Մհեր Գրիգորյան․Սահմանազատման գործընթացը ոչ միայն քարտեզներով աշխատանք է, այլ, առաջին հերթին, իրավական հիմքերի բացահայտում, որոնց հիման վրա դրանք կազմվել են

Արմինֆո.Սահմանազատման գործընթացը ոչ միայն քարտեզներով աշխատանք է, այլև, առաջին հերթին, իրավական հիմքերի բացահայտում, որոնց հիման վրա դրանք կազմվել են։ Այս մասին ճեպազրույցում հայտարարել է փոխվարչապետ Մհեր Գրիգորյանը:

Անդրադառնալով իրավական հիմքերին՝ նա նշել է Սոչիում և Պրահայում Երևանի և Բաքվի միջև բարձր մակարդակով ձեռք բերված պայմանավորվածությունները, որտեղ հստակ հղում կա Ալմա - Աթիի հռչակագրին: "Դա նշանակում է, որ մենք պետք է գործ ունենանք 1991 թվականի դեկտեմբերի դրությամբ սահմանագծի վերարտադրման հետ", - ասել է փոխվարչապետը:

Հարցին, թե երբ կկայանա հայ - ադրբեջանական սահմանի սահմանազատման երկկողմ հանձնաժողովի հերթական հանդիպումը, Գրիգորյանը պատասխանել է, որ հաջորդ հանդիպման ամսաթվի վերաբերյալ դեռ պայմանավորվածություն ձեռք չի բերվել:

Հիշեցնենք, որ 2022 թվականի հոկտեմբերի 7-ին Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումից հետո, որը տեղի է ունեցել Ֆրանսիայի նախագահ Էմանուել Մակրոնի և Եվրախորհրդի ղեկավար Շառլ Միշելի նախաձեռնությամբ Պրահայում, կողմերը հրապարակել են համատեղ հայտարարություն, որում ասվում է, որ Հայաստանն ու Ադրբեջանը հաստատել են իրենց հավատարմությունը ՄԱԿ-ի կանոնադրությանը և 1991 թվականի Ալմա-Աթիի հռչակագրին, որոնցով երկու կողմերը ճանաչում են միմյանց տարածքային ամբողջականությունն ու ինքնիշխանությունը: Նրանք հաստատել են, որ դա հիմք կծառայի սահմանազատման հանձնաժողովների աշխատանքի համար։