«Երևանի թատերական փառատոնը» բացառության կարգով ընդգրկվել է Եվրոպական փառատոնների ասոցիացիայում

Արմինֆո.Երևանի թատերական փառատոնը (ԵԹՓ), որն առաջին անգամ կայացել է 2023 թվականին, բացառության կարգով ընդգրկվել է Եվրոպական փառատոնների ասոցիացիայում։

Ինչպես փետրվարի 7-ին կայացած մամուլի ասուլիսի ժամանակ նշել է Գ. Սունդուկյանի անվան ազգային ակադեմիական թատրոնի տնօրեն Վարդան Մկրտչյանը, սա աննախադեպ իրադարձություն է, քանի որ Եվրոպական փառատոնների ասոցիացիայի կանոնադրության համաձայն, նման կարգավիճակ կարելի է ստանալ միայն փառատոնի կյանքի երեք տարին լրանալուց հետո, երբ շոշափելի են կոնկրետ արդյունքները։ Միայն դրանից հետո ասոցիացիայի խորհուրդը նման որոշում է կայացնում։

Մկրտչյանը պատմել է, որ "Երևանյան թատերական փառատոնի" ավարտից հետո ինքը մեկնել է Սարաևո, որտեղ առանձին հանդիպումներ են ունեցել Եվրոպական թատերական փառատոնների ասոցիացիայի ղեկավարության հետ, որոնց ընթացքում էլ հայտարարվել է նման որոշման մասին:

Այս տարվա մայիսին ասոցիացիայի խորհրդի նիստում տեղի կունենա քվեարկություն' ԵԹՓ-ին նման կարգավիճակ շնորհելու վերաբերյալ, սակայն, ինչպես հավաստիացրել է Մկրտչյանը, քվեարկությունն ավելի շատ ձեւական է, քանի որ խորհուրդն արդեն տվել է իր հստակ համաձայնությունը: "Ես դա կարեւոր ձեռքբերում եմ համարում", - ընդգծել է Սունդուկյանի անվան ազգային թատրոնի ղեկավարը:

Նախորդ տարի Երևանյան թատերական փառատոնը կայացավ նաև պետական աջակցության շնորհիվ (ԿԳՄՍՆ և Երևանի քաղաքապետարան): Հատկանշական է, որ 2024 թվականին Կրթության, գիտության, մշակույթի և սպորտի նախարարությունը չի ֆինանսավորի փառատոնի անցկացումը։ Այդ առնչությամբ Վարդան Մկրտչյանը նշել է, որ ամենևին էլ նեղսրտած չէ։ Այս տարի փառատոնը տեղի կունենա Հայաստանում Ֆրանսիայի դեսպանատան, Ֆրանսիական ինստիտուտի և այլ գործընկերների աջակցության շնորհիվ, որոնց հետ բանակցություններ են ընթանում:

Հիշեցնենք, որ Երևանյան թատերական փառատոնի շրջանակներում, որի հիմնադիրն էԳ.Սունդուկյանի անվան ազգային ակադեմիական թատրոնը, Հայաստանում հանդես  եկան Փարիզի <Օդեոն> թատրոնը, Ամերիկյան Lit Moon թատրոնը, Սանկտ Պետերբուրգի Ալեքսանդրինսկի թատրոնը, Լեհաստանի Ալեքսանդր Վենգերկոյի դրամատիկական թատրոնը, Վրաստանի < Լիբերթի > թատրոնը, ինչպես նաև հայկական թատրոնները, այդ թվում ' <Ձև>, Երևանի Պատանի հանդիսատեսի թատրոնը, NCA Փոքր թատրոնը, ինչպես նաև Գյումրու Վ. Աճեմյանի անվան դրամատիկական թատրոնը և Արտաշատի Ա. Խարազյանի անվան դրամատիկական թատրոնը: