Չորեքշաբթի, 28 Փետրվարի 2024 14:15

Արմինֆո.Այսօր Միչիգանում Դեմոկրատական կուսակցության նախագահական թեկնածուի շուրջ  նախնական քվեարկությունում ռեկորդային թվով ամերիկահայեր քվեարկել են ԱՄՆ նախագահ Ջո Բայդենի թեկնածության դեմ՝ «Հայերի՝ Արցախի բնիկ բնակիչների ցեղասպանությանը նրա մեղսակցության պատճառով»: Այդ մասին հաղորդում է Ամերիկայի Հայ դատի հանձնախումբը (ANCA)։

 

Նշվում է, որ «Ջո Բայդենը կատարել է իր ընտրությունը. զինել է Ադրբեջանին՝ հայերի ցեղասպանություն իրականացնելու համար»։ «Այսօր մենք կատարել ենք մեր ընտրությունը ՝ պատասխանատվության ենք ենթարկում նրան այդ հանցագործության կատարման համար», - հայտարարել է Միչիգանի նահանգի Հայ դատի հանձնախմբի ազգային խորհրդի անդամ Ծովինար Հացաքորցյանը (Dzovinar Hatsakordzian)։

 

Վերջերս The Armenian Weekly շաբաթաթերթում հրապարակված հոդվածում Հացաքորցյանը նշել էր, թեր Բայդենը նյութապես զինել է և բարոյապես ոգեշնչել էԱդրբեջանին՝ իրականացնելու Արցախի հայերի ցեղասպանությունը: «Բայդենը նաև հրաժարվել է դատապարտել Ադրբեջանի այս հանցագործությունը ։ Նա սովորականի պես գործեր է վարում Ադրբեջանի կառավարության հետ և հրաժարվում է պատժամիջոցներ կիրառել նրա ղեկավարների դեմ», - ասվում էր հոդվածում։ Նաեւ նշվում էր, թե «Բայդենը ոչ մի օգնություն չի ուղարկել Արցախին մինչև Ադրբեջանի կողմից շրջափակումը և գրեթե օգնություն չի ուղարկել փախստականներին նաև Ադրբեջանի կողմից Արցախի դեմ ագրեսիա իրականացնելուց հետո»: Նշվում էր, թե նախագահ Բայդենը արգելափակել է նաև ՄԱԿ-ի ՝ Ադրբեջանին դատապարտող նախաձեռնությունները, որոնք ապահովում են հայերի անվտանգ վերադարձն Արցախ ՝ միջազգային մանդատին համապատասխան: "Բայդենը դեմ է արտահայտվել Կոնգրեսի ՝ առանց բացառության բոլոր միջոցառումներին, որոնք ուղղված են Ադրբեջանին պատասխանատվության ենթարկելուն, Արցախից փախստականներին աջակցելուն կամ հայ ռազմագերիների ազատ արձակումն ապահովելուն", - ասվում էր հոդվածում ։

 

Դրա հետ մեկտեղ, Ամերիկայի Հայ դատի հանձնախմբի գործադիր տնօրեն Արամ Համբարյանը պարզաբանել է, որ "ԱՄՆ նախագահի կողմից Ալիևի ցեղասպան ռեժիմին աջակցությունը միշտ էլ վատ քաղաքականություն է եղել։ Եվ հիմա դա վատ քաղաքականություն է»:

 

Միչիգանում Դեմոկրատական կուսակցության թեկնածուի շուրջ նախնական քվեարկությունից օրեր առաջ որոշ լրատվամիջոցներ, այդ թվում POLITICO-ն եւ New York Times-ը, նշել են հայ ընտրողների կարեւոր դերը, որոնք չեն պաշտպանում կոնկրետ թեկնածուին:

 

Ամերիկայի Հայ դատի հանձնախումբը նշում է, որ ANCA-ում դեմ են Բայդենի օգնականների այն պնդումներին, ինչպես հաղորդում է POLITICO-ն, որ 2021 թվականին ԱՄՆ նախագահի կողմից Հայոց ցեղասպանության ճանաչումը նրա "բարեխղճության եւ մարդու իրավունքների հանձնառության" ապացույցն էր։ Ամերիկայի Հայ դատի հանձնախմբի ծրագրերի տնօրեն Ալեքս Գալիցկին պարզաբանել է. <Տեսնելով ամերիկահայ ընտրողների վրդովմունքը՝ Բայդենի օգնականները փորձում են կոծկել նրա մեղսակցությունը Արցախի ադրբեջանական ցեղասպանությանը՝ նրա կողմից Հայոց ցեղասպանության ճանաչումը ցինիկաբար օգտագործելով քաղաքական միավորներ ստանալու համար: Ամերիկահայերին չի հաջողվի երկու անգամ խաբել»։

 

Հիշեցնենք, որ Հայ դատի հանձնախումբն ու հայկական մյուս կազմակերպություններն առաջին անգամ չէ, որ կոչ են անում իրենց հայրենակիցներին ձայն չտալ Ջո Բայդենի օգտին՝ նրան մեղադրելով Բաքվի վարչակազմին աջակցելու համար։ Նշենք, որ տարբեր գնահատականներով, ԱՄՆ - ում բնակվում է 1.8-1.9 մլն հայ։ Նրանց հիմնական մասն ապրում է Լոս Անջելեսում, Նյու Յորքում, Դեթրոյթում, Բոստոնում, Չիկագոյում, Ֆիլադելֆիայում, Ֆրեզնոյում, Սան Ֆրանցիսկոյում, Պրովիդենսում ։

Այնուամենայնիվ, նշենք, որ Միչիգանի նախնական քվեարկությունում ԱՄՆ նախագահ Ջո Բայդենը և նախկին նախագահ Դոնալդ Թրամփը հաղթանակ են տարել, ինչը ևս մեկ անգամ վկայում է այն մասին, որ նոյեմբերին կայանալիք ընտրություններում նրանց կոշտ դիմակայությունն անխուսափելի կլինի: Դիտորդները նշում են, որ Միչիգան նահանգը դարձել է Բայդենի գործողություններից դժգոհ ընտրողների ակտիվության էպիկենտրոնը: Սակայն առայժմ նման ձայների թիվը 13 տոկոսից պակաս է եղել։ Սպիտակ տան և Բայդենի շտաբի ներկայացուցիչները վերջին շաբաթներին մեկնել են Միչիգան ՝ համայնքների ղեկավարների հետ զրույցներ անցկացնելու համար: Ինչ վերաբերում Է Թրամփին, ապա նա արդեն հեշտությամբ հաղթել է հինգ նահանգների Հանրապետականների նախնական քքվեարկություններում։ Միչիգանում, ըստ տեղեկությունների, նա ստացել է ձայների մոտ 68 տոկոսը:

 

ANCA-ում նշում են, որ հանձնախումբն ընդլայնված քարոզարշավ է անցկացրել ամերիկահայերի շրջանում, որոնք զգալի դեր կխաղան առանցքային տատանվող նահանգներում դեմոկրատական կուսակցության նախնական քվեարկությունների ժամանակ: "2020 թվականին Բայդենը մրցակցից առաջ էր անցել Միչիգանում, որտեղ բնակվում են 72 հազար համերիկահայեր, ընդամենը 154 188 ձայնով (50,6% ՝ 47,8% - ի դիմաց)", - ընդգծել են Ամերիկայի Հայ դատի հանձնախմբում, նշելով, որ "հաղթանակի ճանապարհը Միչիգանով է անցնում": Մինչդեռ, հիմնվելով համայնքների ժողովրդագրական հետազոտությունների վրա, Ամերիկայի Հայ դատի հանձնախումբը հաշվարկել է, որ տատանվող վեց նահանգներում ՝ Արիզոնա, Ջորջիա, Փենսիլվանիա, Միչիգան, Նևադա և Վիսկոնսին, ապրում է 206 հազար հայ, որոնք կարող են վճռորոշ դեր խաղալ 2024 թվականի անողոք նախագահական ընտրություններում: