայնածավալ ռազմատեխնիկական համագործակցություն է սկսել Հայաստանի հետ", - ասել է Գրիգորյանը։

Անդրադառնալով այն հակափաստարկներին, թե Ֆրանսիայի կողմից մատակարարվող զենքի տեսակները սահմանափակ են, իրական զենք չկա, Գրիգորյանը հայտարարել է, որ զարմացած է նման կարծիքներից:

"Ֆրանսիացիները մեզ տրամադրում են առաջադեմ տեխնոլոգիաներով սպառազինություն", - եզրափակել է Գրիգորյանը: