Հայաստանում ընտանեկան բռնությունը հաճախ լատենտ բնույթ է կրում. փոխնախարար

Արմինֆո. Հայաստանում ընտանեկան բռնությունը հաճախ լատենտ բնույթ է կրում։ Փետրվարի 7-ին Ազգային ժողովի ամբիոնից այդ մասին հայտարարել է ՀՀ ներքին գործերի նախարարի տեղակալ Արփինե Սարգսյանը՝ խոսելով մի խումբ պատգամավորների ներկայացրած "Ընտանիքում բռնության կանխարգելման եւ ընտանեկան բռնությունից տուժածների իրավունքների պաշտպանության եւ ընտանիքում խաղաղության վերականգնման մասին" օրենքում փոփոխությունների մասին:

Փոխնախարարի ասելով՝ ընտանեկան բռնության դեմ արդյունավետ պայքար կարելի է իրականացնել երեք դեպքում. օրենսդրական դաշտի ձևավորում, ոստիկաններին համապատասխան լիազորություններով օժտում և քաղաքացիական հասարակության համակարգի զարգացում: Սարգսյանը նշել է, որ մի դեպքում ընտանեկան տարաձայնությունների մասնակցի նկատմամբ կարելի է վարչական պատասխանատվության ենթարկել, մյուս դեպքում՝ քրեական, իսկ երրորդ դեպքում, ընդհանրապես՝ ոչ մի:

Փոխնախարարը հաղորդել է, որ եթե 2021 թվականին երկրում գրանցվել է ընտանեկան բռնության 1644 դեպք, ապա 2023 թվականին այդ ցուցանիշն արդեն կազմել է 1819 դեպք: Այդ խախտումների արդյունքում 2021 թվականին նախազգուշացում է տրվել 528 անձի նկատմամբ, իսկ 2023 թվականին՝  551: 2021 թվականին 554 անձի նկատմամբ կայացվել է անհետաձգելի միջոցառումներ ձեռնարկելու որոշում, 2023 թվականին այդ թիվն աճել է գրեթե 300 դեպքով (832 դեպք)։ Սակայն, ինչպես ընդգծել է Սարգսյանը, այդ թվերը չեն կարող վկայել գործերի իրական վիճակի մասին։

Նշենք, որ օրենքի նախագիծը քննարկվում է փետրվարի 7-ին ՀՀ Ազգային ժողովի լիագումար նիստում: Փաստաթղթի համահեղինակ, ԱԺ պատգամավոր Զարուհի Բաթոյանի ասելով՝ օրինագիծն ուղղված է ընտանեկան բռնությունից քաղաքացիների պաշտպանության բարձրացմանը և դրա հետևանքների հաղթահարմանը: Մասնավորապես, առաջարկվում է բռնության զոհ համարել նաև ընտանեկան տարաձայնությունների ականատես երեխաներին: Բացի այդ, առաջարկվում է առաջնային օգնության տրամադրման փոխարեն սահմանել անվճար կամ արտոնյալ պայմաններով բժշկական օգնության ստացում: Առաջարկվում է նաև ընդլայնել ծանրացուցիչ հանգամանքների ցանկը։