Արմինֆո. Արցախի Հանրապետության (Լեռնային Ղարաբաղի) մարդու իրավունքների պաշտպան Գեղամ Ստեփանյանը և նախկին պետնախարար Արտակ Բեգլարյանը Արցախի ժողովրդի անօտարելի իրավունքների, ազգային շահերի և ժողովրդավարական ձգտումների մասին պատմել են Կապիտոլիումի բլուրում կայացած ճեպազրույցում, որտեղ ելույթ են ունեցել նաև ԱՄՆ օրենսդիրներ Բրեդ Շերմանը և Ջեյմս Կոստան: Միջոցառումը կազմակերպել էր Ամերիկայի Հայ դատի հանձնախումբը (ANCA):
"Մենք այստեղ ենք, որպեսզի պահանջենք արցախցի փախստականների իրենց տներ անվտանգ վերադարձի իրավունքը, տներ, որոնք շատ դեպքերում հարյուրավոր տարիներ զբաղեցրել են նրանց ընտանիքները", - հայտարարել է Ներկայացուցիչների պալատի անդամ Շերմանը, ով կոչ է արել պահպանել Ադրբեջանին ամերիկյան օգնության 907 ուղղման սահմանափակումները, ինչպես նաև պատժամիջոցներ սահմանել Ալիևի ռեժիմի նկատմամբ՝ Արցախի էթնիկ զտման համար: Վկայակոչելով նախագահ Ալիևի աճող հռետորաբանությունը, որը պնդում է, թե Հայաստանի մայրաքաղաք Երևանը Ադրբեջանի տարածք է, Ներկայացուցիչների պալատի անդամ Շերմանը Բայդենի վարչակազմին կոչ է արել Հայաստանին պաշտպանական սպառազինություն տրամադրել՝ "խուսափելու համար հաջորդ ողբերգությունից, որը նախատեսվում է Բաքվում": Շերմանն իր ելույթն ավարտել է նախագահ Ալիևին հղված ուղերձով, որը պնդում է, որ իր գլխավոր թշնամիներն աշխարհի հայերն են: "Դե, ես ձեզ համար նորություն ունեմ, պարոն Ալիև։ Ձեր գլխավոր թշնամիներն աշխարհի բոլոր մարդիկ են, ովքեր հավատում են ժողովրդավարությանը, մարդու իրավունքներին և արդարությանը":
Դատապարտելով Արցախի ադրբեջանական էթնիկ զտումը՝ հանրապետական Կոստան նշել է. "Մենք պետք է ավելին անենք, որպեսզի ամերիկյան մարդասիրական օգնություն տրամադրենք Արցախի բռնի տեղահանված բնակչությանը՝ լրացուցիչ օտարերկրյա օգնության միջոցով, որը ներկայումս դիտարկվում է: Մենք պետք է Ադրբեջանի կառավարության վրա պատասխանատվություն դնենք ոչ միայն էթնիկ զտումների, այլև մշակութային ցեղասպանության համար, որը նրանք շարունակում են իրականացնել համակարգված ջանքերի շրջանակներում, որոնք վաղուց արդեն Ադրբեջանի պատմությունն են և նրանց վերաբերմունքը հայ ժողովրդի, մշակույթի և կրոնի նկատմամբ: Այն սպառնալիքները, որոնք այժմ առաջ է քաշում Ադրբեջանը Հայաստանի հասցեին, ես կարծում եմ, որ լուրջ են և իրական, ուստի դրանց պետք է համապատասխանաբար վերաբերվել"։ Նա նաև կոչ է արել ԱՄՆ-ին կոնկրետ գործողություններ ձեռնարկել ՝ ապահովելու Արցախի ղեկավարների և հայ ռազմագերիների վերադարձը, որոնք ապօրինաբար պատանդ են պահվում Ադրբեջանի կողմից:
Ճեպազրույցի ընթացքում Ստեփանյանն ու Բեգլարյանը ներկայացրել են Ադրբեջանի կողմից Լեռնային Ղարաբաղի տասնամսյա շրջափակման դաժան իրողությունների ականատեսների վկայությունները, որի գագաթնակետը 2023 թվականի սեպտեմբերին տեղի ունեցած ցեղասպան հարձակումն էր, որի արդյունքում Արցախը բռնի կերպով զրկվեց բնիկ հայ բնակչությունից: Արցախի ներկայացուցիչները կիսվել են 2023 թվականի ցեղասպանության հիմքը դրած արցախցիների դեմ Ադրբեջանի կանխամտածված հարձակումների պատմությամբ: Բեգլարյանն ու Ստեփանյանը կոչ են արել ԱՄՆ ղեկավարությանը և միջազգային հանրությանը պատասխանատվության ենթարկել Ադրբեջանին Արցախում ցեղասպանության համար, այդ թվում ՝ Ադրբեջանի նկատմամբ պատժամիջոցներ կիրառելու միջոցով, Սենատի կողմից ընդունված S. 3000 օրենքի հիման վրա, որն ապահովում է Ադրբեջանին ռազմական օգնության և անվտանգության ոլորտում օգնության էմբարգոյի 907 փոփոխության սահմանափակումները: Նրանք նաև կոչ են արել Մագնիտսկու պատժամիջոցները կիրառել Ալիևի պետական պաշտոնյաների նկատմամբ ՝ 2020 թվականին Հայաստանի և Արցախի դեմ ադրբեջանա-թուրքական պատերազմի և դրան հաջորդած ցեղասպան ագրեսիայի ընթացքում իրականացված ռազմական հանցագործությունների և էթնիկ զտումների համար:
Նրանք նաև խնդրել են ԱՄՆ-ի օգնությունը Արցախի բռնի տեղահանված հայ համայնքին, ներառյալ բնակարանային և զբաղվածության օժանդակությունը, մինչև ապահով մեխանիզմ ստեղծվի Արցախի իշխանությունների հետ միջազգային վերահսկողության և միջնորդության միջոցով ՝ երաշխավորելու բռնի տեղահանված հայերի անվտանգ վերադարձը Արցախի իրենց տներ: Պահանջների թվում էին նաև ՝ 2023 թվականի սեպտեմբերին գերեվարված Արցախի առաջնորդների և 2020 թվականին Ադրբեջանի և Թուրքիայի հարձակումներից հետո Ադրբեջանի կողմից ապօրինի պահվող ռազմագերիների անհապաղ ազատ արձակման ապահովումը, Ադրբեջանի կողմից արդեն ոչնչացման վտանգի տակ գտնվող Արցախի հայկական մշակութային և կրոնական ժառանգության պահպանումը։ Ստեփանյանն ու Բեգլարյանն ընդգծել են, որ առանց Արցախի ժողովրդի անվտանգ վերադարձի և կատարված հանցագործությունների համար արդարության իրավունքի ապահովմանն ուղղված միջազգային ջանքերի անհնար կլինի կայուն խաղաղություն հաստատել տարածաշրջանում: Նրանք նաև ընդգծել են, որ Ադրբեջանի կառավարության կողմից հրահրվող համակարգային հակահայկական ատելությունը պետք է արմատախիլ արվի, որպեսզի ապահովվի հակամարտության տևական կարգավորում և տարածաշրջանային կայունություն:
Բանախոսներն ընդգծել են, որ 907-րդ հոդվածի կատարումը՝ 3000-րդ հոդվածի ընդունման միջոցով, նշանակալի ներդրում կլինի տարածաշրջանային խաղաղությունում: