Ուրբաթ, 9 Փետրվարի 2024 15:18

Արմինֆո.Հայաստանի արդյունաբերողների և գործարարների միությունն իր խորին մտահոգությունն է հայտնում վերջին շրջանում իրավական համակարգի կողմից գործարարների և պետական պաշտոնյաների նկատմամբ անհամաչափ գործողությունների առնչությամբ։ Այդ մասին ասվում է ԱրմԻնֆո-ին տրամադրված ՀԱԳՄ հայտարարությունում:

 

«Կողմ լինելով ցանկացած օրինախախտում միչև վերջ բացահայտելու և մեղավորներին պատժելու հրամայականին, այդուհանդերձ, անընդունելի ենք համարում, երբ տնտեսական ենթադրյալ հանցագործության պարագայում, դեռևս գործի քննության նախնական փուլում, մեղավորությունն անգամ չհաստատված՝ գործարարների, ինչպես նաև պետական պաշտոնյաների նկատմամբ անհիմն կիրառվում են խափանման ծայրահեղ մեթոդներ, ընդհուպ՝ կալանք։

 

Ասվածի թարմ օրինակ է «Սիներջի» ընկերության հիմնադիր և տնօրեն Աշոտ Հովհաննիսյանի և նույն գործով անցնող այլ անձանց կալանավորումը, երբ վերջիններս զրկվել են բնականոն գործունություն ծավալելու հնարավորությունից, հարված է հասցվել նրանց գործարար համբավին այն դեպքում, երբ դեռ համապատասխան գործը քննության փուլում է։ Գտնում ենք, որ խափանման նման միջոցն անհամաչափ է և ոչ արդարացված։ Գործարարների նկատմամբ նման գործելաոճն իր բացասական հետքն է թողնում վերջիններիս նախաձեռնողականության, ինչպես նաև արտասահմանյան ներդրումների ներգրավման վրա։

Հիշյալ գործն առնչվում է գնումների գործընթացին, որի ոչ ամբողջականության, թերի կողմերի մասին ՀԱԳՄ-ն քանիցս բարձրաձայնել, բարելավման տարբեր առաջարկներով դիմել է պատկան մարմիններին։ Համանման քննարկումներ բազմիցս եղել են նաև ոլորտը համակարգող ՀՀ էկոնոմիկայի նախարարության հետ, որը դրսևորել է գործնական շահագրգռվածություն՝ այս և գործարարությանը հուզող այլ հիմնախնդիրներին համատեղ լուծումներ տալու ուղղությամբ։

 

Միությունն իր կոչմանը հավատարիմ՝ շարունակելու է հանդես գալ տնտեսական միջավայրի բարելավման նպատակով պետական կառույցների հետ երկխոսության ծավալմամբ, միաժամանակ իր ջանքերը ներդնելու է գործարարների շահերի պաշտպանության, նրանց գործունեությունը տարբեր ոտնձգություններից զերծ պահելու, տնտեսական առողջ միջավայր ձևավորելու ուղղությամբ», - ընդգծվում է հայտարարությունում։

 

Հիշեցնենք, որ Էկոնոմիկայի նախարարության մի շարք պաշտոնյաների և մասնավոր հատվածի ներկայացուցիչների դեմ քրեական գործը հարուցվել էր հունվարի 31-ին: Քննության վարկածով ՝ "Հասարակական ներդրումային ծրագրերի բանկի ստեղծում" մրցույթի շրջանակներում պաշտոնատար անձինք համաձայնության են եկել ընկերություններից մեկի ղեկավարի հետ ՝ արհեստական խոչընդոտներ ստեղծելով մրցակցի մասնակցության համար: Արդյունքում հաղթել է ընկերությունը, որը հայտ է ներկայացրել երեք անգամ ավելի թանկ գնով (392 մլն դրամով ՝ գրեթե 100 հազար դոլար) ։ Ավելի ուշ հայտնի է դարձել, որ խոսքը «Սիներջի» ընկերության մասին է։ Գործով ձերբակալվել է ընկերության տնօրեն Աշոտ Հովհաննիսյանը; ընկերության նախկին աշխատակից, ԱԺ նախագահի հարսը՝ Անի Գևորգյանը, ևս մեկ աշխատակից, ինչպես նաև նախարարության պետական ներդրումների քաղաքականության վարչության պետ Լիլի Սիրականյանը: Աշխատանքից ազատված էկոնոմիկայի փոխնախարար Անի Իսպիրյանը տնային կալանքի է ենթարկվել:

 

Նախօրեին հաղորդվել է, որ "Սիներջի Ինթերնեյշնլ Սիսթեմս" ընկերության հիմնադիր-տնօրեն Աշոտ Հովհաննիսյանին  և աշխատակից Լիլի Մկրյանին ՀՀ էկոնոմիկայի նախարարությունում չարաշահումների և լիազորությունների չարաշահման գործի շրջանակներում կալանավորելու որոշումները բողոքարկվել են Վերաքննիչ դատարան: Ավելի վաղ ՀՀ գլխավոր դատախազությունը ստացել էր "Քաղաքացիական պայմանագիր" խմբակցության պատգամավորների անձնական երաշխավորության վերաբերյալ միջնորդությունը: