ՌԴ փոխարտգործնախարար. կարևորում ենք այն արցախցիների անվտանգ վերադարձի համար պայմանների ստեղծումը, ովքեր կցանկանան դա անել

Արմինֆո. 2025 թվականի նոյեմբերից հետո Լեռնային Ղարաբաղում ռուսական խաղաղապահ զորակազմի լիազորությունների երկարաձգման հարցը կախված կլինի տարածաշրջանում տիրող իրավիճակից, նրանց հետագա ներկայության պահանջարկից և Բաքվի հետ համապատասխան պայմանավորվածություններից։ Այդ մասին ՏԱՍՍ-ին հարցազրույցում հայտարարել է ՌԴ ԱԳ փոխնախարար Միխայիլ Գալուզինը։

Հիշեցնենք, որ հունվարի վերջին Նյու Յորքում Ռուսաստանի ԱԳ նախարար Սերգեյ Լավրովը, պատասխանելով ՌԽԶ-ի հետագա ճակատագրի եւ հայ-ադրբեջանական կարգավորման մասին հարցին, հայտարարել էր, որ Լեռնային Ղարաբաղում ռուս խաղաղապահների տեղակայման հարցն այլեւս չի վերաբերում հայկական կողմին, Բաքվի հետ երկկողմ քննարկման առարկա է:

Գալուզինի խոսքով՝ 2023 թվականի սեպտեմբերի 19-20-ը տեղի ունեցած մարտական բախումների արդյունքում Ղարաբաղն անցել է Բաքվի լիակատար վերահսկողության տակ։ <Սեպտեմբերյան նշված իրադարձությունները տեղի չեն ունեցել դատարկ տեղում: Հայկական կողմը ճանաչել է Ադրբեջանի տարածքային ամբողջականությունը, ներառյալ նրա կազմում Ղարաբաղը՝ դեռևս 2022 թվականի հոկտեմբերին Պրահայում ԵՄ հովանու ներքո կայացած գագաթնաժողովում։ Ընդ որում, տարածաշրջանի հայ բնակչության իրավունքների եւ անվտանգության ապահովման հարցն այն ժամանակ լուծված չէր", - նշել է նա։ "Հիմա Ղարաբաղն ինտեգրվում է Ադրբեջանի իրավական դաշտին։ Ցավոք, Ղարաբաղի հայերի մեծ մասը լքել է տարածաշրջանը։ Դա նրանց ծանր, բայց կամավոր ընտրությունն էր։ Այդ առնչությամբ կարևոր է պայմաններ ստեղծել նրանց վերադարձի համար, ովքեր կցանկանան դա անել՝ պատշաճ կերպով ապահովելով նրանց իրավունքներն ու անվտանգությունը: Պատրաստ ենք ամենայն աջակցություն ցուցաբերել այդ գործընթացին, այդ թվում՝ ռուսական խաղաղապահ զորակազմի գծով, որի ներկայությունը մեծ նշանակություն ունի։ Հաշվի առնելով Ղարաբաղում իրավիճակի արմատական փոփոխությունը՝ մեր խաղաղապահների գտնվելու պայմանները քննարկվում են միայն ադրբեջանական կողմի հետ։ Հարկ է նշել, որ մեր երկխոսությունը գործընկերների հետ կրում է կառուցողական բնույթ։ Ծագող բոլոր հարցերը լուծում ենք փոխընդունելի կերպով", - ասել է ՌԴ ԱԳ փոխնախարարը։

Նշենք, որ 2020թ. նոյեմբերի 9-ի եռակողմ հայտարարության համաձայն, ՌԽԶ-ը պետք է ներկա լիներ Արցախում մինչև 2025թ. նոյեմբեր՝ մանդատի հետագա երկարաձգման հնարավորությամբ: Սակայն անցյալ տարվա սեպտեմբերին ադրբեջանական ագրեսիայից և ԼՂՀ հայաթափումից հետո հարց առաջացավ ամայի քաղաքում մնացած խաղաղապահների հետագա ճակատագրի մասին