Գեղարքունիքի բնակիչները փակել են Երևան-Մարտունի մայրուղին՝ պահանջելով չեղարկել աշխատանքային միգրանտներին հարկելու ՊԵԿ որոշումը

Արմինֆո. Գեղարքունիքի աշխատանքային միգրանտները փակել են Երևան - Մարտունի մայրուղին ՝ պահանջելով չեղարկել Ռուսաստան սեզոնային աշխատանքի մեկնած աշխատավորներին լրացուցիչ հարկելու մասին ՊԵԿ որոշումը:

Ուշագրավ է, որ վերջիններս ՊԵԿ-ից ծանուցումներ են ստացել ՀՀ-ում լրացուցիչ հարկային պարտավորությունների (դեռևս 2022 թվականից) և տուգանքների մասին՝ նախապես քաղաքացիներին չտեղեկացնելով քաղաքացիներին նման նորամուծությունների մասին: Աշխատանքային միգրանտները Ռուսաստանում 13 տոկոսի չափով հարկեր են վճարել, ունենալով գործատուների հետ աշխատանքային պայմանագրեր, մինչդեռ, Հայաստանում եկամտահարկը կազմում է 20 տոկոս: Պետեկամուտների կոմիտեն այժմ 183 օրից պակաս ՌԴ-ում մնացած աշխատավորներից պահանջում է Հայաստանում վճարել 7 տոկոսի տարբերություն, գումարած, ամեն օր չվճարելու համար նրանց պարտավորեցնելով վճարել 0,4 տոկոսի չափով տուգանք։

<Մենք պահանջում ենք արդարություն: Խնդիրը դառնում է գլոբալ: Ժողովրդի ձայնը չի լսվում", - դժգոհել է ակցիայի մասնակիցներից մեկը։ Նա նշել է, որ այստեղ հավաքվել է աշխատանքային միգրանտների ընդամենը 2-3 տոկոսը, որոնք իրենց հացը վաստակում են Ռուսաստանում ծանր աշխատանքով։

Գեղարքունիքի աշխատավորները հարց են ուղղել, թե ՊԵԿ-ն ինչպես կարող է քաղաքացիներին հարկել 2022 թվականից սկսած, երբ իրենց նորամուծությունների մասին հայտարարել են մի քանի օր առաջ ՝ ծանուցագրեր ուղարկելով հարկային պարտքի և չվճարման տուգանքների մասին: "Այս որոշման մեջ տրամաբանություն չկա", - ասել է մարզի բնակիչը:

Հատկանշական է, որ հարկային մարմիններում և միգրացիոն ծառայությունում, ուր դիմել են աշխատանքային միգրանտները, չեն կարողացել պատասխանել այն հարցին, թե ով և երբ է ընդունել այդ օրենքը: <Հարկային պարտքի մասին փաստաթուղթը ցույց տվեցի իրավաբանին, նա ասաց, որ այստեղ ոչ իրավական կոնկրետ որոշում կա, ոչ էլ՝ տրամաբանություն։ Այսպիսով՝ ո՞վ է գրել այդ օրենքը> ,- հարցրել է ակցիայի մասնակիցներից մեկը:

Արտագնա աշխատանքի մեկնող քաղաքացիները փաստել են, որ Հայաստանի Հանրապետությունը սեզոնային աշխատանքի ժամանակ իրենց չի ապահովում ոչ աշխատանքով, ոչ բժշկական ապահովագրությամբ, ոչ Ռուսաստանում բնակության վայրով, բայց, փոխարենը, հարկում է: Եվ սա այն ֆոնին, որ ռուբլու արժեզրկման պատճառով իրենց վաստակը մի քանի անգամ կրճատվել է։

<Մնացած կոպեկները, որոնցով վերադառնում ենք տուն, որպեսզի երեխաներին պահենք, ապագա զինվորին մեծացնենք, պետք է ուղղենք տուգանքի վճարմա՞նը: Իշխանությունն, ընդհանրապես, չի մտածում մարզերի մասին, աշխատատեղեր չի ստեղծում ՝ ոչ արդյունաբերության, ոչ գյուղատնտեսության մեջ։ Միակ վաստակը Ռուսաստանում սեզոնային աշխատանքն է>, - նշել են Գեղարքունիքի բնակիչները։

Բողոքի ակցիայի մասնակիցների մոտ էր եկել Գեղարքունիքի մարզպետ Կարեն Սարգսյանը։ Նրա բոլոր փաստարկներին ու պարզաբանումներին քաղաքացիները վերջինից պահանջել են պաշտպանել, առաջին հերթին, մարզի բնակիչների շահերը, այլ ոչ թե՝ հղում կատարել ԵԱՏՄ անդամ երկրների համար օրենքին: Սարգսյանը հաղորդել է, որ այժմ Պետեկամուտների կոմիտեում քննարկումներ են ընթանում ընդունված օրենքի վերաբերյալ՝ բնակիչներին խնդրելով սպասել արդյունքներին:

Հիշեցնենք, որ օրեր առաջ "Հայկական Կարիտաս" միգրացիոն ծրագրի փորձագետ Տաթևիկ Բեժանյանը մամուլի ասուլիսի ժամանակ բարձրացրել էր այս հարցը, ընդգծելով, որ նպատակահարմար է նման նորամուծություններ մտցնել միայն Պետեկամուտների կոմիտեի կողմից լայնածավալ իրազեկման արշավ անցկացնելուց հետո ՝ տեղեկացնելու աշխատանքային միգրանտներին լրացուցիչ հարկային պարտավորությունների մասին, որոնք նրանք կարող են ունենալ Հայաստան վերադառնալուց հետո: Անդրադառնալով ՀՀ օրենքին ՝ Բեժանյանը տեղեկացրել է, որ աշխատանքային միգրանտները չեն ծանրաբեռնվի հարկային պարտավորություններով, եթե Հայաստանից դուրս աշխատանքում գտնվեն 183 և ավելի օր, այսինքն, չլինեն երկրի հարկային ռեզիդենտ:

2022 թվականի տվյալներով՝ ՌԴ-ում աշխատանքային կամ քաղաքացիաիրավական պայմանագիր ունեցող Հայաստանի աշխատանքային միգրանտների թիվը գերազանցում է 130 հազարը։ Նրանցից հազարավորները Պետական եկամուտների կոմիտեից նամակներ են ստացել այն մասին, որ 100 հազարից մինչեւ 1 միլիոն դրամի չափով հարկային պարտք ունեն։ Այս պարտքի ընդհանուր գումարը առայժմ կազմում է շուրջ 187 մլն դրամ։