Արմինֆո.ՀՀ վարչապետ Նիկոլ Փաշինյանը նախանշված նոր սահմանադրության համատեքստում պարզաբանել է Հայաստանի չորրորդ հանրապետության ստեղծման մասին նարատիվը:
Փետրվարի 7-ին խորհրդարանում կառավարության ժամի ընթացքում, պատասխանելով համապատասխան հարցին, Փաշինյանը նշել է Ֆրանսիայի օրինակը, որն այսօր կոչվում է հինգերորդ Հանրապետություն, որի սկիզբը դրվել է մինչ օրս գործող սահմանադրության ընդունմամբ: "Այս գաղափարը պետք է դիտարկել տվյալ համատեքստում, այս առումով, չորրորդ հանրապետության մասին խոսելիս, ես նկատի ունեմ նոր սահմանադրությունը. երբ բոլորը, նույնիսկ, նրանք, ովքեր դեմ են քվեարկել, ընդունում են, որ մեծամասնությունն աջակցել է", - հստակեցրել է Փաշինյանը:
Արձագանքելով նոր սահմանադրության ընդունման ընդդիմախոսներից շատերի մտահոգությանը, ովքեր համոզված են, որ իշխանությունները կգնան սահմանադրական հանրաքվեի արդյունքների կեղծման՝ ցանկալի արդյունքի հասնելու համար, Վարչապետը հավաստիացրել է, որ եթե իր կառավարման շրջանում, "եթե անգամ որեւէ մեկը խնդիր դնի կեղծել ընտրությունները, մենք չենք կարող դա անել, որքան էլ ծիծաղելի հնչի": Վարչապետը հերթական անգամ հիշեցրել է, որ իր գլխավորած կառավարությունը բազմաթիվ ընտրություններ է անցկացրել ինչպես ՏԻՄ, այնպես էլ հանրապետական մակարդակով, և ոչ մի ձայն չի կեղծվել:
Ընդ որում, ինչպես խոստովանել է վարչապետը, կառավարող ուժն այսօր իր ձեռքում չունի առաջարկվող փոփոխությունների պատրաստի տեքստ։ <Եվ դա վատ չէ, ընդհակառակը, լավ է: Կարծում եմ, որ, առաջին հերթին, հասարակության շրջանում պետք է ձևավորվի ըմբռնում այդ փոփոխությունների անհրաժեշտության մասին", - ասել է կառավարության ղեկավարը։
Հիշեցնենք, որ հունվարի 19-ին ՀՀ արդարադատության նախարարությունում Փաշինյանը հայտարարել էր, որ Հայաստանին անհրաժեշտ է նոր սահմանադրություն, որը ՀՀ-ն ավելի կենսունակ կդարձնի աշխարհաքաղաքական նոր պայմաններում: Վարչապետի ընդդիմախոսները հայտարարել են, որ նախաձեռնությունը բխում է Բաքվից, հիմնականում, նպատակ ունենալով ՀՀ սահմանադրությունից հանել Անկախության մասին հռչակագրին հղումները, որտեղ հիշատակվում է Հայկական ԽՍՀ-ի և Լեռնային Ղարաբաղի վերամիավորման մասին որոշումը: Խնդրահարույց է համարվում նաև Անկախության հռչակագրի 11-րդ կետը, որտեղ ասվում է, որ Հայաստանի Հանրապետությունն աջակցում է Օսմանյան Թուրքիայում 1915 թվականի Հայոց ցեղասպանության միջազգային ճանաչմանը: Փետրվարի 1-ին ՀՀ Հանրային ռադիոյին տված հարցազրույցում կառավարության ղեկավարը հայտարարել է. "Մենք ունենք քաղաքացու և պետության միջև անջրպետ, որն արտահայտվում է լեգիտիմությամբ, չէ որ Հայաստանի Հանրապետության սահմանադրությունը, որն ընդունվել է 1995 թվականին և փոփոխվել է մի քանի անգամ, ոչ մի անգամ չի ընդունվել այնպիսի պայմաններում և իրադրությունում, որ Հայաստանի Հանրապետության քաղաքացին ինքն իրեն ասի՝ գնացի, քվեարկեցի և ընդունեցի սահմանադրությունը":